Read Hadiyya Iyyoob Kitaaba 22 Bible Online

Iyyoob Kitaaba 22 - Hadiyya bible

Iyyoob Kitaaba 22

¹Teemaan uulli Eelfaazim dabaraa

²«Manchi Waa'ina awwaadeena xanoohonnihe? Qooram ihuta'n awwaadookkok ixxi gaginatte bagaan Waa'ina awwaadooyyo.

³Ki muccuroom hundam xanoo Waa'ina maha awwaadookko? Te'im miiqakkam luwwi bee'i baxo baxxita'ndu ixxena maha awwaadookko?

⁴At Waa'a badditoohan ihuta'n ixxi keese axeereenaa keesennem oogateenaa hasam hee'ukkonnihe?

⁵Ki jolli lophphaakkoohaneyyonnihe? Ki baaxiilinam tungi bee'aneyyonnihe?

⁶Mat mashka'i bee'ekam kiyyabbaayyuwwiinsi dabbaa massitaatto; mulli manniinsim eddechcha maxattaa leexa'issaatto.

⁷Xeebe'ukkaannina wo'o hoottaatto; sibaarukkaaninam hurbaata hoottaatto;

⁸Malaayyee daannoomaa bakke'llaa mannika uulla hoottaa ki gaqqi amaxxa haraassitaatto.

⁹Goon lehu meentom leexa'i angam hollitaatto; adaraar oosikam amaxxa bi'issaatto.

¹⁰Ee mashka'inne oono'o at qaashinne kibbaantaatto; dangonne afoo hawwim keese dambaqisookko.

¹¹Moo'lloobee'isa tuunsi ifiisaakko; dirisim keese xuuxaakko.

¹²Waa'i hanaan yoo iimanenne hee'oohaneyyonniyye? Boollaanki maham hanaan yoo beyyonne ihuta'nnim ixxi ee keeniinsi hanaan ihaa moo'ookko.

¹³Ihukkaarem at ‹Waa'i maha la'ookko? Gambabbaakkoo tuunsi woronne ihaa hinkid eesenne oogateena xanookko?

¹⁴Iimanenne daba'llamukkuuyyi gambabbaakkoo duub ifiisoo bikkina moo'eena xanooyyo› yitoolla.

¹⁵«Baaxiilaan daba'llantam hee'llo'i gaassi googonne taakke'lloollannihe?

¹⁶Ixxuwwi amman afoo'nnim leto'ookko; dirisinnem aanshanta'a ixxuwwik beyyi bi'aakko.

¹⁷Ixxuwwi hundam xanoo Waa'ina ‹Niinnii qee'lle; at niina maham issiteena xantooyyo› yito'o.

¹⁸Ihukkaarem ixxuwwi mine er luwwinne wonshukkok Waa'a; ee bikkina an baaxiilaan kee'nneka sawwite aa'oommoyyo.

¹⁹Baaxiilaan manni guzumo'antu'uuyyi moo'lla'a muccur manni liirantamo; miiqakkam luwwi bee'i mannim ka'isa yitu'uuyyi ixxuwwanne osattamo.

²⁰‹Hanqo'isam ni diina'i bi'llookko; ixxuwwi amaxxi hundim giirinne shokkaakko›.

²¹«Ee bikkina Iyyooba, at Waa'ina ho'llame; ixxe maqirem kiina xummi hee'ona eehid ikkittaare maasso siiddootto.

²²Waa'i kiina uwwoo sogitano aa'e; ixxi sagaram ki wodanonne disse.

²³Ki gaga heeshaa'llaa hundam xanoo Waa'i kollonne daba'llitilas baaxiilom ki miniinsi qeessittilas

²⁴Worqam buchchanne ubbuussilas Oofii'l uulli worqam dajji woro'l ki'n lambe'enne darabbilas

²⁵Hundam xanoo Waa'i kiina worqaa bito xee'aalli kin biraa ihookko.

²⁶Ee ammane Hundam xanoo Waa'anne liirantootto; ixxonnem amma'nnitaa hee'llootto.

²⁷Ixxi kollonne uunxitoo ammane uunxitti luwwa hundam uwwookko; atim uga'a uwwitootto.

²⁸Sawwititti sawwit hundim wo'mmookko; mattoo goog hundim caakkookko.

²⁹Waa'i bolxitam keeno sholliisookko; ihukkaarem gaga heeshaa'llam keeno gatisookko.

³⁰Ki wodan muccur ihuta'n Waa'i keese jor hundiinsim egerookko; ki angim baaxiiliinsi muccur ihuta'n Waa'i keese gatisookko» yukko.