Read Hadiyya Iyyoob Kitaaba 28 Bible Online

Iyyoob Kitaaba 28 - Hadiyya bible

Iyyoob Kitaaba 28

¹«Hanqo'isam kin bira hinakka'a fissakkam beyyii worqam giiranne muccussakkam beyyii yookko.

²Xaara uulliinsi hinakka'a siidakkamo; madaaba yakkam xaaram qoxxalli kina bukkakka'a fissakkamo.

³Manni tuunsi lasaanchi affeebee'e dillita'a mattamo; gambabbi tuunsiinsim bito xee'aalli kina siiddeena xillaalli baalli afeebe'e dillita'a hassamo.

⁴Manni hee'oo beyyiinsi qee'llita'a manni lokki hance'ubee'i beyyo affamo; eekke'ennem xillaalli bare hintamo; heechchinne calcalitu'uuyyi manniinsi annanni ikka'a mullam baxxamo.

⁵Uulli itakkam hurbaata mutisookko; ihukkaarem woror giirinne bukkamaa himbiriiqamukko.

⁶Cuquluusa laboo bito xee'aalli kin geejji ki'n woriinsi firookko; buchchi woronnem worqi siidamookko.

⁷Ee googooma cingiraallichchim la'ooyyo; ammachchim moo'ukkoyyo.

⁸Jor moochchi ee beyyo hance'ukkoyyo; hobbichchim ee kollinne higukkoyyo.

⁹«Manchi uulla hinaa ixxi angiinne sifo'i kina iiqookko; duunam luguminne toroshookko.

¹⁰Kina iiqaa higakkam googo axisookko; bito xee'aalli kinam siidookko.

¹¹wo'im ee kollonne daadoobee'isa qoqqobookko; uulli woronne maaxamu luwwam caakkanne fissookko.

¹²Ihukkaarem qooroom hanniinsi siidamookko? Qoossidu siidamookkok hannonnette?

¹³«Qooroom foor yoo qooccanchi hee'oo uullanne siidamooyyo; hanqo'i bito la'oo manchim bee'e.

¹⁴Cambalaq ‹Qooroom i woronne bee'e› yookko; dambalaqim ‹Qooroom i beyyonne bee'e› yookko.

¹⁵Qooroom muccur worqinne bitaa'amooyyo; bitoomim kin birinne keenamooyyo.

¹⁶Qooroom Oofii'l uulli worqiinsii aduu'n illee cuquluusaa laboo bito xee'aalli kiniinsii lobane.

¹⁷Worqii burcuqo'ii ixxenne gudooyyo; danaam worqinne baxamu mu'utinnem dabassamooyyo.

¹⁸Qooroo'm bit mastaabooxxisa belelleesoo bito xee'aalli kiniinsii ‹inqu'u› yakkam kashar kiniinsii hundiinsim lobane.

¹⁹Diqaasa laboo bito xee'aalli Tophphe'i uulli kinim ixxenne gudooyyo; lobakata muccur worqinnem ixxek bit keenamooyyo.

²⁰Eehannah qooroom hanniinsi waarookko? qoossimdu hanniinsi siidamookko?

²¹Qooroom foorinne hee'oo luwwi hundiinsim daphphaakkoohane; iima'n cii'iinsim maaxamaakkoohane.

²²Bichchii lehii ‹Sadoom xale'e macceensummo bagaa'n hore'em ixxo moo'nnummoyyo› yitamo.

²³«Qooroo'm kollonne massoo googoo hee'oo beyyoo la'ookkok xale'i Waa'a.

²⁴Mashka'oomim Waa'i uulli tochchiinsi tochchi afeebe'e hundam moo'ookko; iimaniinsi woroon yoo luwwi hundam moo'ookko;

²⁵Hafachchina malaayye uwwu ammane wo'om xuffinne keenu ammane

²⁶xeen hannonne ga'nnooda'ee gugoo banqim hinke'enne dillooda'ee ogora amadiisu ammane.

²⁷Waa'i qoorooma moo'aa lomba uwwukko; saarayyaatim qoxxisukko.

²⁸Eehanniinsim mannina ‹Qooroomaa yimmi Waa'a baddimma; qoossimmaa yimmim joriinsi qee'llimma› yaakko» yukko.