Read Hadiyya Iyyoob Kitaaba 40 Bible Online

Iyyoob Kitaaba 40 - Hadiyya bible

Iyyoob Kitaaba 40

¹Odim Waa'i Iyyoobina

²«Iyyooba, hundam xanoo Waa'inne fitamaa neegaroo manchi hee'oonnihe? iinninne maqire fitantoollak atettem ikki bikkina hino'o, iina dabachcha uwwe» yukko.

³Iyyoobim dabaraa

⁴«I Moollanna, an mahinam awwaad bee'i mancho; kanniinsi eehid i anga suumenne ifiixxaa cawwoommo bagaan kiina dabaroommi dabachchi bee'e.

⁵Mat kore te'im lam kore wocaammo; eehannah kanniinsi eehid maham wocoommoyyo» yukko.

⁶Eehanniinsi lasonne Waa'i hambu'llam hafachchi woronne ihaa Iyyoobina.

⁷«Hino'o, kaba goonchisa ikkaa ki lamado lade'e; an xa'mmoommi xa'mmichchinam dabachcha uwwe.

⁸Hanqinam eese oogato boqqisummaannisanne issitaa ki gaga muccur issimminne eese huushammaanchi issiteena yakitoollannihe?

⁹Iihaanni'nnoo'i wod kiina yoohonnihe? ki sagardu iihaannisa gugoohanennihe?

¹⁰Eehidette ihulas ki gaga hibbinnee nuurinnee gunguusse; lombaa sadoo edde'e.

¹¹Bolxitam keeno moo'llaa sholliise; ki quunqam ixxuwwanne isse.

¹²Ixxuwwa hundam qoossitaa moo'llaa tuussiise; boqquwwi keenom yo'i beyyonne bi'ise.

¹³Ixxuwwa hundam mat issitaa buchchanne waamme; ixxuwwam dillissaa waammi woronne kare.

¹⁴Anim ee ammane at ki malaayyinne ki gaga gatixxiteena xantoohaannooma naqqasoommo.

¹⁵«Oono'o, an keese qoocummisam loobichchom qooccaammo; loobichchim mirgo'isa hixe itookko.

¹⁶Ixxekim wod lamadonnette; malaayyikim bu'an godaphphi woronnette.

¹⁷Sheerimo hoo'm haqqichchisa heekkeesookko; gubeexxi bu'anim xaxamaakkoohane;

¹⁸Miq naas xaa'llisa; orachchim xaa'l biccisa qoxxaalla.

¹⁹«Ixxi an qooccummi luwwi hundiinsim malaayyaamo; ixxo iinniinsi bagaan kaa'eena xanookkok bee'e.

²⁰Doo'm woro'l moochchi daabbaroo duunnuwwi ixxena itoo luwwa mutisookko.

²¹Wo'i gammalanne li'oo haqqi hafannee shophe'i woronne leendi lambe'ennee gii'mmookko.

²²Haf yoo haqqim ixxo maaxookko; daajji gammalanne li'oo ‹Ahaaya› yakkam haqqim ixxo daphphaa'ookko.

²³daajjik wo'i wo'mmuta'nnim ixxi hore'em muggooyyo; yoordaanoos daajji selelaa wo'mmuta'nnim baa'ooyyo.

²⁴Loobichchika ille ifiissaa amaddeenaa qaashshaa sane luffeenaa xantoohonnihe?