Read Hadiyya Mazmuu'l Kitaaba 108 Bible Online

Mazmuu'l Kitaaba 108 - Hadiyya bible

Mazmuu'l Kitaaba 108

¹I Moollanna! An keesenne amma'nnamoommo; an zammaroommo; mazmuurinnem keese galaxxoommo.

²I diitta'ii maasinqo'ii ki'llehe; anim soodaraarom ki'oommo.

³Waa'a! Minaadaphphi lambe'enne keese galaxxoommo; mulli minaadaphphi lambe'ennem kiina zammaroommo.

⁴Ki eroommi iimaniinsi hanaan ihaakkoohane; amma'nnantaattoohaannoomim iima'n duuba afoohane.

⁵Waa'a! At iimaniinsi hanaan iimiimihe; ki lombim uulli hundannem ihona.

⁶Iittitoo ki minadab joriinsi gatoo'isina ki wodinne agaage; i uunxatom macceese.

⁷Waa'i ixxi keesammi minenne ihaa «Kaachchinne Seekee'm uulla keenoommo; Suukooxxi cebbam baxxansoommo.

⁸Gala'aadii Minaasee i keeno; Efireem i horoo'l qoobe'e; Yihudim i adilla'n bicco.

⁹Moo'aab an anshaqqoommi beyyo; Edoomanne i kobe'e dissoommo; filisxeemam kaa'aa sharoommo» yukko.

¹⁰Waa'a! Girbamaakkoo beero'o eese ayyi massookko? Edoom afeebedu eese ayyi awwonsookko?

¹¹Waa'a! Neese uunjtok atetteyyonnihe? Moollanna, ni gogotinnem gadimma uttaatto.

¹²Mannik hara'mmat awwaadbee'ane; ee bikkina ni diina'a kaa'nnoommisina at hara'mme.

¹³Waa'i niinninne maqir ihulas kaa'nnoommo; ni diina'am ixxi lokkii woroon hance'ookkok ixxotte.