Read Hadiyya Iyyoob Kitaaba 4 Bible Online

Iyyoob Kitaaba 4 - Hadiyya bible

Iyyoob Kitaaba 4

¹Teemaan uulli Eel faazim dabaraa

²«Iyyooba, mat manchi iggaa kiinninne atooraruta'n iyyaqqimminne macceessoohonnihe? Ihukkaarem wocimma urookkok ayyim bee'e.

³At lobakat manna losissaatto; hoogu angiuwwam qaxxissaatto.

⁴Ki sagar qolamu keeno bakkiisam hee'ukko; tartaroo malaayyuwwam qoxxisam hee'ukko.

⁵Ihukkaarem kaba hawwi keesenne afu bikkina at neeyyat bee'i manchi ikkaatto; hawwi keesenne qoxxu bikkinam neeyyato muttaatto.

⁶Waa'a baddimmanne amma'nnantaattoohanee baxxootti xabbeen baxonne neeyyat issitaattoohanee hee'llittoyyonnihe?

⁷Hino'o, sawwihe; muccur manchonne hawwi afaa xabbeen manchim bi'aa moo'llaatennihe?

⁸An moo'ummisannetti ihulas jollika abuulla abuullita'a hantaarom sire'isa wixxam keen ee wixxo'okam wixxaa'llamo.

⁹Oo keen Waa'aanninne fooshshinne bi'llamo; ixxi quunqi iibbinnem beedditamo.

¹⁰Jor keen hobbichchisa toxxamo; sagara iimaa'lla'ahim shuuttamo; ihukkaarem Waa'i ixxuwwika inqe iiqookko.

¹¹Hobbichchi hochchaa itoo luwwa hoogaa lehoohaannisa; ee hobbichchi wotallim binnoohaannisa; ixxuwwi oosim binnitamo.

¹²«Ayyaamiinsi mat ayyaamo mat assi maaxaqqanne i beyyo waarukko; ee assom hashaashshanchi sagarinne macceesummo;

¹³Manna kee'mmaalli diriichchi amadoo ammanee u'nnisoo baqixxi ajuutto'i ammanennee

¹⁴baachchii huxechchii eese amadaa iikka miqe huxiisukko.

¹⁵Hafachchi hafachchaa i illaginne higukko; muggiinsi ki'ukkokim i orachchik oddi uullukko.

¹⁶Eekke'ennem mat luwwi uullaakkoohaannonne moo'ummo; xiniinsaa moo'ummaarem mada'e ihukkisa la'eena xanummoyyo; eehanniinsi lasonne matem sagarim bee'i beyyinne

¹⁷‹Waa'i illagenne muccur ihaa siidamoo manchi yoohonnihe? Te'im qooccaanchi illagenne muccur manchi siidamohonnihe?

¹⁸Waa'i ixxi awwaadaano amma'nnoobee'an ihulas ixxi asse'amaanonnem huushancha siidoohan ihulas

¹⁹Eehannah oor itoo'nnim gindamoohaannonnee ixxi shooho'im buchchi ihoo manchonnee buchchinne baxamu minenne hee'oo manchonne Waa'i hinkid amma'nnamookko?

²⁰Darinne fayya'i hee'u manchi hiim afoo'nnim dangonnem lehookko; heer heerinam xadamaa gatookko.

²¹Xiribbi xoqolamu dukkaa'nnisa qoorooma siiddoo'nnim letamo.