Read Hadiyya Iyyoob Kitaaba 30 Bible Online

Iyyoob Kitaaba 30 - Hadiyya bible

Iyyoob Kitaaba 30

¹«Ihukkaarem kaba iinniinsi umuranne hoffe'llam keen i gereebbika allaachcha egeroo wishinne maqire afuuttambee'isa gadam hee'ummi kee'n oos eesenne naacantamuulla.

²Ixxuwwik malaayyi hoogakkoohanee angii wodim qaccaallaa hee'u bikkina iina maham awwaaddam hee'llo'oyyo.

³Hawwii sibaarii lophphimmiinsi ki'ukkok nac keen hee'llo'o; tuunsonne ki'lla'atim manni hee'oobee'i udma'i uulla matta'a haqqi xapha feetta'a ittam hee'llo.

⁴Haqqi woriinsim sooqixxisa xee'oo buyya feettam hee'llo'o; xee'oobee'i kitikixxi haqqi xaphim ixxuwwina hurbaat hee'ukko.

⁵Manni gamaano laachchinne holloohaannisa ixxuwwam minaadaphphi lambe'iinsi hollakkam hee'akko'o.

⁶Ixxuwwi heellamokim daawwa'annee baallennee hinamu ba'l woronnette hee'ukko.

⁷Haqqi woronnem do'llu'uuyyi bii'l moochchisa shuttam hee'llo'o; dubbi lugumonnem wixxita'a hee'llam hee'llo'o.

⁸Jiraafinne ganakku'uuyyi uulliinsi hollanto'oo keen ikko'i bikkina ixxuwwi summi bi'aa tiiro bi'lloo'oo manni ikka'a hee'llam hee'llo'o.

⁹«Ihukkaarem kaba ixxuwwi oos kaddu'uuyyi eesenne naacantamuulla; ixxuwwinam an osachchi ihaammo.

¹⁰Eese shene'lla'atim iinniinsi qee'llitamo; mayyakka baddito'nnim i illagenne anja tufitamo.

¹¹Waa'i i malaayye hoogisaa sholliisu bikkina ixxuwwi hakkamma hoorakko'i farashshisa i hanenne daabbattamuulla.

¹²I makki kollinne ijaajakka'a li'isakkoo'nnoo keen ki'llo'o; i lokkinam qaasha gudisso'o; i kululleetam kibbito'ookko.

¹³An higoommi googo ifiissa'a eese shiteena hassamuulla; eekka issimmiinsi ixxuwwa egedeena xanoo manni bee'e.

¹⁴Haraar afo'inne waaroo manchisa i hanenne waatto'o; ee gindamukkaanniinsi lambe'innem onkoroollitu'uuyyi affo'o.

¹⁵Kee'mmaalli muggi eese amadaakko; i lombim hafachchisa higaakko; i gatimmi neeyyatim duuphphisa binnaa bi'aakko.

¹⁶Hawwi eesenne lobakata lophphu bikkina i foor leh afeebe'e u'nnamaakko.

¹⁷«Hiimooma hundoomam iikki miq jabbinne u'nnamukko; xissoomim usheexxato uwwukkoyyo.

¹⁸Kee'mmaalli jabbi eesenne qoxximmiinsi ki'ukkok i eddechchi qumucce'aa bi'aakko; shamiiz kasim eese xagaraa amadaakko.

¹⁹Waa'i eese ha'l woronne ubbuusu bikkina diraa gii'l buchchaa laboommuulla.

²⁰«Waa'a! An ki kollonne laarummo; ihukkaarem at iina dabachcha uwwittoyyo; ki illagenne uullaa keese uunxummo; ihukkaarem at i kollo daba'llimma sabbitto.

²¹At daba'llitaa iina mogaalli ikkitto; kee'mmaalli ki malaayyinnem eese u'nnissitto.

²²At eese ki'issaa hafachchanne hanenne afuussitaa bararoommisa issito'o; hambu'llamim eese wonceesoo'isa issitto.

²³Foorinne yo'i mannina hundinam qoodamaakkoo lehina higissaa uwwitoo'isa la'aammo.

²⁴Hawwodamu manchi u'nnamaa agaag afona laaroo ammane hanqinam i hanenne woda ki'isookkok ayyim bee'e.

²⁵Hawwonne yo'i mannina wi'llummoyyonnihe? Bux keenindu kichche'ummoyyonnihe?

²⁶Eer luwwi ihookko yaa egerummo; ihukkaarem jor luwwi eesenne afukko; caakki firookko yaa egeronam iina balli tuunsukko.

²⁷An maham xumma siideena xanumbee'i bikkina i wodan u'nnamukko; hawwi doollim iina waarukko.

²⁸I orachchi eelliinchinnetti ihoo'n kichchechchinne heemachchukko; dummichchi lambe'enne uullaa hara'mmatina laaroommo.

²⁹Manniinsi annanni ihaa haqqo'l wengereellinnee lokkaam ammarinnee hosummo.

³⁰Iikki ha'n omachchi heemachchaa coo'amaakko; i miqim iibbi lophphimminne shokkukko;

³¹Maasiinqo'i kichchechchina lelloomman ihukko; xurumbam wi'llina fugoomman ihukko.