Read Hadiyya Iyyoob Kitaaba 37 Bible Online

Iyyoob Kitaaba 37 - Hadiyya bible

Iyyoob Kitaaba 37

¹«Ee wiisho'i malaayyinnem i wodan baa'ukko; baddimminnem batbatukko.

²Ixxi saga'lleka guga macceessehe; suumiinsi firoo toximmam macceessehe.

³Ixxi banqa iimaniinsi aad hundem beyyonnem belelleesookko; uulli tochchi afeebe'em asse'ookko.

⁴Eehanniinsi lasonne ixxeka malaayyaam sagara toxisookko; baddisoo sagaram guqqisa macceesisookko; banqikam belellaato edaa, edaa moo'isookko; hibbaam sagarinnem guga macceesisookko; ixxi sagara macceesisoo ammane banqa egedooyyo.

⁵Waa'i maalalsiisoo'isinne guga macceesisookko; neese lanqeena xannoombee'i lob luwwam issookko.

⁶Barad uullanne uboo'isa issookko; malaayyaam xeenim ga'nnoo'isina ijaajookko.

⁷Ixxi qooccu manni hundim ixxi baxo laqqamisina manni hundim baxo baxxambee'isa issookko.

⁸Ee ammane doo'm woro'l moochchi gibba'a maaxamtam ma'nnanne aaggamo; baalli woronnem maaxamtamo.

⁹Hambu'llam hafachchi woroo'n qarinne ki'ookko; qiidaam hafachchim hanaa'n qarinne waarookko.

¹⁰Waa'ik fooshshi wo'o hadaddi issookko; baradam issookko.

¹¹Duub wo'o iyyoo'isa issookko; banqim woronne belelle'oo'isa issookko.

¹²Duub Waa'i ijaajo wonsheena ixxi awwonsinne uulli kululleetanne hundannem do'ookko.

¹³Waa'i xeena ga'nnisookkok uulla qufiseena te'im manna guzumo'eena te'im ixxi iitto moo'iseenatte.

¹⁴«Iyyooba, hino'o, kaka macceese; giphitaatim Waa'ika maalalsiisoo mare'e sawwihe.

¹⁵Waa'i duuba hinkid ijaajooda'e banqam hinkid belelleesooda'ee laqqoohonnihe?

¹⁶Duuba iimanenne chabbaa'ookkoka lachchanne muccur ihaakkoo Waa'ika maalalsiisoo mare'e laqqoohonnihe?

¹⁷Woroo'n qarinne yoo hafachchi uulla gokkisoohaare at malaayyaam iibbinne u'nnantootto bagaan hore'em kaka laqqooyyo.

¹⁸Iimane Waa'i bukkamaakkoo naas xaarinne baxamu mastaabooxxisa biddiqaa'oo ammane at ixxi gadanonne ikkaa hara'mmimma xantoohonnihe?

¹⁹Neese tuunsiinsi ki'ukkok seerinne wocimma lanqqoombee'i bikkina woncoommi luwwa losise.

²⁰An woceena hasummisa Waa'ina kurimmi hasisoohonnihe? Bi'eena hasaa xa'mmoo manchi yoohonnihe?

²¹«Hafachchi iimanenne yoo duuba fii'aa hooraa lasage ayyim eelliinchi caakka moo'eena xanooyyo.

²²Hanaa'n qarinne worqa loboo lombinne caakki firookko; Waa'i baddisoo hibbinne waarookko.

²³Hundam xanoo Waa'i ni sawwitiinsi hanaanette; ixxi malaayyinnee oogatinnee lobane; ixxek muccuroom lobakata; ayyem wor amadooyyo.

²⁴Ixxuwwi sawwitenne ‹Neese qoolluwwa› yitam keeno gadoo bikkina manni hundim ixxo baddookko» yukko.