Read Hadiyya Mazmuu'l Kitaaba 104 Bible Online

Mazmuu'l Kitaaba 104 - Hadiyya bible

Mazmuu'l Kitaaba 104

¹I foore, Waa'a galaxxe. I Moollanni Waa'a! At hore'em lobane; at lombaa hibbaa edde'llaatto.

²Caakka eddechchisa edde'llaatto; iimanem dukkaa'nnisa biddiqaa'llaatto.

³Ki mine iimanenne yoo wo'iinsi hanaan baxxitto; duubam faraxxi gaare'i issitto; hafachchi ladinnem mattootto.

⁴Ki asse'amaano ayyaan issitootto; ki awwaadaanom gii'l laban issitootto.

⁵Heer heerinam heekke'oobee'isa uullika lugumo qoxxissaa uullissitto.

⁶Cambalaqa eddechchisa eddeessitto; wo'om duunnuwwiinsi hanaan uullissitto.

⁷Ee wo'om at shaaqqoo ammane ki illagiinsi gibookko; ki banqi sagara macceesoo ammanem qaqqisaa marookko.

⁸At gudissitti beyyonne duunnuwwannee cebbuwwannee dillookko.

⁹La'mmaagge uulla wo'i itoobee'isaa higaa maroobeeisaa gabala uullissaatto.

¹⁰Wo'i bu'uwwi cebbi worinne daajjuwwim duunnuwwi lambe'inne daadoo'isa issitaatto.

¹¹Doo'm moochchi ee wo'iinsi agookko; bii'l hallim xeebo mu'llookko.

¹²Iima'n cii'im ee daajjuuwwi gammalanne do'nna baxookko; caaffuwwannem afuuraa zammarookko.

¹³Iima'n xeeninne duunnuwwa aashissootto; uullim at uwwitoo mishinne wo'mmookko

¹⁴Diinatina hixe manninam annanni annanni misha mutissaa uulli hurbaata uwwoo'isa issitaatto.

¹⁵Ee'isinne manna liiransoo woyina illem lii'llisoo zayta malaayye qoxisoo hurbaata uwwitaatto.

¹⁶Waa'ik haqqi ixxi kaasu Liibaanoos digibbuwwim wo'o goddookko.

¹⁷Ee haqqanne cii'i do'nna baxookko; hoo'm haqqannem ammar gatti beyyo axixxookko.

¹⁸Qeeraa'l duunnuwwim gaallichchina gatti beyyi ihookko; ki'n farqaqannem wexeex garookko.

¹⁹Agana ammannuwwa annannissakka'a la'akkamisina issitaatto; eellinchim aagoo ammane la'oo'isa issitaatto.

²⁰At tuunso ebbaa uulla hiimsitootto; ee tuunsonnem bii'l moochchi hundim firookko.

²¹Hobbi wotalli Waa'iinsi itoo luwwa hasaa muunookko.

²²Eelliinchi firoo ammane daba'llita'a ixxuwwi ma'nnanne aagga'a iinse'llamo.

²³Ee lasage manni baxo baxonne aagookko; hiimeebee'i baxukkuyyi hosookko.

²⁴Waa'a! ki bax hinkaa'nna lobakata! Hundem luwwam ki qooroominne baxxaatto; uullim at qooccitti qooccanchinne wo'mmaakko.

²⁵Ku lob haraar dambalaq xig dut ihaakkoo hoffaanninnee lob qooccanchinnee wommaakko.

²⁶Ixxi hanenne markabbuwwi chabbookko; woronnem at qooccitti «Lewaatan» yakkam moochchichchi waachchookko.

²⁷Ixxuwwina ammaninne hurbaata uwwitoo'isina oo keen hundim ki anga moo'ookko.

²⁸At ixxuwwina uwwitoo ammane ittamo; ki anga biddiqaa'llootto; ixxuwwim er luwwiinsi hundiinsim itta'a godditamo.

²⁹At ixxuwwiinsi ki gaga daphphaa'lloo ammane muggitamo; ixxuwwiinsem foore massitoo ammane letamo; qooccanto'i buchchannem daba'llitamo.

³⁰Ki Ayyaana asse'llootto; ixxuwwim qooccantamo; uullam haareechchi issitootto.

³¹Waa'ik lombi heer heerinam qoxxaa hee'ona; Waa'i ixxi qooccu luwwi hundannem liiramona.

³²Ixxi moo'oohaare uulli huxe'ookko; duunnuwwam nakkoohaare wiriirookko.

³³An foorinne hee'ummuuyyi i Waa'ina zammaroommo; an hee'oommi doollenne hundannem Waa'ina galaxxi mazmuura hincaa'oommo.

³⁴An Waa'anne liiramoommisam i woda'n sawwitim ixxo liiransona.

³⁵Baaxiilaan uulliinsi bi'llona; jora issitam keenim beedditona; i foore Waa'a galaxxe; Waa'i galaxxamona!