Read Hadiyya Iyyoob Kitaaba 3 Bible Online

Iyyoob Kitaaba 3 - Hadiyya bible

Iyyoob Kitaaba 3

¹Eehanniinsi lasonne Iyyoob wocimma asheerukko; qaramu ballam

²«An godabonne qooccamummi hiimii qaramummi ballii duumamaakkoohan ihona.

⁴Oo balli tuunsona; iima'n Waa'im ee balla tiiroone; ee ayyaamo caakki hore'em caakkoone.

⁵Witiriichchinnee gambabbi tuunsinnee ifiisamaakkoohan ihona; ee ballika caakka duub ifiisaa tuunsona.

⁶Oo hiimim gambabbi tuunsinne ifiisamona; hiinchonne yoo ayyaammuwwiinsi matisa xigamoone; agannuwwiinsim matisa ihaa xigamoone;

⁷Oo hiim alceenni ihona; ilillaaxxi sagarim macceesamoone.

⁸Leewaataan yakkam xarakkichcho iimiimaa'llam keenii ayyaammuwwa duuntam gennaanii ee ayyaamo duuntona.

⁹Ee hiimo baqixxi boollaanki tuunsona; Caakki neeyyatim hee'oone; soodaraa'l caakkim caakkoone.

¹⁰Mashka'oomim oo hiim an iyyummi godabiinsi firaa hawwo moo'oombee'isa iyyummi godabo xufubee'i bikkinatte.

¹¹«Iyyummi godabonne hee'ummuuyyim wo'i ihaa gataammoota'nnii qaramummisam lehaammoota'nnii eran hee'ukko.

¹²Iyyumma mahinam is gubeedonne qaaphphitoda'e? Mahinam is anuuna iicissoda'e?

¹³Kaba xummam iinse'am hee'ummo; diriiraatim usheexxam hee'ummo.

¹⁴Kaba gindamaa yoo luwwa ixxuwwi gagina baxxo'i ka uulli adilluwwinnee ixxuwwi sogaaninnee maqirem diriiraa usheexxam hee'ummo.

¹⁵Ixxuwwi mine birinnee worqinnee wonshito'i daannuwwinne maqire iinse'am hee'ummo.

¹⁶Te'im waammamu ka'llesa caakka hore'em moo'ubee'i ciilisa iham hee'ummo.

¹⁷Ee beyyonne boqquwwi keen ixxuwwika jor baxo uttamo; kee'mmaalli baxo baxxam keenim usheexxitamo.

¹⁸Qeefadanto'i keenim xumma siiddamo; ixxuwwa u'nnissam kee'n shuurom macceesimmiinsi gattamo.

¹⁹Eekke'enne hoffokii lobokii mateeyyam hee'ookko; agidim ixxuwwi moollanno'iinsi wolabbanonne fittamo.

²⁰«Eehannah hawwonne hee'llam keenina caakki qaraaraalli heechcha hee'llam keenim foorinne hee'llamok mahinatte?

²¹Leho mixxam keeninaa maaxamaakkoo amaxxiinsi loboka hassa'a siiddambee'i keeninaa heechchi uwwamookkok mahinatte?

²²Waammanteena hincitam ammane liirantam keenina heechchi uwwamookkok mahinate?

²³Ixxi googi daphphukkaanninaa Waa'i googo xufu manchinaa caakki uwwamookkok mahinatte?

²⁴Kichchechchi iina hurbaaxxisa ihaakko; u'nnim xoo'oobee'i wo'isa ihaakko.

²⁵Baddummi luwwi i hanenne waaraakko; muggummi luwwim eesenne afaakko.

²⁶I woronne xale'i hawwi yoo bikkina iina xummii usheexxatii gaaga'immii bee'e» yukko.