Read Hadiyya Iyyoob Kitaaba 8 Bible Online

Iyyoob Kitaaba 8 - Hadiyya bible

Iyyoob Kitaaba 8

¹Shuha'i uulliinsi Bildaad yakkam manchi dabaraa

²«Ki suumiinsi firoo sagar hambu'llam hafachchisa; kido'i woshsha woccoottok hinki balli afeebe'e?

³Waa'i oogato boqqisoohonnihe? Hundam xanoo Waa'i hanqa boqqisoohonnihe?

⁴Ki oos Waa'i illagenne baaxiilo baxxo'oohan ihulas eehannina laboo guzumo'o aa'llo'ookko.

⁵Ihukkaarem Waa'i kollonne daba'llitta'nnii hundam xanoo Waa'a uunxitta'nnii

⁶muccuraa xabbeenaa ikkilas Waa'i qaqqisaa kiina hara'mmookko; ki muccuroo'm heechcham xabbaa'ookko.

⁷Kiikki asheer hoffan ihaa moo'amuta'nnim kiikki lasaanchi erisa haraarookko.

⁸Illagee'n qarancha xa'mme; gaassi anno'i losanom saarayye.

⁹Mashka'oomim neese abbis balla qarammaammoo keen inkummi bikkina maham lanqoommooyyo; ni umurim hafisa higoohane.

¹⁰Ixxuwwi kiina losissamokii kuttamokii qoossita'a laqqo'aanniinseyyonnihe?

¹¹«Leendi leephphees bee'i beyyonne mutoohonnihe? Qara'idu wo'i bee'i beyyonne latoohonnihe?

¹²Ee beelas li'aa murakkamisa ihoo'nnim mulli kaashshi hundiinsim gaassaa gogookko.

¹³Waa'a xaddam kee'nnek hundikim lasaanchi eehannisame; Waa'a laggam kee'nnekim neeyyat bi'ookko.

¹⁴Idooxxi do'nnisa muramoo luwwanne bakke'llamo; neeyyato issitam luwwim qaqqisom bi'ookko.

¹⁵Eehannah idooxxi do'nnanne bakke'akkota'n egedeena xanoohonnihe? angiinne amaxxakkota'ndu bakkiisaa uullisoohonnihe?

¹⁶«Dob eelliinchonne lataa kaashshi beyyonne dutoo'isam jor keen ee'isam fikkaannitamo.

¹⁷Oo dob xapha ki'n tuubbanne xaaxookko; lob ki'n lambe'ennem beyyo axixxookko.

¹⁸Ihukkaarem beyyiinsi manni xoqolamoo ammane illageen hee'u beyyo ayyim la'ooyyo.

¹⁹Doboomim ee'isinne gogookko; mulli kaashshim uulliinsi mutookko.

²⁰«Waa'i er manna uunjooyyo; jora baxxam keeninam hara'mmooyyo.

²¹Odim keese dabaraa liiranchinne osattoo'isaa ililitoo'isaa issookko.

²²Ihukkaarem keese sabbam keen sholle'llamisa issookko; baaxiilaan kee'nnekim min bi'ookko» yukko.