Read Hadiyya Iyyoob Kitaaba 5 Bible Online

Iyyoob Kitaaba 5 - Hadiyya bible

Iyyoob Kitaaba 5

¹«Iyyooba, yee yoo manna siiddoolas hino'o, weeshe; hara'mmoo'isina Waa'i asse'amaaniinsi hinkanni kollonne daba'llitootto?

²Qawwi mancho ixxi quunqim shookko. Ceemmaalli manchom to'achchi bi'isookko.

³Ceemmaalli manchi makkixxaa xumminne hee'ukkuuyyi moo'ummo; ihukkaarem dangonnem ixxi mine duumummo.

⁴Ixxi oosinam heechchi lubbat bee'e; oogaxxi beyyonnem ixxuwwi bikkina fitamookkok bee'i bikkina ixxuwwanne hawwi afookko.

⁵Ixxi wixxaa'u hurbaata sibaaru manni itookko; utti woronnem ihuta'n mutu hurbaata gatissamoyyo; xeebaan keenim ixxo mixxamo.

⁶Hawwi buchchi woriinsi firooyyo; qeddim uulliinsi mutooyyo.

⁷Gii'llek xoxanqi iim firoohaannisam manchim hawwina qaramookko.

⁸«Anetti ihumta'n Waa'i illage hincaa i hawwi hundam ku'llam hee'ummo.

⁹Ixxi saarayyakka'a xanakkambee'i lob baxo baxookko; xigakka'a xanakkambee'i maalalsiisoo mare'em issookko.

¹⁰Uullanne xeena ga'nnisookko; abuulli uullam wo'inne qufisookko.

¹¹Gadanto'i keeno lombinne iimaa'ookko; kichche'llo'i keenom qoxxisaa liiransookko.

¹²Hantaaraan kee'n sawwite gindookko; ixxuwwik angii baxim xabboobee'isa issookko.

¹³Qoolluwwi keeno ixxuwwi hantaarim qaash ihaa amadookko; hantaaraan kee'nneka a'llancha qaqqisom bi'isookko.

¹⁴Ixxuwwina balli tuunsookko; samgud ballanne hii'm tuunsonne yo'aannisa ikka'a timtimitamo.

¹⁵Bux keeno diina'i bisa'iinsi gatisookko; hawwaan keenom wor amadoo kee'n angiinsi wolabbanonne fissookko.

¹⁶Buxina neeyyata uwwookko; boqqooma uulliinsi bi'isookko.

¹⁷«Waa'i axeeroo manchi maasse'amaakkoohane; ee bikkina hundam xanoo Waa'ika axeerimma gadditte.

¹⁸Waa'i omassuta'nnim ixxim fayyiisookko; ixxi iiquta'nnim ixxim cacookko.

¹⁹Waa'i loh boobaniinsi keese gatisookko; lama'l boobanim keese afooyyo.

²⁰Sibaa'l maarage lehiinsi bagaxxi ammanem bisa'iinsi gatisookko.

²¹Waa'i jora wocoo allabiinsi egerookko; bi'isoo luwwi ki hanenne waaruta'nnim badditooyyo.

²²Bichchii sibaarii waaroohaare muggitooyyo; uulli moochcham badditooyyo.

²³Abuullitoo uullanne kin hawwisooyyo; Doo'm woro'l moochchi maqirem shiinnaatantaa hee'llootto.

²⁴Ki dukkaanannem xummi wo'mmukkisa laqqootto; ki gereebbi orodo moo'lloohaarem matim xa'ooyyo.

²⁵Ki shumo'i fikkaannoo'isa laqqootto; qattoo qachchim hixisa dutookko.

²⁶Aras hamaameebee'e wixakko'i abuullanne dasoohaannisa atim lomma'nniteebee'e hee'llootto.

²⁷Iyyooba, neese ka hundam saarayyinaa hanqi ihukkisa lanqaammo; ee bikkina ka hanqa ki wodanonne qoossitaa aa'e» yukko.