Read Hadiyya Mazmuu'l Kitaaba 118 Bible Online

Mazmuu'l Kitaaba 118 - Hadiyya bible

Mazmuu'l Kitaaba 118

¹ Waa'i biijaalli ihu bikkina ixxo galaxxehe; ixxi eroommim heer heerina hee'oohane.

²Isra'ee'l minaadab hundim «Waa'ik eroommi heer heerina hee'oohane» yihona.

³Aaroon shumo'i hundim «Waa'ik eroommi heer heerina hee'oohane» yihona.

⁴Waa'a baddoo keen hundim «Waa'ik eroommi heer heerina hee'oohane» yihona.

⁵An u'nnanne hee'ummi ammane Waa'i kollonne laarummo; ixxim i laachcha macceesaa eese u'nniinsi fissukko.

⁶Waa'i iininnetti ihu bikkina maham baddoommoyyo; manni eese mah issookko?

⁷Iina hara'mmeena Waa'i iinninne maqire yoo bikkina i diina'i ubbu'uuyyi kaachchinne moo'oommo.

⁸Mannanne bakke'immiinsi Waa'anne bakke'immi e'llookko.

⁹Gassaanonne bakke'immiinsi Waa'anne bakke'immi e'llookko.

¹⁰Minaadab hundim eese kibbukko; ihukkaarem an ixxuwwa Waa'i summinne bi'isummo.

¹¹Kolli hundinnem eese kibbito'o; ihukkaarem Waa'i summinne bi'isummo.

¹²Diishshi dummoo'isa eesenne dummito'o; ihukkaarem utti giranne shokkoo'isa shokkito'o; Waa'i summinnem ixxuwwa bi'isummo.

¹³Gafe'amaa ubeena tartarummo; ihukkaarem Waa'i iina hara'mmukko.

¹⁴Waa'i iina malaayyee mazmuuraa; ixxi eese gatisaancho.

¹⁵Iilillaaxxekii kaachchi sagarii xummaan kee'n dukkaa'n woronne «Waa'i malaayyi wodaam baxo baxaakko.

¹⁶Waa'ik malaayyi iimiimaakko; Waa'ik wod malaayyaam baxo baxaakko» yoo sagar macceesamukko.

¹⁷Foorinne hee'oommo bagaan lehoommoyyo; Waa'ika baxo alallaatoommo.

¹⁸Axeerimma'i Waa'i eese lobakata axeeraakko; ihukkaarem eese lehina higisaa uwwukkoyyo.

¹⁹Muccuroo'm goccuwwa fooqaa'llehe; anim woro aagaa Waa'a galaxxoommo.

²⁰Kuk Waa'i gooca; muccur keen ee goocinne aagookko.

²¹Waa'a! At i uunxato macceessaa eese gatissitti bikkina an keese galaxxoommo.

²² Kininne mine baxxam keen awwaadooyyo yita'a uunjito'i kinchi hundiinsim lobakata lophphaa awwaadoo kinchi ihukko.

²³Oohim Waa'i baxo; ni illinam malallato.

²⁴Kuk Waa'i baxaakkoo kaachchi balla; ixxonne liirammona; lobakatam liirammona.

²⁵Waa'a! He'i at neese gatise; Waa'a! He'i niina hundem luuwwam taaphanse.

²⁶Waa'i summinne waarookkok maasse'amaakkoohane; Keesammi Waa'i Minenne inkaa neese ki'nnuwwa maasse'nnoommo.

²⁷Waa'i Moollanna! Ixxeka caakka neesenne caakkisaakko; buyyaam haqqi caafa amaddakka'a uguda lonsehe; kiti'm beyyom do'llehe.

²⁸At iina Waa'a an keese galaxxoommo; at iina Waa'a an keese lonsoommo.

²⁹Waa'i biijaalli ihu bikkina ixxo galaxxehe; ixxi eroommim heer heerina hee'oohane.