Read Hadiyya Iyyoob Kitaaba 29 Bible Online

Iyyoob Kitaaba 29 - Hadiyya bible

Iyyoob Kitaaba 29

¹Iyyoobim ixxi woshsha wocukkuuyyi

²«Kaba hee'oommi heechchi illageen Waa'i egeram hee'u amma'nnisa ihuta'n hinkaa'nna liiramam hee'ummo?

³Ee ammane tuunsi woronne taakke'ummuuyyi Waa'i ixxi caakka iina caakkisukkuuyyi caakkanne taakke'am hee'ummo.

⁴Waa'i eesee i abaroosaa ixxi hara'mmatinne egeram hee'u bikkina iina hundem luwwim wo'mmaa makkixxaa hee'ummo.

⁵Hundam xanoo Waa'i iinninne maqire hee'u bikkina i oos hundim i gadanonne hee'llo'o.

⁶I googim buurinne qufaakkoohan hee'ukko; kinanne kaasamaakkoo weeriinsim lobakat zayti firam hee'ukko.

⁷Beero'onne manni wixxoo beyyo marummuuyyi dummichchanne afuuram hee'ummi ammane;

⁸Harde'i keen eese moo'lla'a lonsimminne i illagiinsi koratitam hee'llo'o; lommannim afuutto'i beyyiinsi iimita'a eese lonsitam hee'llo'o.

⁹Atoorattam hee'llo'i minaadaphphi awwonsaan eese moo'llam ammane ixxuwwi anga suumenne ifiissa'a sa'itam hee'llo'o.

¹⁰Daannuwwim i beyyo affam ammane sa'itamo; ixxuwwi allabim karamaa mat sagaram woccamoyyo.

¹¹I bikkina macceesukkok hundim eese lonsam hee'ukko; eese moo'ukko hundim galaxxam hee'ukko.

¹²Mashka'oomim bux kee'n laachcha macceesaa ixxuwwa gatisam hee'ummo; anno'i lehu adaraar oosinam hara'mmam hee'ummo.

¹³Lehina hincita'a hee'llo'i mannim hara'mmam hee'ummi bikkina eese maasse'llam hee'llo'o; goon lehu meentinam hara'mmam hee'ummi bikkina liiranchinne zammattam hee'llo'o.

¹⁴Muccurooma eddechchisa edde'ummo; hanqo'i oogatom kaabbisa edde'am hee'ummo; horoo'l qoobe'isam issaqqam hee'ummo.

¹⁵Qooqquwwinam ille dimmeewwinam lokki hee'ummo.

¹⁶Buxina annaa la'oombee'i kee'n bikkinam fitamoommanee hee'ummo.

¹⁷Baaxiilaan kee'nneka gaangeera iiqummo; bogga'a massito'i luwwam ixxuwwi suumiinsi ubbuusisummo.

¹⁸«An ‹I umur shashsha'llisa dutaa i minenne makkixxummisam lehoommo› yaa hee'ummo.

¹⁹Hundi ammanem wo'o siidoo haqqichchi xaphisaa caaffuwwim taktakoo aashinne qufoo haqqichchisaa hee'ummo.

²⁰Hundi ammanem eese lonsakku'uuyyi hee'am hee'ummo; i malaayyim hundi ammanem haareechchi iham hee'ukko.

²¹An wocoommi ammane manni sa'aa macceesimminne i sogitano aa'am hee'ukko.

²²An wocaa lasonne wocoo manchi hee'ukkoyyo; mashka'oomim wocoommi woshshi ixxuwwika tiiro usheexxisam hee'ukko.

²³Abuullaanchi qaraax aga'n xeena siideena mixoohaannisa ixxuwwim i woshsha macceesseena suume fooqaa'lla'a egettam hee'llo'o.

²⁴An mishiqoommi ammane ixxuwwi liirantam hee'llo'o; i illi kolli caakkoo ammanem ixxuwwi illi kollim tiramam hee'ukko.

²⁵An ixxuwwina awwonsaanchisa ihaa ixxuwwika googo doo'llam hee'ummo; adil ixxi gogota awwonsoo'isam awwonsam hee'ummo; kichche'llam ammane qoxxisam hee'ummo.