Read Hadiyya Iyyoob Kitaaba 9 Bible Online

Iyyoob Kitaaba 9 - Hadiyya bible

Iyyoob Kitaaba 9

¹Iyyoob, Iyyoobim dabaraa

²«Eeyya, ku woshshi hanqi ihukkisa la'oommo; ihukkaarem Waa'i illagenne manchi beet hinkid muccur iheena xanookko?

³Waa'inne maqire ayyi fitameena xanookko? ixxi xa'mmoo kum xa'mmichchiinsi matichchom dabareena xanookkok hee'ooyyo.

⁴Waa'ik qooroom xillaalla; malaayyim lobane; ixxenne uullixxamaa kaa'amubee'ek ayyi yookko?

⁵La'akkoo'n dangonne duunnuwwa heekkeesookko; ixxi quunqinnem toroshansookko.

⁶Waa'i uulli huxe'oo'isa issookko. Uulla bakkiisaa iyyu utubbuwwam heekkeesookko.

⁷Eelliinchi firoobee'isa ijaajeena xanookko; boollaankim caakka uwwoobee'isa isseena xanookko.

⁸Ixxi ayyim hara'mmoo'n mullam iimane biddiqaa'ukko; dambalaq womoo'l hanennem taakke'ookko.

⁹Tibbe'ee Ooriyoonaa Philiyaadiisaa yakkam boollankaa ee'isam woroo'n qarinne wixxaa yoo boollaankaa iimanenne qooccukkok Waa'a.

¹⁰Ixxi saarayyakkeena xanakkambee'i maalalsiisoo luwwaa xigakka'a xanakkambee'i mare'ee issookko.

¹¹«Waa'i i gadanonne hincuta'nnim moo'oommoyyo; i kollonne hincuta'nnim ixxotte ihukkisa annannissaa la'oommoyyo.

¹²Ixxi hasu luwwa massuta'n ayyim hoorookko? ‹Mahina ka'isa issitoolla?› yaa xa'mmookkokdu ayyette?

¹³Waa'i quuqulas daba'llooyyo; Ra'aaba yakkam dambalaq woro'l moochchichchina hara'mmitam keen hundim ixxena otossitamo.

¹⁴Eehannah an ixxena dabachcha uwweena hinkid xanoommo? Ixxenne maqire fitameendu sagara hinkid siidoommo?

¹⁵Muccur ihumta'nnim oogatoo Waa'i haafoo'isina uunxoommo bagaan dabachcha uwweena iggoommoyyo.

¹⁶Ixxi summa weeshoommaare dabachcha uwwuta'nnim i woshsha macceesookko yaa amma'nnoommoyyo.

¹⁷Hambu'llam hafachchinne eese iiqansaakko; mat mashka'i bee'ekam eesenne omara lonsaakko.

¹⁸Fooshsheexxonam ammane uwwukkoyyo; ihukkaarem i heechcha qaraaraalli kichchechchinne wonshaakko.

¹⁹Malaayyisinatte ihuta'n ixxi malaayyaamo; fitamaa neegaroommo yoombee'isam ixxo oogaxxi mine hincaa'eena xanookkok bee'e.

²⁰An muccuraa miiqakkam luwwi bee'anee; ihukkaarem i woshshim eese baaxiilaanchi issookko. Wocoommi woshshim eesenne dabaraa oogatookko.

²¹Maham eesenne baaxiil bee'uta'nnim i heechcha shigigaammo; hundem luwwam gatona uraammo.

²²Waa'i muccuraa baaxiilaanchoo mateeyyam bi'isoo bikkina ‹matem annannoomim bee'e› yummok eehanninatte.

²³Dangonne booban ubaa manna guulloohaare muccur manni hawwonne ixxi osarookko.

²⁴Uulli baaxiilaan kee'n anganne aagoohaare ixxi oogatoo kee'nneka ille ifiisookko; eehannah ka hundam issukkok Waa'a bagaan mullek ayyi hee'aate?

²⁵«I umu'l dool geeroo manchiinsi loboka gaaggaaboolla; mat liirancham moo'oo'n higoolla.

²⁶I heechchi doolli leendinne baxakko'i wongi'llisaa itoo luwwa hochcheena aad bararoo gaaqichchisaa gaaggaaboolla.

²⁷‹An kichchechcha xadoommo; quuqimma uraa liiramoommo› yumta'nnim

²⁸Waa'i eese muccuroominne moo'oobee'isa la'ummi bikkina hawwii u'nnii eesenne afookko yaa baddoommo.

²⁹An baaxiilaanchi ihaa xiganchi gatubee'i korenne kora'i beyyonne badaroommok mahinatte?

³⁰I orachcho saamuninne aanshaqqumta'n i angam haanjinne muccussumta'nnim

³¹at eese haranne ubbuussootto; i eddechchim eese shigigookko.

³²Ixxi i'isa manchi beet ihubee'i bikkina oogaxxi mine mallaa oogaxxammona yeena xanoommoyyo.

³³Ihukkaarem neese lamom araassookkok ni lambe'ennem daannookkok hee'uta'n

³⁴ixxek hibbi eese baddisoobee'isa Waa'i eese guzumo'imma uruta'n

³⁵i woda'n muccurooma la'oommi bikkina maham baddoo'n wocam hee'ummo.