Read Hadiyya Iyyoob Kitaaba 23 Bible Online

Iyyoob Kitaaba 23 - Hadiyya bible

Iyyoob Kitaaba 23

¹Iyyoobim dabaraa

²«Kabadem i wodan qaraaraalli kichchechchinne wo'mmaakkoohane; mashka'oomim qitinummuuyyi laarumta'nnim Waa'ik angii eesenne kee'mmukkisam yookko.

³Ixxi yoo beyyo la'umta'n eran hee'ukko; hee'oo beyyom afumta'n liiramam hee'ummo.

⁴I meto'o ixxi illagenne hincaa'am hee'ummo; i gaginam uullaa fitamam hee'ummo.

⁵Iina uwwoo dabachcha la'am hee'ummo; iina mayyooda'em qoossaa la'am hee'ummo.

⁶Eehannah Waa'i ixxaanninne lob malaayyinne eesenne oogatoohonnihe? uunxoommoka hundam uwwookko bagaan eehid issooyyo.

⁷Muccur manchi ixxi meto'o Waa'i illagenne hincaa'ookko; iina oogatoo Waa'im eese wolabbanonne fissookko.

⁸«Ihukkaarem eelliinchi firoo kollonne marumta'nnim eekke'enne bee'e; eelliinchi aagoo kollo daba'llumta'nnim siideena xanummoyyo.

⁹Waa'i hanaa'n qarinne ixxi baxo baxoolla ihukkaarem an siideena xanummoyyo; woroo'n qaranne daba'llummaarem siideena xanummoyyo.

¹⁰Ixxi an taakke'oommi taakko hundam la'ookko; eese keenuta'nnim worqisa muccur ihaa firoommo.

¹¹Ixxi iittoo googonne amma'nnanchinne daba'llamoommo; lam tiir ihaa makkannee qeddannee maroommoyyo.

¹²Hundi ammanem Waa'i ijaajo egeroommo; ixxi sagaram i wodanonne dissaammo.

¹³«Waa'i dabassamooyyo; ixxenne uullixxameena xanookkokim bee'e; ixxi iittukkoka hundam issookko.

¹⁴I bikkina sawwukkoka hundam issookko; eekka laboo lobakat sawwitim yookko.

¹⁵Ee bikkina ixxi illagenne uullimma iina lobakata baddisookko; eekka sawwoommi ammanem baa'oommo.

¹⁶Waa'i i wodan hoogoo'isa issukko. Hundam xanoo Waa'im eese muggisukko.

¹⁷Maham gambabbi tuunsi i ille ifiisuta'nnim tuunsik malaayyi woceena hoorukkoyyo» yukko.