Read Hadiyya Iyyoob Kitaaba 41 Bible Online

Iyyoob Kitaaba 41 - Hadiyya bible

Iyyoob Kitaaba 41

¹«Dambalaq woronne hee'oo Leewaataana yakkam mochchichcho qaashinne amaddaa fissiteena te'im ixxi allabo usinne katteena xantoohonnihe?

²Guma'a ixxi sanenne issiteena te'im ixxi xabano hookko'inne qassaa hixixaa'lleena xantoohonnihe?

³Oo moochchichchi qishixxitoo'isina keese uunxoohonnihe? Er sagaridu wocoohonnihe?

⁴Heer heerina ki awwaadaanchi iheena kiinni maqire hidi'l sagara aagoohonnihe?

⁵Cii'isa losissaa ixxenne maqire lelliteena xantoohonnihe? Te'im ki mi'n awwaadaan landi lelloo'isina kattoohonnihe?

⁶Qurxumme'i daddaraan bitaa'lleena fissiixxantamonnihe? Muransita'adu baxxansitamonnihe?

⁷Omachchonne bilxo'o kaasseenaa horoorem bagadinne qasseenaa xantoohonnihe?

⁸Hino'o, mataagge ixxo anginne nakke; ixxenne maqire gubbantoo gubbancha hore'em xaddooyyo; la'mmaagge ixxenne maqire gubbantooyyo.

⁹«Leewaataana yakkam moochchichchinne gubbamakka'a kaa'nnoommo yimmi barche'e; ixxo moo'ukkok hundim baddaa huxe'ookko.

¹⁰Ixxo gii'mmu beyyiinsi ki'isimmi eehaa'nna kee'mmaalli ihulas iinninne uullixxameena iggookkok ayyette?

¹¹Iimaniinsi woroon yoo luwwi hundim iihane; eehannah dabaraa miqoommisina iina liqaayyisukkok ayyette.

¹²«Leewaataana yakkam moochchichchi lokki bikkinaa malaayyi bikkinaa mishisoo orachchi bikkinaa wocimma uroommoyyo.

¹³Gumu'llaalli ihaakkoo omachchom haniinsi coo'eena xanookkokii qafaam gaangee'l lambe'edu hakkamma isseena xanookkokii ayyette?

¹⁴Lobakata baddisoo inqi wo'mmaakkoo ixxi suume fooqaa'eena xanookkok ayyette?

¹⁵Afarenne yoo omachchi madadam gixamu agi'llesa; lobakata xammammaa amaxxamaakkoohan ihu bikkina xaari'nnoo'i qoxxaalla.

¹⁶Lobakata amaxxamaakkoohan ihu bikkina lambe'inne hafachchim ihuta'n higeena xanooyyo;

¹⁷Hundim mat mullaanninne ixxina'i ixxim amaxxamaakkoo bikkina hore'em mahim annanni isseena xanooyyo.

¹⁸Leewaataan haxirshuhoo ammane caakki belecce'ookko; ixxi illim soodaraa'l caakkisa caakkisookko.

¹⁹Ixxaanniinsi suumiinsi gii'l laban firookko; gii'l xoxanqim finxirukkuuyyi moo'amookko.

²⁰Shomboqo'i giiranne kaasakko'i qure'iinsi firoo goollisa ixxi saniinsi wiriir firookko.

²¹Ixxi fooshshik iibbi gixillo'o xanqisookko; gii'llekim laban ixxi suumiinsi firookko.

²²Ixxek malaayyi axonnette; illi kollonne yoo hibbim lobakata baddisoohane.

²³Ixxek maar hananenne tuubamaa amaxxamaakkoohan ihu bikkina ixxek orachchi mikmikoobee'i qaxa qooxxaalla.

²⁴Ixxek wodan kini'nnoo'i qoxxaalla; qoxxaalloomim liitimmi kini'nnoo'ane.

²⁵Ku moochchichchi ki'oo ammane malaayyaammuwwam ikkota'n baddimminne batbatitamo.

²⁶Bisa'ii bagadii xiyyii bilxo'ii qasuta'nnim hore'em kaa'amooyyo.

²⁷Ixxi xaara maqisa iiqookko; naas xaaram buutumbuutu haqqisa iiqansookko.

²⁸Ixxi xiyya baddaa gibooyyo; yanbarshe'inne darabakkam kinim ixxena bura'isa.

²⁹Mugam bura'isa xigookko; ixxonne bagado darabakkota'nnim gadaa osarookko.

³⁰Godaphphi kolli muroo gala'i'nnoohane; hurbaata ganakkam mu'uxxisam haranne hanenne haxara muraa higookko.

³¹Dambalaq lugumo qure'i woronne hufu wo'isa issookko; bilqaaxanne yoo shitto'isam issookko.

³²Ixxi higoo googo caakkisookko; dambalaq wo'im himboo'isa issookko.

³³Baddimmi bee'i qooccanchi ixxe'nnookkok uullanne hore'em bee'e.

³⁴Lobakata lob qooccanchuwwam ihuta'n gadookko; ixxi mochchi hundinam adila» yukko.