Read Hadiyya Iyyoob Kitaaba 24 Bible Online

Iyyoob Kitaaba 24 - Hadiyya bible

Iyyoob Kitaaba 24

¹Hundam xanoo Waa'i oogato uwwoo ammane mahina amadooyyo? Ixxi awwaadaandu ixxi oogaxxi sagara hinki balli afeebe'e egettamo?

²«Boqqi manni uulla haraasaqqiteena gabala ginditamo; gereebbam malaayyissa'a hootta'a ixxuwwi allaachchinne eddamo.

³Adaraar oosika hallichcho malaayyissa'a hoottamo; goonchi bee'i meentichchokam mirgo'o amadda'a massitamo.

⁴Bux keeno shigigita'a googiinsi hollitamo; uullanne yo'i hawwaanim ixxuwwiinsi maaxamtamisa issitamo.

⁵«Bux keen udma'i uullanne hee'oo bii'l hallisa ixxuwwi oosinam hurbaata hassu'uuyyi qondooddamo.

⁶Balli baxaan ikka'atim mulli manni hurbaata wixxaa'llamo. baaxiilaan kee'n woyi'n woriinsim giggira feettamo.

⁷Hiimooma hundoomam leexa'am iinse'lla'a gattamo; qiidina edde'llam eddechchim bee'e.

⁸Duunanne ga'nnoo xeen ixxuwwi orachcho aashisookko; gattam beyyo hogga'atim geejji ki'n lugumonne gattamo.

⁹«Anni lehu ciila ixxuwwi baxaanchi issiteena am anuuniinsi hootta'a massitamo; hawwaa'n oosom badanina amadda'a massitamo.

¹⁰Bux keen eddechcha edde'lloo'n leexa'am baxina mattamo; hurbaata wixxaa'akkam agana farshimma iyyita'a gugguttu'uuyyim sibaattamo.

¹¹Boqqi kee'n kaashshi beyyonne wee'l mishiinsi zayta ciinsitamo. woyi'n mishiinsim woyi'n diqaasa lubbamo; ihukkaarem ixxuwwi xeebe'llamo.

¹²Beero'uwwanne leteena wotta'llam manni diintamo; omatto'i mannim hara'mmato hassa'a laattamo; ihukkaarem Waa'i ixxuwwanne baxakko'i barche'e moo'ukkoyyo.

¹³«Caakka ha'yyitambee'i manni yo'o; caakki mada'ee laqqambee'i bikkina caakki googo awwontamoyyo.

¹⁴Manna shookkok soodoo'nnim daram ki'aa buxaa hawwaanoo shookko; hiimom gamina marookko.

¹⁵Saa'oo manchi uulli hiimoo'isa egerookko. ayyim moo'eena xanoobee'eka labisaa illi kollo ifiixxookko.

¹⁶Gamaan mine hinta'a gamina aaggamo; ihukkaarem caakka ha'yyitambee'i bikkina balla maaxamta'a hossamo.

¹⁷Gambabbaakkoo tuunsi ixxuwwina soodaraa'llisa; baddisoo tuunsim ixxuwwina beshichcho.

¹⁸«Ihukkaarem ixxuwwi wo'onne hanenne moo'amoo himbisa hofqax ammanina moo'antamo; ixxuwwi gaqqi uullim duumamaakkoohan ihookko. Ixxuwwi woyi'n kaashshi beyyom marookkok hee'ooyyo.

¹⁹Barad iibbinne bukkamaa wo'om billi gokkisoohaannisa baaxiilaan keenim leta'a bi'llamo.

²⁰Ixxuwwa qaru ammo'im ixxuwwa xadookko; ixxuwwi maara daquur itookko; boqquwwi keen haqqisa ubba'a iiqantamo; ixxuwwa tiirookkokim hee'ooyyo.

²¹Ixxuwwi oos bee'i alceenni meento boggo'oo bikkina goon lehu meentina eroomma issitobee'i bikkinaa ku hawwi hundim ixxuwwanne afukko.

²²Ihukkaarem Waa'i ixxi malaayyinne malaayyaammuwwa bi'isookko; makkixxitota'nnim ixxuwwina heechchi lubbat bee'e.

²³Waa'i xumminne hee'llamisina cawwukkaarem ixxuwwi mattam googo hundam qoossaa moo'ookko.

²⁴Baaxiilaan manni hofqax ammanina iimiimitamo; ihukkaarem qaqqisom bochchisa quubba'a bi'llamo; wix hurbaaxxisam murantamo.

²⁵Eehid ihubeelas an qophphanaanchi ihummisaa wocummi sagarim hanqi ihubee'isaa la'isookkok ayyette?» yukko.