Read Hadiyya Iyyoob Kitaaba 34 Bible Online

Iyyoob Kitaaba 34 - Hadiyya bible

Iyyoob Kitaaba 34

²Ki'nnuwwi qoolluwwi keen an wocoommi woshsha macceessehe; Ki'nnuwwi lachchi mannim erisa macceessehe.

³Allab hurbaaxxeka xee'nna annannissoohannisa maccim woshshika duuha'a annannissaa la'ookko.

⁴Hanqo'i woshsha saarayyinona; e'llookkokam maqirem lanqona.

⁵Iyyoob ‹An muccura; ihukkaarem Waa'i iina hanqa hooraakko.

⁶An hanqo'an ihummisam qophphanaanchisa xiiqqamummo; hawwodummi luwwi bee'ekam fayye'oobee'i omarinne hawwoommuulla› yaakko.

⁷«Naacancha wo'isa agookkok Iyyoobi'nno'i manchi ayyi yookko?

⁸Ixxi jora baxoo keeninne maqir ihaakko; hosookkokim jora baxxam keeninnette.

⁹‹Waa'a liiransakkeena yakimmi mannina maham awwaadooyyo› yaakko.

¹⁰«Ee bikkina ki'nnuwwi qoossitakkam keen macceessehe; jora baximmi Waa'iinsi hawwojja issimmim hundam xanoo Waa'iinsi qee'llona.

¹¹Waa'i mannina baxukkisinne dabarookko; ixxi taakkisinnem miqookko.

¹²Hanqo'isam Waa'i jora baxooyyo; hundam xanoo Waa'im manni hanqa boqqisooyyo.

¹³Uulla gassoo'isina Waa'ina daannooma uwwukkok ayyette? Uullika hundikam yabo ixxena uwwukkok ayyette?

¹⁴Ixxi manchina uwwu tiiro dabaraa massuta'n foorem ixxi kollonne wixxaa'uta'n

¹⁵Manni shumo'i hundim bi'am hee'ukko; daba'llaatim buchchi iham hee'ukko.

¹⁶Kiina qoossimmi yoohan ihulas kaka macceese; an yoommi luwwam macceese.

¹⁷Hanqo'i oogato saboo manchi manna gasseena xanoohonnihe? At Hundam xanoo muccur Waa'a baaxiilaanchi issitoohonnihe?

¹⁸Adilina ‹At awwaad bee'ane› daannam ‹At boqqa› yookkok ayyette?

¹⁹Hundim ixxi angii bax ihu bikkina Waa'i daannuwwina golo'ooyyo; goddaancho buxichchiinsi lonsaa moo'ooyyo.

²⁰Ixxuwwi luxxi baqitenne dangonnem letamo; huxe'llu'uuyyim ixxuwwi foor firookko; malaayyaammuwwim matim nakkoo'n bi'llamo.

²¹Waa'i mannika maroo googo moo'ookko; ixxi taakki hundam saarayyookko.

²²Jora baxxam keen maaxamtam gambabbi tuunsi hore'em bee'e.

²³Manchi oogatina ixxi illage hincoo'isina Waa'i jinna amadooyyo.

²⁴Ixxi matem xa'mmichchim bee'eka gassaano daannoomiinsi dilliisaa beyyonne mulli keeno uwwookko.

²⁵Ixxuwwi baxo hundam la'oo bikkina matem hiimonnem daannoomiinsi dilliisaa bi'isookko.

²⁶Baxxo'i boqqoo'm bikkina baaxiilaan keeno manni illagenne hundannem guzumo'ookko.

²⁷Mashka'oomim ixxo awwonimmiinsi laso daba'llito'ookko; ixxi ijaajom gaddo'ookko.

²⁸Buxa ciinta'a Waa'i kollonne laattamisa issito'ookko; Waa'im bux kee'nneka laachchaa macceesaakko.

²⁹«Waa'i cawwaa uruta'n ayyi aceeqaseena xanookko? Ixxi ille daphphaa'utandu ayyi moo'eena xanookko? Waa'i manniinsim minaadabiinsim lobane.

³⁰Ee'isam minaadab hundim Waa'a badditambee'i mogalli daannuwwi ixxuwwi hanenne gassaan ikkambee'isa issiteena xantamoyyi hee'llo'o.

³¹«Mat manchi Waa'ina ‹An baaxiilaancho; ihukkaarem kanniinsi eehid baaxiilo baxoommoyyo;

³²Baxummi baaxiilim hinkan ihuda'ee losise; baaxiilo baxaammoolasim od baxoommoyyo› yuta'n erane.

³³Eehannah at baaxiilo biira yimma sabbittisam Waa'i ki mixa'nneka wonshoo'isina hassoohonnihe? Doo'llitoottok atette bagaan aneyyo; ee bikkina at laqqoottoka iina kure.

³⁴«Qoossimmi yoo manni iina ka'isa yitamo; i woshsha macceessam qoor keenim

³⁵‹Iyyoob wocoo woshshanne lachchi bee'ane; ixxi sagarannem qoossimmi hanqataakkoohane› yitamo.

³⁶Iyyoob boqqi mannaanni'nno'i dabachcha dabaraakkoo bikkina mahina lasaanchi afeebe'e keenanchanne aagooyyo?

³⁷Ni lambe'enne seer bee'isa ihimminnee Waa'annem gadimma lonsimminnee Iyyoob ixxi baaxiilonne boqqooma edaakko» yukko.