Read Hadiyya Mazmuu'l Kitaaba 115 Bible Online

Mazmuu'l Kitaaba 115 - Hadiyya bible

Mazmuu'l Kitaaba 115

¹Moollanni Waa'a! Ni bikkinatti ihoo'n heer heerina hee'oo ki iitti bikkinaa atim hanq'an ikkitti bikkinaa ki summa lonse.

²Hanqo'i Waa'a laqqambee'i manni «Ki'nnuwwik Waa'i hannonne yookko?» yitu'uuyyi Neesenne mahina naacantamane?

³Ni Waa'i iimanennette ixxena toshaa'oo luwwi hundam issookko.

⁴Ihukkaarem ixxuwwi otossitam waa'uwwi manni anginne birnee worqinnee baxanto'oo keeno

⁵Suum yookko ihukkaarem woccamoyyo; illi yookko ihukkaarem moo'llammoyyo.

⁶Macci yookko ihukkaarem macceessamoyyo; san yookko ihukkaarem enjeessamoyyo.

⁷Angi yookko ihukkaarem amaddamoyyo; lokki yookko ihukkaarem taake'llamoyyo; ixxuwwi sagaram macceesissammoyo.

⁸Ee keeno baxxo'i keenii ixxuwwannem bakke'llam keenii hundim ee qophpha'n waa'uwwisam ikkona.

⁹Ihukkaarem ki'nnuwwi Isra'ee'l minaadaba, ki'nnuwwina hara'mmoohii ki'nnuwwa egerookkokii Waa'i ihu bikkina ixxonne bakke'llehe.

¹⁰Ki'nnuwwi Aaroon shumo'im ki'nnuwwina hara'mmoohii ki'nnuwwam egerookkokii Waa'i ihu bikkina ixxonne bakke'llehe.

¹¹Ki'nnuwwi Waa'a badditakkam keen hundim ki'nnuwwina hara'mmookii ki'nnuwwa egerookkokii Waa'i ihu bikkina ixxonne bakke'llehe.

¹²Waa'i neese sawwookkoo neesem maasse'ookkoo; ixxi Isra'ee'l minaadabaa Aaroon shumo'oo maasse'ookko.

¹³Waa'i ixxo badditam keen hundam hoffokaa lobokaa hundam maasse'ookko.

¹⁴Waa'i ki'nnuwwaa ki'nnuwwi oosoo fikkaannitakkamisa issona.

¹⁵Iimanee uullaa qooccu Waa'i ki'nnuwwa maasse'ona.

¹⁶Iimaniinsi iiman Waa'ane; ihukkaarem uulla mannina uwwaakko.

¹⁷Leto'i keen Waa'a galaxxitamoyyo; waammanto'i keenim Waa'a galaxxitamoyyo.

¹⁸Ihukkaarem nees foorinne yoommine keen kabadiinsi ki'insaa doolli hundinam Waa'a galaxxinoommo. Waa'i galaxxamona!