Read Hadiyya Mazmuu'l Kitaaba 103 Bible Online

Mazmuu'l Kitaaba 103 - Hadiyya bible

Mazmuu'l Kitaaba 103

¹I foore, Waa'a galaxxe; i mannoomat hundim Waa'ika keesammi summa galaxxe.

²I foore Waa'a galaxxe; ixxi kiina issu eroommam xadditte;

³Ki baaxiil hundam uraammo yookkok, ki jabbo hundam fayyisookkok,

⁴keesem bichchiinsi gatisookkok, ixxi eroommaa qishixxatom eddeesookkok

⁵ki woraaddan gaaqichchisa haareechchoo'isina ki mixanom er luwwinne wonshookkok ixxotte.

⁶Waa'i wor amadanto'i keenina hanqo'i oogato oogatookko; ixxuwwi hanqa ixxuwwinam uwwookko.

⁷Ixxi googo Muse'ena ixxi baxom Isra'ee'l minaadabina la'isukko.

⁸Waa'i qishixxoohanee haafoohane; quuqimmina gaaggaaboobee'ane; ixxi eroommim lophphaakkoohanee.

⁹Ixxi hundi ammane ni hawwojja hollamooyyo; quuqukkisinnem heer heerina hee'ooyyo.

¹⁰Ni baaxii'llisa niina dabarukkoyyo; ni hawwojjisam niina miqukkoyyo.

¹¹Iiman uulliinsi iim qee'lloohaanni qaxa Waa'a badditam keenina ixxi eroommi lobakata.

¹²Eelliinchi fir eelliinchi aaggiinsi qee'lloohaanni qaxa ni baaxiilo niinniinsi qeessaakko.

¹³Anni ixxi oosina qishixxoo'isa ee'isam Waa'i ixxo badditam keenina qishixxookko.

¹⁴Ixxi neese hinkid qooccammumda'e la'ookko; buchchi inkummisam sawwookko.

¹⁵Manchik umur hixisa; haqqi wo'l fiitisam fiitookko.

¹⁶Ihukkaarem hafachchi hafachchoo ammane beyyiinsi bi'ookko; mare'oomim ee beyyonne hee'ooyyo.

¹⁷Ihukkaarem Waa'ik eroommi ixxo badditam keenonne heer heerina ihookko; ixxi muccuroomim qaranchiinsi qaranchi afeebe'e ixxuwwanne ihookko.

¹⁸Oohim ihookkok ixxeka hidi'l sagara egetto'aarettee ixxi ijaajinam amma'nnanchinne ijaajanto'aarettee.

¹⁹Waa'i ixxi adilla'n barcuma iimanenne qoxxisaakko; ixxi adillanim hundam gassookko.

²⁰Ixxi wocoo sagara macceessakkam Waa'i asse'amaan ixxi sagarinam ijaajantakkam malaayyaammuwwi ki'nnuwwi Waa'a galaxxehe.

²¹Ixxena awwaadaan ikkakko'i ixxi doo'lla issitakkam gogot hundim Waa'a galaxxehe.

²²Ixxi gassi woronne hee'llakkam ixxi qooccanchi hundim Waa'a galaxxehe; i foore, Waa'a galaxxe.