Read Hadiyya Mazmuu'l Kitaaba 102 Bible Online

Mazmuu'l Kitaaba 102 - Hadiyya bible

Mazmuu'l Kitaaba 102

¹Waa'a! I uunxato macceese; i laachchim kiina macceesamona.

²Eesenne hawwi afoo balla iinniinsi ki gaga maaxxitte; ki macce i kollonne dabare; weeshoommaarem qaqqissaa macceese.

³An hee'oommi doolli wirii'llisa binnaa beeddaakko; i miqim shokkoolla.

⁴I wodan gogaa iiqamu hixisa ihaakko; hurbaata itimmam xadaammo.

⁵Lobakata laaroommi laachchiinsi ki'ukkok i orachchi beeddaa miqoom gataakko.

⁶Udma'i uullanne hee'oo hummaantichcho labummo; diih minenne hee'oo mooqqaqqichchisam ihummo.

⁷Diriir bee'e garoommuulla; i mi'n shudaamanne mullam garoo cii'ichchisam ihaammo.

⁸I diina'i balli hundam eese gado'inne game'lloolla; eesenne naacoo keenim i summa duunchina awwaaxxoolla.

⁹Gii'lbuchcha hurbaaxxisa itaammo; agoommi aggim indiiddinne hamaaramaakko.

¹⁰Oohim ihukkok ki malaayyaam quunqinnette; at eese iimiimaa'llaa lasonne dabattaa ubbuussitto.

¹¹An hee'oommi doolli maaro'i balli hawwaankannisa; anim hixisa gogaammo.

¹²Waa'a! Ihukkaarem at heer heerinam adila; ki summim qaranchiinsi qaranchi hundannem hee'ookko.

¹³At ki'llootto; Xiyooninam qishixxitootto; kuk Xiyoonina haafitoo ammane; oohim kabadette.

¹⁴Ki awwaadaan Xiyoo'n kina iittitamo; buchchoominam qishixxitamo.

¹⁵Mulli minaadab ki summa uulli adilluwwi hundim ki lomba badditamo.

¹⁶Waa'i Xiyoona dabaraa baxookko; ixxi lombinnem moo'amookko.

¹⁷Ixxi hawwaa'n uunxato macceesookko; ixxuwwi uunxatom gadooyyo.

¹⁸Ka lasage qarantam minaadab Waa'a galaxxitamisina ixxi issu maalalsiisoo luwwa waaroo qaranchina kitaabbehe.

¹⁹Waa'i hanaan yoo ixxi keesammi beyyonne ihaa moo'ukko; iimanenne ihaatim uulla moo'ukko.

²⁰Oohim aranto'i kee'n laachcha macceeseenatte; leh oogatamu keenom gatiseenatte.

²¹Ee bikkina Waa'ik summi Xiyoonanne alallaatamookko; Yerusaaleemannem galaxxamookko.

²²Oohim ihookkok mulli minaadabii adilluwwii mateeyyanne wixxita'a Waa'ina otossitam ammanennette.

²³Harde'oominne hee'ummuuyyim Waa'i i malaayye iiqukko; i umuram gundisukko.

²⁴Waa'a! An lomma'nnoo'n lambe'aanchi umuranne eese massititte. Waa'a! At heer heerinam hee'llootto.

²⁵Gaassitaa uulla qooccitaatto; iimanim ki angi baxo.

²⁶Oo keen bi'ookko; ihukkaarem at cawwitaa hee'llootto; ixxuwwi eddechchisa moositta'a beedditamo; at ixxuwwa eddechchisa dabassitootto; ixxuwwim ekkid uunjantamo.

²⁷Ihukkaarem at heer heerinam atetteme; ki umu'l doollim hore'em beeddoobee'ane.

²⁸Ki awwaadaa'n oos xumminne hee'ookko; ixxuwwi shumo'im ki illagenne qoxxaa hee'ookko.