Read Hadiyya Iyyoob Kitaaba 27 Bible Online

Iyyoob Kitaaba 27 - Hadiyya bible

Iyyoob Kitaaba 27

¹Iyyoobim wocukkuuyyi

²«Hanqo'i oogato hooraa i heechchi erisa qaraaroo'isa issu hundam xanoo hee'oo Waa'i summinne hide'oommo;

³Waa'i iina foore uwwaa fooshshe'ummuuyyi yoomqaxanne

⁴i suumiinsi hore'em jor sagar firooyyo; i allabim qophphano wocooyyo.

⁵Ki'nnuwwi woccakko'oka hundam hanqaa yaa hore'em amma'nnoommoyyo; leheembee'i afeebe'em i muccurooma fatakoommoyyo.

⁶I muccurooma fatakoombee'isa qoxxisaa amadoommo; i heechchi doollenne hundannem i itiir eese acceeqasooyyo.

⁷«I diina'ii eese sabbam keenii hundim baaxiilaanchisaa boqqi manchisaa guzumo'antona.

⁸Waa'i ixxuwwika foore maariinsi annannissaa ixxuwwika umura gundisoo ammane Waa'a laqqambee'i keenina mah neeyyat hee'ookko?

⁹Hawwi ixxuwwanne afoo ammane Waa'i ixxuwwi laachcha macceesoohonnihe?

¹⁰Ixxuwwi hundam xanoo Waa'anne liirantamonnihe? waadu hundi ammanem weeshshamonnihe?

¹¹«Waa'ik malaayyi hinkaa'nna loban ihuda'e ki'nnuwwina losisoommo; hundam xanoo Waa'i sawwitem maaxoommoyyo.

¹²Ki'nnuwwim ka hundam laqqakkamo; eehannah ka awwaad bee'i woshsha mahina woccakkamuulla?» yukko.

¹³«Oono'o, hundam xanoo Waa'i boqqi manchoo damigaanchi manchoo guzumo'ookkok ka'isinnette.

¹⁴Ixxi oos dut ikkota'nnim oranne beedditamo; ixxi shumo'im hurbaat hoogga'a sibaattamo.

¹⁵Gatto'i qaxim jabbinne beedditamo; goon lehu meentim ixxuwwina wi'llitamoyyo.

¹⁶Boqqi manchi bira buchchisa wixxaa'eenaa eddechcham ha'llisa tuubeenaa xanookko.

¹⁷Ihukkaarem ixxi wixxaa'u eddechcha muccur keen edde'llamo; tuubu biram xummaan keen baxxantamo.

¹⁸ixxi baxoom minim idooxxi do'nnisaa hurbaata egeroo manchi daasisaa qaaqisom gindamookko.

¹⁹Boqqi manchi erisa goddaanchi ihaa iinse'ookko; ihukkaarem diriichchiinsi baqoohaare hor hee'ooyyo.

²⁰Ixxonne muggi dirisisa dangonnem afookko; hiimonnem hambu'llam hafachchi amadaa marookko.

²¹Eelliinchi firoo kolli hafachchi ixxi hee'oo beyyiinsi fii'aa massookko.

²²Hafachchiinsi gibaa xoreena geerookko; ihukkaarem mishan bee'eka ixxi hanenne dillookko.

²³Hafachchim ixxonne anga aphphisukkuuyyi naacamookko; ixxi yoo beyyiinsim fiinqeesukkuuyyi fissaa darabookko» yukko.