Read Hadiyya Iyyoob Kitaaba 36 Bible Online

Iyyoob Kitaaba 36 - Hadiyya bible

Iyyoob Kitaaba 36

¹Odim Eeliihu'i

²«Waa'i bikkenne ihaa wocoommi luwwi yoo bikkina hofqaxam iyyaqqe.

³Waa'iinsi siidummi lachchinne eese qooccu Waa'i muccur ihukkisa kiina kuroommo.

⁴Hanqo'isam i woshshi qophphan bee'ane; kiinninne wocoommi iina wo'm lachchi yoo'isa la'e.

⁵Waa'i malaayyaamo; ayyem gadooyyo; ixxi qoossaa la'immanne malaayyaamo.

⁶Waa'i boqqi keeno foorinne hee'llamisa issooyyo; ihukkaarem wor amadanto'i keenina hanqa oogatookko.

⁷Waa'i muccur manna joriinsi egerookko; adilluwwinne maqirem adilla'n barcumanne afuussookko; heer heerinam iimiimaa'ookko.

⁸Ihukkaarem ixxuwwi chimchiminne karantota'n hawwi qaash woronnem amadantota'n

⁹ixxuwwi iggimminne baxxo'i baaxiilo caakkisaa moo'isookko.

¹⁰Ixxuwwika macce axeerimma macceessamisina fooqaa'ookko; jor baxiinsim daba'llitamisina ijaajookko.

¹¹Waa'ina ijaajanto'aaree ixxenam awwaaddo'aaree gatu umu'l doolle makkinnee liiranchinnee higissamo.

¹²Ihukkaarem macceessobeelas bisa'inne bi'llamo; lachchi bee'ekam letamo.

¹³«Ixxuwwi wodanonne Waa'iinsi qee'llito'i keen hundi ammanem quuqqo'isam hee'llamo; guzumo'uta'nnim hara'mmoo'isina Waa'i kollonne laattamoyyo.

¹⁴Goon gooninne baxxam haashaaranchinne harde'oommanonnem letamo.

¹⁵Ihukkaarem Waa'i u'nnanne hee'llam keeno gatisookko; afu hawwi woronnem ixxuwwina losano uwwookko.

¹⁶«Kaba keese Waa'i hawwiinsi fissaa u'n bee'i haraar beyyonnee er hurbaatim wo'mmaakkoo maaddi yoo beyyonnee fissookko.

¹⁷Ihukkaarem kaba keesenne boqqi keenonne afoo oogat afu bikkina laboo qixaato aa'immanne yoonto.

¹⁸Keese goddi qawwiisoo bee'isa maqanxim keese huushisoobee'isa ege'lle.

¹⁹Kiina yoo goddii ki malaayyik wodii hundim at hawwonne aaggoobee'isa hara'mmeena xanoohonnihe?

²⁰Minaadab ixxuwwi beyyiinsi bi'llam tuunsi amman waaroo'isina mixxitte.

²¹At hawwonne keenantoottok ka mashka'innetti ihu bikkina daba'llitaa jolla baxxoobee'isa ege'lle.

²²Oono'o, Waa'i ixxi malaayyinne iimiimaakko; ixxe'nnoo losisaanchidu ayyette?

²³Waa'ina ‹Kaka baxe› yaa ijaajookkok te'im ‹At jor baxo baxxaatto› yeena xanookkok ayyette?

²⁴Manni hundi ammanem Waa'ika baxo mazmuurinne galaxxitamisam atim ixxi baxo mazmuurinne galaxxe.

²⁵Manni hundim Waa'ika baxo moo'aakko; ihukkaarem moo'ookkokoom qee'llonnette.

²⁶Waa'ika hundiinsi lobaannooma saarayyinaa lanqeena xannoommoyyo. ixxi umu'llekam xigo la'ookkok bee'e.

²⁷«Waa'i wo'o iim hooraa goolle'oo'isa issookko; iimaniinsim dabaraa xeen ihaa ga'nnoo'isa issookko.

²⁸Duubiinsi xeen ga'nnookko; manni hanennem lobakata dillookko.

²⁹Waa'i duuba biddiqaa'oo'isaa ixxi gatti beyyonne ihaatim xee'n guqqi woronne hinkid wocooda'ee ayyi qoosseena xanookko?

³⁰Oono'o, Waa'i ixxi kululleetanne banqa biddiqaa'ookko; dambalaqikam xillaallooma ifiisookko.

³¹Ee'isenne Waa'i minaadaba gassookko; hurbaatam lobakatisa uwwookko.

³²Banqa ixxi anganne amadookko; aphphiseena gudisu xabbeena beyyo maroo'isinam ijaajookko.

³³Gug malaayyaam xeen waarukkisa moo'isookko; fooraam diinatim wiisho'i waarukkisa la'ookko.