Read Hadiyya Mazmuu'l Kitaaba 107 Bible Online

Mazmuu'l Kitaaba 107 - Hadiyya bible

Mazmuu'l Kitaaba 107

¹Waa'i biijaalla; ixxi eroommim heer heerinatte ihu bikkina ixxo galaxxehe.

²Waa'i tissi issaa gatisu keen ixxi ki'nnuwwa diina'i angiinsi gatisaakko.

³Eelliinchi firoo kolliinsii aagoo kollinsii hana'n qariinsii woroo'n qariinsii uulli hundiinsim ki'nnuwwa wixxaa'aakko.

⁴Mat mat keen mahimbee'i udma'anne karkaaddo'o; ixxuwwi katamanne massoo googom huushsho'o.

⁵Sibaatta'o, xeebe'llo'ome; ee bikkina lobakata hooggo'o.

⁶Hawwito'i ammane Waa'i kollonne laatto'o; ixxim ixxuwwi hawwiinsi gatisukko.

⁷Hee'llam kata'm kollonnem hanqo'i googinne awwonsukko.

⁸Waa'i issu maalalsiisoo luwwi bikkinaa ixxi eroommi bikkinaa manni hundim Waa'a galaxxona.

⁹Ixxi xeebe'u kee'nneka xeebo muraakko; sibaaru keenom er luwwinne goddisaakko.

¹⁰Mat mat keen xaa'l chimchiminne karanta'a hawwinne tuunsonne leh haforonne afuutto'oo keen hee'llo'o.

¹¹Oohim ixxuwwi Waa'i ijaajonne bangujjita'a hundiinsi lobaanni sogitanom gaddo'i bikkinatte.

¹²Ee bikkina malaayyi baxinne qondooddamisa issukko; hoogga'a ubbo'o; hara'mmoohim hee'ukkoyyo.

¹³Hawwito'i ammane Waa'i kollonne laatto'o; ixxim ixxuwwi hawwiinsi gatisukko.

¹⁴Ixxuwwi honenne ihu gambabbi tunsiinsi fissukko; karanta'a hee'llo'i sansalatam muransukko.

¹⁵Waa'i issu maalalsiisoo luwwi bikkinaa ixxi eroommi bikkinaa manni hundim Waa'a galaxxona.

¹⁶Ixxi naas xaarinne baxamaakkoo gooccuwwa iiqansaakko; xaa'l laqqo'uwwam muransaakko.

¹⁷Mat mat keen ixxuwwi boqqoo'm mashka'inne qawwuwwi ikko'o; ixxuwwi baaxii'l mashka'innem hawwonne aaggo'o.

¹⁸Hurbaat shene'isaa hee'u bikkina lehina hincita'a hee'llo'o.

¹⁹Hawwito'i ammane Waa'i kollonne laatto'o; ixxim ixxuwwi hawwiinsi gatisukko.

²⁰Ixxi sagara asse'aa fayyiisukko; bichchiinsem ixxuwwa gatsukko.

²¹Waa'i issu maalalsiisoo luwwi bikkinaa ixxi eroommi bikkinaa manni hundim Waa'a galaxxona.

²²Galaxxi kitimom hincaa'llona; ixxi issu luwwam liiranchinne zammattu'uuyyi kuttona.

²³Mat mat keen markabinne dambalaq hanenne mattam hee'llo'o; haraar wo'i woronnem baxo baxaqqitu'uuyyi hee'llam hee'llo'o.

²⁴Ixxuwwim Waa'ika baxo ee beyyonne moo'llo'o; xillaalli dambalaq woronnem ixxi issu maalallato moo'llo'o.

²⁵Ixxi ijaajukkaare hambu'llam ki'ukko; hafachchim womoora ki'isukko.

²⁶Ixxuwwi markabbuwwim malaayyaam hambu'llaminne gafe'anta'a iim darabanto'o; odim daba'llita'a xillanne dillito'o; eehido'i hawwinsi ki'ukkok muggita'a neeyyato mutto'o.

²⁷Dinbaa'nnisa ekkidii kidii tartarito'o; mal bi'aatim issitam luwwa hooggo'o.

²⁸Hawwito'i ammane Waa'i kollonne laatto'o; ixxim ixxuwwa hawwiinsi gatisukko.

²⁹Hambu'llamim cawwoo'isa issukko; hambu'llamim uroo'isa issukko.

³⁰Oohim ixxuwwa liiransukko; ixxuwwi hasso'i dambalaq tochchom ixxi xumminne afisukko.

³¹Waa'i issu maalalsiisoo luwwi bikkinaa ixxi eroommi bikkinaa manni hundim Waa'a galaxxona.

³²Minaadaphphi dummichchi lambe'enne ixxeka lomba kuttona; gassaa'n dummichchannem galaxxitona.

³³Waa'i daajjuwwa gogoo'isa bu'uwwim daadoobeeisa issukko.

³⁴Ee beyyonne hee'llam manni jolliinsi ki'ukkok mishaam uulla soogidaam uullisa misha uwwoobee'an issukko.

³⁵Udma'i uullam wo'i wo'mmoo delbi issukko; gogaalli uullam bu'i firoo beyyi issukko.

³⁶Sibaatto'i mannim eekke'enne afuuttamisa issukko; ixxuwwim hee'llam beero'uwwa eekke'enne baxxo'o,

³⁷Abuulli uullannem hurbaata wixxo'o; woyi'n haqqam kaasso'o; lobakat atootam wixxaa'llo'o.

³⁸Minaadabam maasse'ukko; lobakat oosom qatto'o; ixxuwwi horem hoffe'oobee'isa issukko.

³⁹U'nninne, hawwinnee kichchechinnee sholle'llo'o; ixxuwwi xigim hoffe'ukkuuyyi marukko.

⁴⁰Ixxuwwi gassaanonne Waa'i sholle'nna gunguussukko; googbee'i udama'anne karkaaddamisa issukko.

⁴¹Hawwanom hawwiinsi fissukko; ixxuwwi abaroosam gereebbi allaachchisa fikkaannisukko.

⁴²Er keen eekka moo'lla'a liirantamo; ihukkaarem jor keen tuutta'a suume amaxxitamo.

⁴³Qoor manni hundim kaka qoossitona; Waa'i eroommam sawwitona.