Read Hadiyya Iyyoob Kitaaba 6 Bible Online

Iyyoob Kitaaba 6 - Hadiyya bible

Iyyoob Kitaaba 6

¹Eehanniinsi lasonne Iyyoob dabaraa

²«I hawwii kichchechchii keennaanchonne keenamuta'n

³Dambalaq gammalanne yoo shashshariinsi loboka kee'mmam hee'ukko; ee bikkina iyyaqqoo'n wocoommi woshshanne maalaltitte.

⁴Hundam xanoo Waa'i ixxi xiyyinne eese qasaakko; shoo qaraarim i woronne binnaakko; Waa'ik muggisoo booban eese kibbaakko.

⁵Bii'l hallichchi hixe siidulas mirgo'im kutura siidulas muunoohonnihe?

⁶Sooqido issakkobee'i xee'oobee'i hurbaata itakkamonnihe? quunqanne yoo wo'i xee'oohonnihe?

⁷Eehido'i hurbaata ha'yyoommoyyo; nakkeenam hasoommoyyo.

⁸«Waa'i an xa'mmoommi luwwa uwwoobee'ek mahinatte? I uunxatdu macceesoobee'ek mahinatte?

⁹Eehanniinsi hundiinsim ixxi doo'l ihaa eese shuta'n ixxi anga biddiqaa'aa eese bi'isuta'n eran hee'ukko.

¹⁰Maham eesenne hawwi lophphuta'nnim keesammi Waa'ika sagara lagumbee'i bikkina liiranchinne xopham hee'ummo.

¹¹Foorinne hee'oommi malaayyi iina hanno hee'aate? Neeyyat bee'ulasdu i hee'immi mahina awwaadookko?

¹²Kini'nnoo'i qoxxaalli malaayyi iina yoohonnihe? I orachchim naas xaa'llisa qoxxaallannihe?

¹³Iina yoo malaayyi hundim beeddu bikkina i gaga gatiseena xanoommi malaayyi hore'em bee'e.

¹⁴«Ixxi beshichchina eroomma issoobee'i manchi hundam xanoo Waa'a baddimma uraakkoohane.

¹⁵Ihukkaarem i besh diris higaa lasage gogoohaannisaa ammanoomina wo'mmaa daadoo daajjisaa qawwiissam keeno.

¹⁶Barad shiiloo ammane daajji wo'i borqookko; hadaddi bukkamoo ammanem daajji wo'mmookko.

¹⁷Ihukkaarem billi agana xoo'ookko; daajjuwwim gogookko.

¹⁸Iyyiisakkam diinata ushe'llam daddaraan wo'o hassu'uuyyi udma'i uullanne bi'llamo;

¹⁹Teemaa'n uulli daddaraan wo'o hassamo; Saaba'i uulli googaanim wo'o siiddeena neeyyato issitamo.

²⁰Ihukkaarem amma'nnito'i daajji gogaakkoo moo'lla'a neeyyat muttamo; eekke'e affa'atim gancattamo.

²¹Kaba ki'nnuwwi iina ee gogu daajjuwwisa ikkakko'ookko; eesenne afu hawwo moo'llakka'atim lasinne fuduuddakko'ookko.

²²Ayla'ukko ‹I bikkenne ikkakka'a ma'lluwwa uwwehe; bada'n bikkina iinniinsi amaddakko'i luwwa ki'nnuwwi amaxxa miqqakka'a fatakissiissehe› yaatennihe?

²³Te'im ‹Diina'i angiinsi gatissehe; wor amaddam kee'n angiinsim agaaggakka'a gatissehe› yaatennihe?

²⁴«Ki'nnuwwi eese losissehe; ihushancham kullehe; anim cawwaa macceesoommo.

²⁵Hanqo'i sagar hinkido'i malaayyaamo! Ihukkaarem ki'nnuwwi fit awwaad bee'ane.

²⁶Neeyyat bee'i manchi wocoo woshshi hafachchisa ihu bikkina an wocoommi woshshika huushancha axissakkeena sawwitakkamuulla.

²⁷Anni bee'i qachchonnem saamo fissaqqantakko'o; ki'nnuwwi besham biteessakkeena bitonne fitantakkamuulla.

²⁸Kabada'i hino'o, i kollonne hoottakka'a moo'llehe; an ki'nnuwwi illagenne qaphphanoommonnihe?

²⁹Kinnuwwina baaxiil ihoobee'isa an hanqo'i manchi ihummi bikkina kabadem daba'llehe.

³⁰Hanqinam i woshshanne baaxiil yoohonnihe? I suumim hanqaa baaxiiloo annannissaa wocimma la'ooyyonnihe?