Read Hadiyya Iyyoob Kitaaba 38 Bible Online

Iyyoob Kitaaba 38 - Hadiyya bible

Iyyoob Kitaaba 38

¹Ee lasage Waa'i hambu'llam hafachchi woronne ihaa Iyyoobina

²«Lachchi hanqataakkoo awwaad bee'i woshshinne i sogitano sholliisookkok ayyette?

³Hino'o, qoxar ikkaattoolas xabbitaa uullitaa an xa'mmoommi xa'mmichchina dabachcha uwwe.

⁴An uulluulla qooccummi ammane at hannonne hee'llitto? Laqqoo luwwi yoolas hino'o, iina kure.

⁵Laqqoohan ihulas uullika qaxooma qoodukkok ayyette? uulli hanennem keenakkam heechcho biddiqaa'ukkok ayyette?

⁶Uullika utubbuwwa qoxxisaa amadu malaayyi maruwwa? Lamejjika kina uullisukkodu ayyette?

⁷Soodaraa'l boollanki mateeyyanne zammattu'uuyyi i asse'amaan hundim ilil yitu'uuyyi at hannonne hee'llitto?

⁸«Dambalaq uulli woriinsi xooqaa firu ammane firu gooca xufukkok ayyette?

⁹Duuba dambalaqina eddechchisa issummok gambabbaakkoo tuunsinnem ifiisummok anette.

¹⁰Dambalaqina gabala qoodummok xufii laqqo'im hee'oo'isa issummok anette.

¹¹‹Ka beyyi afeebe'e waattootto; kanniinsim higgooyyo; kiikkim malaayyaam hambu'llam keyyenne uullona› yummok anette.

¹²Iyyooba, ki heechchi doollenne hundannem soodaraar dara ijaajjaa laqqoohonnihe? Soodaraa'l caakkinam beyyo gudissaatennihe?

¹³Soodanni uullanne hanenne caakkisoo'isina boqqi mannam maaxamto'i beyyonne moo'isoo'isina ijaajo uwwitaa laqqoohonnihe?

¹⁴Uullik hagar haranne koobakko'i luwwisa dabassamookko; hagaroomim qinxaa'akko'i eddechchisa caakkaa moo'amookko.

¹⁵Boqqi kee'n caakki hooramaakko; jora baxxeena iimaa'llo'i angim iiqamaakko.

¹⁶«Dambalaq lugumo dillitaatennihe? Te'im cambalaq xillaalloo'm lugumodu taakke'antaatennihe?

¹⁷Lehik gooccuwwi kiina moo'amaatennihe? Gambabbi tuunsika xufa moo'llaatennihe?

¹⁸Uullik haraaroom hinkaa'nda'ee laqqoohonnihe? Ka hundam laqqoolas iina kure.

¹⁹«Caakki hee'oo beyyo massoo goog hinkane? Tuunsi hee'oo beydu laqqoohonnihe?

²⁰Ixxuwwi gattam beyyo massiteena xantoohonnihe? Ixxuwwika heechchi beyyo massoo googdu laqqoohonnihe?

²¹Ee ammane qarantaa hee'llitti bikkina ki umu'llekim xig lobakat ihu bikkina hanqo'isam at laqqoo'n uttooyyo.

²²«Barad dissamoo beyyo aaggaatennihe? Te'im dissamu baraxxi tuubba moo'llaatennihe?

²³Oohim hawwi ammanina awwaaxxeena orameenaa qaxxameenaa dissaammoohane.

²⁴Caakki baxxamamoo beyyo massoo googii eelliinchi firoo kolli hafachchim binnoo beyyo massoo googii hinkane?

²⁵«Xeenina dilloo googo gudisukkok guginam googo axisukkok ayyette?

²⁶Ee'isam ayyim hee'oobee'i uullanne manni hee'oobee'i udma'i uullanne

²⁷xeen ga'nnoo'isa issookkok ayyette? udma'i ihu gogaalli uullam qufisaa hix mutoo'isa issukkok ayyette?

²⁸Xeenaa qiibataa uwwukkok ayyette?

²⁹Baradii hadaddim hee'oo'isa issukkok ayyette?

³⁰Hadaddi wo'o ki'nnesa qoxxisookko; dambalaqikim lugum baraxxesa gi'inoo'isa issookko.

³¹« ‹Philiyaadiis› yakkam boollaanka mat issitaa katteena xantoohonnihe? Te'im ‹Ooriyoon› yakkam boollaanki amaxxamu usa mutteena xantoohonnihe?

³²‹Maazaaroot› yakkam boollaanki wixxite ammaninne firoo'isa issiteena te'im ‹Dibba› yakkam boollaanka ixxi oosinne maqirem awwonsiteena xantoohonnihe?

³³Iima'nneka gatti ogora laqqoohonnihe? Oo gatti ogor uullannem baxoo'isa issiteena xantoohonnihe?

³⁴«Lobakat xeena kiina ga'nnisoo'isina sagara iimaa'llaa duuba ijaajjeena xantoohonnihe?

³⁵Banqi kiina ‹Oono'o, an keyyenne yoommo› yoo'isina banqa beleloo'isa issiteena xantoohonnihe?

³⁶Wodanina qoorooma horoorinam qoossimma uwwukkok ayyette?

³⁷Ixxi qooroominne duuba xigeena xanookkok ayyette? wixxu buchchi qufaa har ihoo'isina iima'n wo'i wixxoo beyyiinsi aad duneena xanookkok ayyette?

³⁹Doo'm woronne dufaatii dugukkuuyyii yoo meentichchi hobbichchina hochchitaa eebbeena xantoohonnihe? sibaaru hobbi wotallindu itissaa goddisseena xantoohonnihe?

⁴¹Qooraantik ciicoolli hurbaata hoogaa i kollonne laarukkuuyyi hurbaata uwwookkok ayyette?