Read Hadiyya Iyyoob Kitaaba 35 Bible Online

Iyyoob Kitaaba 35 - Hadiyya bible

Iyyoob Kitaaba 35

²«Iyyooba, ‹An Waa'i illagenne muccura› yitaa woccoo'is eranennihe?

³At ‹Baaxiilo baxumbee'i bikkna an maha siidaate? Tirfixxoommi luwwidu mah hee'aate?› yitaa xa'mmitaatto.

⁴Kaba an kiinaa kiinninne maqire yo'i beshinaa dabachcha uwwoommo.

⁵«Xabbitaa iimane moo'e; kiinnii hanaan moo'a'moo duuba erisa moo'e.

⁶Baaxiilo baxxittaare Waa'a mahinne hawwoddootto? Hawwojja lonsitaadu ixxo maha issitootto?

⁷Muccur ikkittaare Waa'ina maha uwwitootto? Ki angiinsidu ixxi maha aa'ookko?

⁸Ki boqqoom hawwodookkok xale'i kiinni'nnoo mancho; ki muccuroomim awwaadookkok xale'i manninatte.

⁹Manni ciimamimmi lophphimmiinsi ki'ukkok laarookko; malaayyaam kee'n angiinsim firimmina hara'mmato siiddeena laachcha hincaa'ookko.

¹⁰Ihukkaarem ixxuwwiinsi matim ‹Hiimonne egeroo qooccaanchi Waa'i hannonnette?› yaa xa'mmooyyo.

¹¹Fooraam diinatiinsi loboka neese losisukkok cii'iinsim loboka qoolluwwi issukkok ixxotte.

¹²Ixxuwwi Waa'i kollonne laattamo; ihukkaarem ixxi ixxuwwi jolliinsii bolxoomiinsii ki'ukkok ixxuwwina dabachcha uwwooyyo.

¹³Hanqo'isam Waa'i wodaniinsi ihubee'i laachcha macceesooyyo; hundam xanoo Waa'im ee kollo moo'ooyyo.

¹⁴«Iyyooba, at maham Waa'a moo'oommoyyo yititta'nnim ki quux ixxi illagennetti ihu bikkina iyyaqqimminne ixxo egerimmi hasisookko.

¹⁵Ee'isam Waa'i ixxi quunqinne guzumo'oobee'eka mannikam jolle kora'isam higookkoka labissaatennihe?

¹⁶Iyyooba, at kora'i woshsha woccoolla; lachbee'i sagaram lonsitoolla» yukko.