Read Hadiyya Mazmuu'l Kitaaba 106 Bible Online

Mazmuu'l Kitaaba 106 - Hadiyya bible

Mazmuu'l Kitaaba 106

¹Waa'a galaxxehe; Waa'i biijaalla; ixxi eroommim heer heerinatte ihu bikkina Waa'a galaxxehe.

²Waa'ika malaayyaam baxo ayyi guullaa kureena xanookko? Ixxena hasisoo qax galata uwweena xanookkok ayyette?

³Hanqa egettam keenii hundi ammanem muccurooma hassam keenii maassaammuwwa.

⁴Waa'a! Ki minaadabina harammitoo ammane eesem sawwihe; ixxuwwa gatissoo ammane eesem xadditte.

⁵At doo'llitti keenina makkaa moo'oommisa ki minaadaphphi liiranchannem liiramoommisa ki gulum lobannem heellamoommisa isse.

⁶Neese gaassi niyyanno'isam baaxiilo banxaammo; boqquwwaa keese hawwondaammoo keenoo inkaammo.

⁷Gaassi niyyanno'i Gibxanne hee'llu'uuyyi at baxxitti maalalsiisoo baxo qoossito'ooyyo. Lobakat amma'n ki eroommam sawwito'oyyo; Ertira'i dambalaq gadanonnem kiina boqqito'o.

⁸Ihukkaarem malaayyaam ixxi woda moo'iseena ixxi summi bikkinaa yaa ixxuwwa gatisukko.

⁹Ixxi Ertira'i dambalaqa shaaqukkaare gogukko; xillaalli wo'o udama'i uullisa issaa ixxi minaadaba wo'i lambe'inne higisukko.

¹⁰Maso'i angiinsem ixxuwwa gatisukko; diina'ai angiinsem gatisukko.

¹¹Ihukkaarem ixxuwwi diina'a wo'i xuuxukko; ixxuwwiinsem gatukkok matim hee'ukkoyyo.

¹²Ee lasage ixxi neeyyaxxi sagaranne amma'nnito'o; mazmurinnem galaxxito'o.

¹³Ihukkaarem ixxi baxu baxo hundam qaqqisom xaddo'o; ixxi sogita'n googonnem marimma sabbo'o.

¹⁴Udma'anne hee'llu'uuyyi lobakat luwwa mixxo'o; ee udima'annem Waa'a keento'o.

¹⁵Ixxim uunxito'i luwwa uwwukko; ihukkaarem ixxuwwa cissoo kee'mmaalli jabbo asse'ukko.

¹⁶Wiiddananne hee'llu'uuyyi Muse'ennee Waa'ina keesammi ihu Aaroonannee to'achchito'o.

¹⁷Uulli fooqaa Daataana xuxukko; Aaberoonaa ixxi abaroosam uulli itukko.

¹⁸Ixxuwwa awwontam keenonnem giir dillukko; gii'l labanim ee boqquwwa itaa guullukko.

¹⁹Kooreebanne addichchi misila baxxo'o; bukkita'a baxxo'i misilinam otossito'o.

²⁰Ixxuwwina lombi ihukkokam hixe itoo diinaxxi kobi'llanne dabatto'o.

²¹Gibxanne maalalsiisoo luwwa Kaamannem aganna Ertira'i dambalaqannem maalalsiisoo luwwa issaa ixxuwwa gatisu Waa'a xaddo'o.

²²

²³Ee bikkina ixxuwwa boobaninne guulloobee'isa ixxi doo'llu Muse'e lambe'enne aagaa Waa'i illagenne uullubeeta'n minaadaba bi'isoo'isa wocaa hee'ukko.

²⁴Ee lasagem er uulla gaddo'o; neeyyaxxi sagaram amma'nnito'oyyo.

²⁵Ixxuwwi dukkaa'n woronnem ikka'a qunquunto'o, Waa'i sagaram macceesimma sabbo'o.

²⁶Udma'anne ixxuwwa uunjoohan ihukkisa ixxeka anga ki'isaa hide'ukko.

²⁷Ixxuwwi shumo'om mulli minaadaphphi lambe'enne uunjoo'isa uulli hundannem binnaa'oohan ihukkisam la'isukko.

²⁸Ee'isam Bi'eel Feegoorina otossito'o; foorbee'i waa'uwwinam kitimakko'i kitima itto'o.

²⁹Ixxuwwi jor baxinnem Waa'a quuqisso'o; ee mashka'innem booban ixxuwwanne ubukko.

³⁰Ihukkaarem Fiinihas ki'aa jora baxxo'i keeno guzumo'u ammanenne oo booban uullukko.

³¹Oohim ixxena qaranchiinsi qaranchi afeebe'e heer heerinam muccuroom ihaa xigamukko.

³²Odim Mariiphphi wo'i gadanonne minaadab Waa'a quuqisukko; Muse'em ixxuwwi mashka'inne hawwukko.

³³Waa'ika ayyaana kichche'issa'a hee'u bikkina Muse'e laboobee'i sagara wocukko.

³⁴Waa'i ixxuwwa ijaajukkisanne hanqo'i Waa'a laqqambee'i minaadaba bi'isso'oyyo.

³⁵Hore'oomam ixxuwwinne maqire hamaaranta'a ixxuwika heechchi qaanqi hundam awwonto'o.

³⁶Ixxuwwi waa'uwwinam otossito'o; ixxuwwinam ookki qaash ihukko.

³⁷Goo'n oosoo landaa habusina kitinto'o.

³⁸Ixxuwwi goo'n oosikaa landikaa xiiga Kana'aa'n uullanne yo'i qophpha'n waa'uwwina kitim issita'a muccur xiiga dunto'o; uullim xiiginne haashaaramukko.

³⁹Ixxuwwi, ixxuwwi baxinnem haashaaranto'o; ee baxinnem saa'aan ikko'o.

⁴⁰Ee bikkina Waa'i minaadabanne quuqukko; ixxuwwam lobakata shigigukko.

⁴¹Mulli minaadabina ixxuwwa higisaa uwwukko; ixxuwwi diina'im ixxuwwa ijaajjo'o.

⁴²Ixxuwwi diina'i ixxuwwa wor amado'o; ixxuwwi ijaaccisannem gassito'o.

⁴³Waa'i dut ammane ixxuwwa gatisukko; ihukkaarem ixxuwwi Waa'ina boqqito'o; ixxuwwi baaxiilinnem sholle'llo'o.

⁴⁴Ihukkaarem ixxuwwi laachcha macceesoo ammane ixxuwwi hawwo moo'am hee'ukko.

⁴⁵Ixxuwwi bikkina hidi'l sagara sawwukko; ixxi eroommim lobakat ihu bikkina ixxi quunqiinsi daba'llikko.

⁴⁶Qeefaddo'i keen hundim ixxuwwina qishixxitamisa issukko.

⁴⁷Ni Moollanni Waa'a! Neese gatise; keesammi ki summina galata hincaa'nnona keesem galaxxinummuuyyi liirammona mulli minaadaphphi lambe'iinsi neese wixxaa'llaa dabare.

⁴⁸Isra'ee'l Moollanni Waa'i heer heerinam galaxxamona; minaadab hundim «Ameen!» yihona. Waa'i galaxxamona!