Read Hadiyya Iyyoob Kitaaba 7 Bible Online

Iyyoob Kitaaba 7 - Hadiyya bible

Iyyoob Kitaaba 7

¹«Ka uullanne manni hee'oo heechchi kee'mmaalli gubbanchinneyyonnihe? Ixxi umu'l doollim kee'mmaalli baxinne qaashamaa hosoo balli baxaanchisayyonnihe?

²Hafanne usheexxiteena hassam awwaadaa'nnisaa baxxo'i baxina miqakkam luwwa ege'llitam baxaa'nnisayyonnihe?

³Ee'isam iina kora'i agannuwwim uwwamukko; hiimiinsi hiim afeebe'e hawwiinsi bagaan siidoommi luwwi bee'e.

⁴Diriireena iinse'ummi ammane hiim qeeraa'llookko; ‹hiim hinki ammandu soodookko?› yummuuyyi midaadiinsi midaadonne daba'llummuuyyi garoommo.

⁵I orachchi hundim omaraa daquurinnee hobarinnee ifiisamaakko; omariinsim mar daadoolla.

⁶I umu'l doolli eddehchcha daddam kee'n fati'l xaacciinsi loboka qaqqisookko; mat neeyyat bee'em beeddookko.

⁷«Waa'a! I heechchi fooshshiinsi gundi ihukkisa sawwihe; i illim kanniinsi eehid eroomma moo'ooyyo.

⁸Kaba eese moo'ookkok la'mmaagge moo'ooyyo; hasuta'nnim eese siideena xanooyyo.

⁹Duub binnaa bi'oohaannisam lehaa waammanne aagu manchi daba'llaa waarooyyo.

¹⁰La'mmaagge ixxi mine daba'llooyyo; ixxo la'oo manni hundim xadookko.

¹¹Kanniinsi eehid hore'em cawwoommoyyo; i tiir kichche'u bikkina wocoommo; i heechchi qaraaru bikkina qunquunoommuulla.

¹²«I hanenne egeraancho uullissoottok mahinatte? An dambalaqannihe? te'im dambalaq woro'l lob mochchichchonnihe?

¹³Ara'i eese qoxxisookko yaa iinsim iina hara'mmookko yaa sawwummo.

¹⁴Ihukkaarem at eese haqaawwinne baddissoolla; ajuuttinnem muggissoolla.

¹⁵Ee bikkina ka'isenne u'nnamummuuyyi hee'immiinsi xaga'llaa lehimmi e'llookko.

¹⁶An neeyyato muraammo; hee'eenam hasoommoyyo; i umu'l doolli gundi ihu bikkina eese uttaa ure.

¹⁷Iimiimmaa'llaa lonsitoo'isinaa sawwitam ixxonne issitoo'isinaa manchi beet maruwwi ihaate?

¹⁸Dar hundam saarayyiteenaa amman hundam keenteenaa ixxi maruchcho?

¹⁹Anja liciqeembee'e ammane uwwitoobee'ek mahinatte?

²⁰Manni ihoo'isa hundam laseessoo Waa'a! An baaxiilo baximmi keese mahinne hawwodookko? Mahina eese xiniinsitoolla? Eekkaa'nnam kee'mmaalli iyyi ihummonnihee?

²¹I baaxiilo hore'em uttooyyonnihe? I hawwojdu shiinshitooyyonnihe? Waammi woronne aagoommi amman afaakko; kanniinsi eehid hassita'nnim hee'oommoyyo» yukko.