Read Hadiyya Iyyoob Kitaaba 39 Bible Online

Iyyoob Kitaaba 39 - Hadiyya bible

Iyyoob Kitaaba 39

¹«Saaro'i qaroo ammane laqqoohonnihe? Gaallichdu foo'llaa qarukkuuyyi moo'llaatennihe?

²Gubannanonne mee'i agana afooda'ee hinki ammane qarooda'ee laqqoohonnihe?

³Wotara gii'mmaa qarookkokii u'nnisoo foo'llimmiinsim usheexxookkokii hinki ammanda'e laqqoohonnihe.

⁴Wotalli biir uullanne li'aa qoxxookko; annanni ihaatim marookko; la'mmaaggem am beyyo daba'llooyyo.

⁵Bii'l hallina wolabbano uwwukkok ayyette? karatiinsim tirukkok ayyette?

⁶Udma'i uulla ixxuwwina heechchi beyyi issaa sooqidaamm uullam gatti beyyi issaa uwwummo;

⁷Ixxuwwi corochchi lophphaakkoo beero'uwwiinsi qee'llita'a hee'llamo; ixxuwwi lasonne shuurukkuuyyi ushee'oo manni hee'ooyyo.

⁸Duunnuwwanne hundannem allaa'llitamo; latu luwwi hundam itteena hassamo.

⁹«Boobichchi kiina awwaadeena ijaajamoohonnihe? Ki gaadirandu gareena xanoohonnihe?

¹⁰Boobichcho abuulloo'isina qaashshoohonnihe? Te'im ki laso awwonukkuuydu abuulli woro'l dimara iiqoohonnihe?

¹¹Ixxek malaayyi loban ihu bikkina ixxonne bakke'lloohonnihe? Kiikka kee'mmaalli baxdu ixxonne fatakitoohonnihe?

¹²Ki beyyo daba'llaa waaraa hurbaata wixxaa'aa oodo'onne eebaa aagisoo'isaa amma'nnitoohonnihe?

¹³Sagoon yakkam lokkaam ammachchi lado qaqqisaa biddiqaa'ookko; ihukkaarem qadaalli qeeraa'l ammachchisa bararooyyo.

¹⁴‹Sagoon› yakkam ammachchi uullanne quunqa quunqe'ookko; buchchannem qaaphphaa iibboo'isa issookko.

¹⁵Eekkeen higoo manni lokkinne iiqoo'isaa udma'anne hee'oo moochchim hancaacoo'isaa sawwooyyo.

¹⁶Ciicoolli ixxan ihubee'aannisa issaa mogookko; badallat hundim kora'a gatuta'nnim mahannem xigooyyo.

¹⁷Ee'isa qooroom hee'oobee'isa issummokii lachcha hoorummokii anette.

¹⁸Ihukkaarem geereena lado iimaa'oo ammane farashshii farashshaanchii ixxenne xoreexxanteena yakitota'n ixxuwwanne osarookko.

¹⁹«Iyyooba, faradina malaayye uwwittok gaanjem qeeraa'l gamminne wereeggissittok atettennihe?

²⁰Qawwaawwisa xophitu'uuyyi korooximminne manna muggissamisa issitoottok atettennihe?

²¹Faradoom o'l biira saa'llakka'a marakku'uuyyi ixxuwwi gaqqi malaayyenne bakke'lla'a cebbanne saggaattamo.

²²Baddimma hore'em laqqamoyyo; ma'lluwwannem muggitamoyyo; bisa'inne xeephakkota'nnim laso daba'llitamoyyo.

²³Ixxuwwa jigissam o'l manni amaddo'i o'l mu'ut eelliinchonne belelleesukkuuyyi chalchayye'ukkuuyyi macceessamo.

²⁴Xurumbi sagara macceessam ammane u'nnanta'a mogaalloominnee quunqinnee o'l beyyo jiggamo.

²⁵Xurumbi sagara macceessam ammane liiranchinne korooxxamo; qee'llonnem o'lleka fooshsha laqqamo; gaaxxi awwonsaa'n ijaajoo o'l gogoxxi sharoo macceessamo.

²⁶Hanqo'isam cingiraallichchi bararookkok ladom woroo'n qaranne hooraa biddiqaa'ookkok ki qooroominnettennihe?

²⁷Gaaqichchi iim firookkok do'nnam duu'n ludonne baxookkok ki ijaajinnettennihe?

²⁸Gaaqichchi baalli gaanganne do'nna baxaa hee'ookko; ki'n farqaqim ixxena girbi ihookko.

²⁹Eekke'enne ihaa itoo luwwa amadeena dugookko; ixxi illim qee'llonne yoo luwwa qoossaa la'ookko.

³⁰Ee'isinne ixxi lehu luwwi yoo beyyonne hee'ookko; ixxi ciicoollim xiiga agookko» yukko.