Read Hadiyya Iyyoob Kitaaba 31 Bible Online

Iyyoob Kitaaba 31 - Hadiyya bible

Iyyoob Kitaaba 31

¹«Baajaam landichcho mixaninne moo'oombee'isa i gaganne hidita'n sagara aagaammo.

²«Hanaan Waa'i kollinne manchi beetina qoodamu saam maruchcho? Iimanenne hee'oo hundam xanoo Waa'iinsi uwwamu sharad maruchcho?

³Baaxiilaan keenonne booban hawwoddam keenonnem bichchi afoo'is la'amaakkoohaneyyonnihe?

⁴Waa'i an baxoommi baxo hundam moo'ookko; an taakke'oommi taakkom la'ookko.

⁵«Qophphano wocaammoohan ihulasii i lokkim manna qawwiisakkam beyyina gaaggaabaakkoolasii

⁶Waa'i eese hanqo'i keenaanchonne keenona; miiqakkam luwwi bee'i manchi ihummisam la'ona.

⁷I taakki hanqo'i googiinsi korataakkoolas i illi moo'u luwwi hundam i wodan mixaakkoolas i angim baaxiilinne haashaaramaakkoolas

⁸An wixummoka mulli manni itona; iikkim mutoo luwwi hundim xoqolamaa bi'ona.

⁹I wodan mulli meentichchi iittinne qeefadamaakkoolas i beshichchi arenne edameena goocanne egeraammoolas

¹⁰i meentichcho mulli manchi hurbaata liittona; mulli mannim isenne maqire iinse'ona.

¹¹Mashka'oomim kido'i tuussiisoo baaxiil oogatoo manni beyyonne guzumo'isoohane.

¹²Ku baaxiil gii'llisa shokkiisaa bi'isoohan ihu bikkina an kaka baxaammoohan ihuta'n iina yoo amaxxi hundam bi'isam hee'ukko.

¹³«I awwaadaan ikko'i goonii meentii ixxuwwi hawwo iina kutta'a ixxuwwika hanqa boqqisaammoolas

¹⁴Waa'i eesenne oogato uwweena ki'oo ammane an maha ihoommo? Xa'mmoo ammandu ma dabachcha uwwoommo?

¹⁵Godaphphi woronne eese qooccukkok eesee i awwaadaanoo qooccukkaneyyonnihe? Neese hundam godabonne qooccukkok ixxi gagameyyonnihe?

¹⁶«Bux uunxito'i luwwa hooraa la'oommoyyo; goon lehu meentom qoxxisimma urummoyyo.

¹⁷Adaraar oos sibaattu'uuyyi an mullam hurbaata itaa garummi balli bee'e.

¹⁸Hore'em ooshshichchi hee'ummaanniinsim ki'isaa adaraar oosina annisa ihaa li'isam hee'ummo; qaramummaanniinsim ki'isaa goon lehu meentina hara'mmam hee'ummo.

¹⁹Ayyim ihuta'n eddechcha hoogaa te'im maat buxichchi manchi leexa'ooma ifiisoo'n yoohaannonne moo'aa

²⁰I gereebbi oddinne baxamu eddechcha edde'aatim eese maasse'oo'n yoolasii

²¹Dummichchi illagenne manni i woshsha macceesoo'isa la'ummi bikkina adaraar ooso hawwodeena i anga iimaa'aammoolasii

²²i cekki beyyiinsi firona; i angim tunku'llonne iiqamona.

²³Waa'ik quunqi eese muggisaakkoo bikkinaa ixxi baddisoo hibbiinsi ki'ukkok maham isseena xanummoyyo.

²⁴«I neeyyato worqannetti issaammoolas te'im muccur worqannem bakke'aammoolas

²⁵I angiinne siidummi amaxxannee goddi lophphimmannee liiramaammoohan ihulas

²⁶Eelliinchika caakki lophphimma moo'aa te'im aga'n mikmikaaxxi nuura moo'aa

²⁷I wodan maaxaqqanne qawwiisamaa eekeenina lomba uwweena i anga suunqaammoolas

²⁸Eekkamdu issaammoolas hundii lob Waa'a lagimmi ihu bikkina eesenne kee'mmaalli qixaat oogatamam hee'ukko.

²⁹«Eese sabbam kee'n ubimmanne liiramummoyyo; ixxuwwannem jor luwwi afu ammane lobakata liiramummoyyo.

³⁰I diina'i bi'llamisina duumaa baaxiilo hore'em baaxiilo baxummoyyo.

³¹I abaroos ‹Iyyoob beyyonne hurbaata goddaa itubee'ek ayyette?› yita'a naqqassamo.

³²I mine gooqqi araatina fooqaa'oommi bikkina biiranne garoo koyyiinchi hore'em hee'ukkoyyo.

³³«Hawwodummi luwwa i woronne maaxummoyyo; mulli mannisam baaxiilo daphphaa'ummoyyo.

³⁴Minaadab dutimmi baddisaatii i abaroos sabimmim eese muggisaatii minenne maaxamummi amman bee'e.

³⁵«I woshsha macceesookkoka siixxumta'n i woshshi hanqi ihukkisina mare'e hincaa'oommo; hundam xanoo Waa'i iina dabachcha uwwona; eese kasasukkokim kasasu mashka'a kitaabaa hincaa'oohaare moo'umta'n erane.

³⁶Hanqo'isam an eekka irifo'isa i gudumonne iyyam hee'ummo; lombi mare'isam i horoorenne issam hee'ummo.

³⁷Daannoom yoo manchisa Waa'i illagenne iggimminne ullaa baxummoka hundam mat matinne kuram hee'ummo.

³⁸«Manni uulla malaayyinne hooraa abuullaammoolas ixxuwwam wi'llishaammoolas

³⁹ixxuwwi uulliinsi firu hurbaata ma'lluwwam miqoo'n itaa uulli anno'ika tiiro kichche'isaammoolas

⁴⁰ee uullanne aras mutoo bikke utti so'i mutoo bikkennem bochchi mutona» yukko. Iyyoobik woshshi ka beyyonne beeddukko;