Read Hadiyya Iyyoob Kitaaba 32 Bible Online

Iyyoob Kitaaba 32 - Hadiyya bible

Iyyoob Kitaaba 32

¹Iyyoob ixxi gaga «An muccur mancho» yaa sawwitenne qoxxu bikkina oo sasem manchim Iyyoobinne woccam woshsha utto'o.

²Ihukkaarem Raam yakkam manchi abaroosiinsi Buuz uulliinsi Baaraakeel beet Eelih Iyyoob ixxi gaga waa'iinsi loboka muccuri issu bikkina lobakata quuqukko.

³Sasem Iyyoob beshim Iyyoobanne oogato uwwito'o bagaan woshshooma amma'nnisseena xantobee'i bikkina ixxuwwannem quuqukko.

⁴Eelihu'i umuranne mulli keeniinsi hoffan ihu bikkina hundim wocca'a guulliteebee'e korina Iyyoobinne woceena egeram hee'ukko.

⁵Sasem mannim Iyyoobina laboo dabachcha uwwiteena xantobee'isa moo'aa lobakata quuqukko.

⁶Buuz uulliinsi Baaraak beet Eelih «An umuranne ki'nnuwwiinsi hoffan ihummi bikkinaa ki'nnuwwim lommanni ikkakko'i bikkinaa baddaatii tuuraatii i sawwixxeka wocoo'nnim cawwaa egeraa hee'ummo.

⁷‹Lommanni gaassaa wocona; ixxuwwi umu'l doollenne siiddo'i qooroomam losissona› yaa hee'ummo.

⁸Ihukkaarem qoorooma uwwookkok mannanne hee'oo hundam xanoo Waa'i ayyaana.

⁹Mannina qoorooma uwwookkok umuranne dasimmayyo; hanqo'i woshsham qoossakkamisina hara'mmookkok umuranne lophphimmayyo.

¹⁰Ee bikkina macceessehe; an la'oommoka ki'nnuwwina kuroommo.

¹¹«Ki'nnuwwi woccakkam sagara iyyaqqimminne egeram hee'ummo; woccakkam sagaram doo'llitakkeebee'e woccakkamoka macceesam hee'ummo.

¹²Erisa macceesummo; ihukkaarem ki'nnuwwiinsi ayyim Iyyoob huushancha moo'iseena xanukkoyyo. Ki'nnuwwi lambe'iinsi ayyim ixxi woshshina laboo dabachcha uwwukkok bee'e.

¹³Ki'nnuwwi ‹Neese qoorooma siindaammo; neegareena xanookkok Waa'a bagaan mannayyo› yitakkotte.

¹⁴Iyyoob fitamukkok ki'nnuwwinnette bagaan iinninneyyo; anim ixxena ki'nnuwwaanni'nnoo dabachcha uwwoommoyyo.

¹⁵«Ixxuwwim muggita'a woccam woshshi hee'ubee'i bikkina maham wocceena xanto'oyyo.

¹⁶Oono'o, ixxuwwi woccam luwwa hoogga'a cawwita'a uullito'ookko; eehannah ixxuwwi cawwito'aare an iyyaqqaa egerimmi hasisoohonnihe?

¹⁷Eehideyyo, anim wocoommi woshshi yookko; la'ummokam kuroommo.

¹⁸Lobakata wocoommi woshshi yoo bikkina kanniinsi eehid cawweena xanoommoyyo.

¹⁹Wocoommisina kore uwwamoobee'an ihulas haareechchi woyi'n diqaasa wonshakko'i ca'nnisa xooqoommo.

²⁰Wocaa fooshshe'immi hasisookko; i suume fooqaa'aatim dabachcha uwwimmi hasisookko.

²¹Ayyenam golo'oommoyyo; ayyi manchom qawwiisoommoyyo.

²²Qawwiisimma la'oomman ihuta'n eese qooccaanchi qaqqisom bi'isam hee'ukko.