Read Hadiyya Iyyoob Kitaaba 42 Bible Online

Iyyoob Kitaaba 42 - Hadiyya bible

Iyyoob Kitaaba 42

¹Ee lasage Iyyoob Waa'ina dabaraa

²«Waa'a! At hundi luwwam issiteena xantoohan ikkittisaa ki sawwitem laso dabareena xanookkok ayyim bee'an ihukkisaa la'ummo.

³‹Lachchi bee'eka sogitano maaxeena xanookkok ayyette?› yitaa xa'mmitaa hee'lltto. hanqo'isam an iina aagubee'i woshsha la'oombee'ekaa qoosseena xanoombee'i maalalsiisoo woshshaa wocaammo.

⁴Atim eese ‹An xa'mmoommi xa'mmichcha macceessaa dabachcha uwwe› yitaatto.

⁵An kabee'i afeebe'e ki bikkina manni wocukkoka xale'e macceesaa hee'ummo; ihukkaarem kaba an i illinnem keese moo'ummo.

⁶Ee bikkina an i gaga gadaammo; gii'l buchchannee dirannee afuuraa baaxiilo biiraa yoommo» yukko.

⁷Waa'i Iyyoobinne maqire ka woshsha wocaa lasonne Teemaan uulli manchi Eel faazina «Ki'nnuwwi i awwaadaanchi Iyyoobisa i bikkina hanqo'i woshsha woccakkobee'i bikkina an keesennee lamem ki beshannee lobakata quuqaammo.

⁸Ee bikkina kaba lamar baa'l moolluwwaa lamar gereebbi ambulluwwaa amaddakka'a iina awwaadaanchi ihu Iyyoob beyyo mallehe; ki'nnuwwi baaxii'l bikkinam shokkiisakka'a hincaa'akkam kitima hincaa'llehe; ki'nnuwwaannina tuussiisoo bax bikkina an ki'nnuwwa guzumo'oombee'isa iina awwaadaanchi Iyyoob ki'nnuwwi bikkina eese uunxookko; anim ixxi uunxato macceesoommo; ki'nnuwwi iina awwaadaanchi Iyyoobisa i bikkina hanqo'i woshsha woccakko'oyyo» yukko.

⁹Ee lasage Teemaa'n uulliinsi Eel faazii Shuuha'i uulliinsi Bildaadii Naa'imaat uulliinsi Xoofaarii matta'a Waa'i ijaajukkisannem issito'o; Waa'im Iyyoobika uunxato macceesukko.

¹⁰Iyyoob sasem ixxi beshinam Waa'a uunxaa lasage Waa'i Iyyooba dabaraa goddaanchi issukko; illageen hee'ukkaanniinsi loboka lam suum issaa uwwukko.

¹¹Ee ammanenne Iyyoob abbaayyuwwii aayyuwwii illageen ixxo laqqam hee'llo'i mannii hundim moo'lleena ixxi beyyo waatto'o; ixxi minennem ixxenne maqire hurbaata itto'o; kichche'lla'a hee'llo'isa moo'issu'uuyyi Waa'i ixxonne hanenne eebu hawwiinsi hundiinsim qoxxisso'o; annannichchim kin biraa worqinne baxamaakkoo guma'aa uwwito'o.

¹²Waa'i Iyyoobika heechcha illagee'nnaannii lonsaa lasagee'nneka maasse'ukko; ixxenam tommiinsi soor kum gereebbii loh kum gaameela'ii mat kum qaash mirgo'uwwii mat kum meent hallii hee'ukko.

¹³Ee'isam lamar goo'n oosoo sas landaa odim edaa qarukko.

¹⁴Luxxi landichchoka summa Yimiima, la'mmaanteka odim Qaxi'a saxxaantekam Qerenihafuk yaa fissukko.

¹⁵Iyyoob landi qaxa mishisoo danaam landi uulli hundannem hee'ukkoyyo; Iyyoobim ixxuwwi abbaayyuwwinne maqirem ixxena yoo amaxxiinsi baxxancha uwwukko.

¹⁶Ee lasage Iyyoob xibbee sor hiinchoo hee'ukko; oosoo oos oosoo soor qaranchi afeebe'e moo'ukko.

¹⁷Lobakat doolle hee'aa lasage lomma'nnaa lehukko.