Read Hadiyya Iyyoob Kitaaba 33 Bible Online

Iyyoob Kitaaba 33 - Hadiyya bible

Iyyoob Kitaaba 33

¹«Kabadem Iyyooba, an wocoommi woshsha macceese; kiina kuroommi woshsha hundam erisa macceese.

²Kiina dabachcha uwweena gudaammo; i suumim woceena gudaakko.

³I sagar i woda'nneka xabbeenooma caakkisookko; i suumim hanqa wocookko.

⁴Waa'ik Ayyaan eese qooccukko; hundam xanoo Waa'ikim fooshshi iina foore uwwukko.

⁵«Xantoohan ihulas i woshshina dabachcha uwwe; fitantoo sagaram gudissaa i illagenne uulle.

⁶Oono'o, anii atii Waa'i illagenne gudaano; anim qooccamummok buchchiinsette.

⁷At eese baddimmi hasisooyyo; an keese wor amadeena xanoommoyyo.

⁸«Hanqo'isam an woccittoka hundam macceesaammo; ki suumiinsi firu sagaram macceesaammo.

⁹At woccittuuyyi ‹Eesenne hawwojjii miiqakkam luwwii bee'ane; baaxiiliinsim an muccura;

¹⁰Ihukkaarem Waa'i eese guzumo'eena mashka'a hasoolla; eesem ixxi diinakkichchisa xigaakko.

¹¹I lokkom gudee'l lambe'enne aagisaa amadaakko; an maroommi googo hundam moo'oolla› yitaatto.

¹²«Iyyooba, ki woshshi huushanchi ihukkisa kureena hasoommo; Waa'i manniinsi hundiinsim lophphookko.

¹³Eehannah ‹Waa'i manni woshsha macceesooyyo› yitaa Waa'anne mahina qaraattoolla?

¹⁴Manni qoossooyyo bagaan Waa'i annanni annanni googinne wocookko.

¹⁵Manni hiimo ara'anne iinse'aa kee'mmaalli diriichcho diriiroo ammane haqaawwonnee kaaltannee wocookko.

¹⁶Ee ammane manni ixxi sagara macceeisa issookko; axeeraatim muggooisa issookko.

¹⁷Ee'isenne manna jor baxiinsi dabarookko; bolxoomiinsim egerookko.

¹⁸Ixxuwwi foore waammiinsi ixxuwwi heechcham bisa'inne bi'immiinsi egerookko.

¹⁹Te'im manchi jabbaa ara'anne iinse'aa hee'ukkisam ixxi miqenne uroobee'i jabbo asse'aa axeerookko.

²⁰Ee ammane ixxena hurbaat sabisookko; xee'oo hurbaatam ihuta'n heele'isooyyo.

²¹Nacimmii ki'ukkok maar beeddaa ifiisamaa hee'u miq la'amookko.

²²Ixxi foor barenne ixxi heechchim shoo kee'n kollonne hincaakko.

²³«Ihukkaarem manchina hanqo'i googo moo'isoo'isina lambe'enne aagaatim araasseena kum Waa'i asse'amaaniinsi matoom siidamaakkoota'n

²⁴manchoomina qishixxaa ‹Ixxo gatiseena miqoommi tisso siidaammoo bikkina waammanne aagoombee'isa gatise› yookko.

²⁵Ee bikkina ixxi orachchi ciilluwwi orachchisa haareechchi ihookko; woraadda'n amma'nnesam ihookko.

²⁶Ee ammane oo manchi Waa'i kollonne uunxookko; ixxi uunatom Waa'i macceesookko; Waa'ikam illi kollo moo'aa liiramookko. Waa'im ixxo muccuroo'm beyyonne dabarookko.

²⁷Ixxim manni illagenne ‹Baaxiilo baxaammo; hanqo'i woshsham boqqisaammo; ihukkaarem Waa'i i jolle moo'ukkoyyo.

²⁸Ixxi i foore waammanne dilloobee'isa gatisaakko; oono'o an kaba foorinne hee'aa caakka moo'oommuulla› yaa zammarookko.

²⁹«Oono'o, Waa'i ka hundam dabaransaa mannina issookko.

³⁰Oohim ixxi heechchanne caakka moo'oo'isina ixxi foore lehiinsi gatisookko.

³¹«Iyyooba, kuroommi luwwa erisa macceese; an wocoommo; at sa'ihe.

³²Yitoo luwwi yoolas dabachcha uwwe; at hanqo'an ikkoo'isina hasoommi bikkina woce.

³³Oobeelas an wocoommi woshsha cawwitaa macceese; anim kiina qoorooma losisoommo» yukko.