Read Hadiyya Mazmuu'l Kitaaba 10 Bible Online

Mazmuu'l Kitaaba 10 - Hadiyya bible

Mazmuu'l Kitaaba 10

¹Waa'a! Mahina qe'llitaa uullitto? Hawwi ammandu ki gaga mahina maaxxitto?

²Jor manchi amaadinne buxa hawwisookko; mulli keenina qaashoo qaashannem ixxim amadamookko.

³Jor manchi ixxi mixanonne bakke'ookko; baashe'aanchi manchi Waa'a game'llokko; sholliisookkome.

⁴Jor manchi amaadimmiinsi ki'ukkok Waa'a hasooyyo; Ixxi sawwoo sawwit hundannem Waa'i bee'e.

⁵Ixxena maroo goog hundi ammanem makka; Waa'i oogatoo'isam qoossooyyo; ixxi diina'annem naacookko.

⁶Ixxi tiironne «An hore'em heekke'amoommoyyo; qaranchiinsi qaranchi afeebe'em eesenne hawwi afooyyo» yaa sawwookko.

⁷Ixxi suumenne duunchi, qophphanii sha'llanchii wo'mmaakkoohane; ixxi allabim qawwiishshinnee jollinnee wo'mmaakkoohane.

⁸Ixxi amba'uwwanne dugaa egerookko; muccur keeno daphphanne egeraa shookko; ixxik illi hoongaano jollinne daadeesookko.

⁹Daphphit beyyonne hobbichchisa dugaa egerookko; buxa amadeena daphphanne egerookko; ixxuwwam qaashinne amadaa gosaasookko.

¹⁰Ixxuwwa iiqansookko; ixxi angannem ubbamo; malaayyi bee'i keen ixxi anganne aaggamo.

¹¹Ixxi tiironnem «Waa'i xadaakko; ixxi illem ifiisaakko; hore'em moo'ooyyo» yaa sawwookko.

¹²Moollanni Waa'a! Ki'e; ki woda iimaa'e; buxa at xadditte.

¹³Jor manchi keese sholliisookkok mahinatte? Ixxi tiironnem «Waa'i eese guzumo'ooyyo» yoo mahinatte?

¹⁴Ihukkaarem at hawwoo kichchaa moo'llaa ixxuwwa hawwiinsi fissitootto; hawwaan ixxi gaga kiina higisaa uwwookko; adaraara hara'mmitoottok atette.

¹⁵Baaxiilaan kee'nnekaa jor kee'nnekaa malaayye iiqe; jora baxxam keen od baxxambee'isa guzumo'e.

¹⁶Waa'i heer heerinam adila; mulli minaadab ixxi uulliinsi bi'llamo.

¹⁷Waa'a! At hawwaa'nneka uunxato macceessootto; ixxuwwi uunxato macceessaa ixxuwwa qoxxissootto.

¹⁸Buchchiinsi qooccamu manchi od ixxuwwa hawwisoobee'isa; at adaraarinaa hawwaaninaa fitantootto.