Read Hadiyya Mazmuu'l Kitaaba 119 Bible Online

Mazmuu'l Kitaaba 119 - Hadiyya bible

Mazmuu'l Kitaaba 119

¹Ixxuwwi googonne miiqakkam luwwi bee'i keen Waa'i see'llisannem hee'llam keen maassaammuwwa.

²Waa'i ijaajo egettam keen wo'm tiirinnem ixxena awwaaddam keen maassaammuwwa.

³Oo keen ee googonne taakke'llamo bagaan boqqooma baxxamoyyo.

⁴Waa'a! At niina ki seera uwwitaatto; qoxxinaa ijaajammoommisinam kuttaatto.

⁵Ki seera egereena i goog xabboo'isina lobakata mixam hee'ummo.

⁶Ki seera hundam erisa qoossumlas hore'em tuuroommoyyo.

⁷Kiikka hanqo'i oogato losoommi ammane muccur wodaninne keese galaxxoommo.

⁸Ki seera egeroommo; at eese hore'em uunjititte.

⁹Harde'i manni ixxuwwi heechcha muccuroominne hee'lleena xantamok ki ijaajo egerimminnette.

¹⁰Keese wo'm wodaninne hasoommi bikkina ki ijaajiinsi qee'lloombee'isa egere.

¹¹Keese hawwodoombee'isa ki sagara i wodanonne maaxaqqoommo.

¹²Waa'a! An keese galaxxoommo; ki seera iina losise.

¹³At ki suuminne woccitti seer hundam i suuminne wocoommo.

¹⁴Lobakat hor liiransoohaanniinsi loboka ki ijaajo egerimmi eese liiransookko.

¹⁵An ki seera dabaransaa sawwoommo; i tiirom ki googonne issoommo.

¹⁶An ki seeranne liiramoommo; ki sagaram an xadoommoyyo.

¹⁷An foorinne hee'onaa ki sagaram egeroonaa iina ki awwaadaanchina eroomma isse.

¹⁸Ki see'l woronne yoo maalalsiisoo hanqa moo'imma xanoommisina i ille fooqaa'e.

¹⁹An ka uullanne koyyiinchi ihummi bikkina ki ijaajo iinniinsi daphphaa'llitte.

²⁰I foor hundi ammanem kiikka hanqo'i oogato la'eena quluxookko.

²¹Ki ijaajiinsi huushanto'i keeno, amaadaanoo duumanto'oo keenoo axeettootto.

²²An ki seera egerummi bikkina ixxuwwika game'llatoo gado'oo iinniinsi qeesse.

²³Awwonsaan mat ikka'a eesenne dollotto'aarem an ki awwaadaanchi ki seera dabaransaa sawwoommo.

²⁴Ki seer liiransoohane; eesem sogoohane.

²⁵An kaa'amaa buchchanne aageena ihaammo; iina uwwitti neeyyaxxi saga'llisinne foorinne hee'oommisa isse.

²⁶An i duuha'a hundam kiina kuraammo; atim macceessitto; ki seera at iina losise.

²⁷Ki seera qoossona at iina hara'mme; anim kiikka maalalsiisoo baxo dabaransaa sawwoommo.

²⁸I foorenne kichchechchi lophphaakkoo bikkina ki saga'llisinne at eese qoxxise.

²⁹Qophpha'n googiinsi eese egere; ki eroomminnem ki seera iina losise.

³⁰Hanqo'i googo doo'llaammo; ki seeram amman hundam sawwoommo.

³¹Waa'a! Ki seera awwonaammo; ee bikkina at eese tuussiissitte;

³²Iina at lobakat qoossimma uwwitti bikkina ki ijaajo qoxxaa egeroommo.

³³Waa'a! Ki see'lleka tirato iina losise; anim hundi ammanem eekka egeroommo.

³⁴Ki seera egeroommisina wo'm wodaninnem ijaajamoommisina iina tiiro uwwe.

³⁵Ki ijaaj eese liiransoo bikkina ee googonne eese awwonse.

³⁶Amaxxa siidimmina gollimmiinsi i tiiro ki see'l kollonne dabare.

³⁷Awwaad bee'i luwwa moo'immiinsi i ille dabare; ki saga'llisanne eese hee'ise.

³⁸Keese badditam keenina uwwitti neeyyaaxxi sagara iina ki awwaadaanchinam wonshe.

³⁹Ki seer hanqo'an ihu bikkina an baddoommi sholle'nniinsi eese gatise.

⁴⁰Ki ijaajo egereena mixoommo; ki muccuroominnem an foorinne hee'oommisa isse.

⁴¹Waa'a! Ki eroommi iina waarona; ki neeyyaxxi saga'llisannem eese gatise.

⁴²Ki sagaranne amma'nnamummi bikkina eese game'llitam keen hundinam dabachcha uwwoommo.

⁴³An neeyyato issoommok ki seerannetti ihu bikkina an hundi ammanem hanqa wocoommisina hara'mme.

⁴⁴Ki seera heer heerinam egeroommo.

⁴⁵Ki ijaajo egerimma iittoommi bikkina hanqo'i wolabbaninne hee'oommo.

⁴⁶Ki ijaajo adilluwwi illagenne wocoommo; eehannonne hore'em tuuroommoyyo.

⁴⁷Ki ijaajo iittoommi bikkina eehannonne an liiramoommo.

⁴⁸Iittoommi ki ijaajo lonsoommo; ki seeram dabaransaa sawwoommo.

⁴⁹An neeyyato issoommok ixxonnetti ihu bikkina iina ki awwaadaanchina uwwitti neeyyaxxi sagara sawwihe.

⁵⁰Ki neeyyaxxi sagar foorinne hee'oommisa issu bikkina an hawwummi ammanennem ihuta'n qoxxoommo.

⁵¹Amaadaan hundi ammanem eesenne naaccantamuulla; ihukkaarem an ki seeriinsi qee'lloommoyyo.

⁵²Waa'a! Gaassiinsim yoo ki seera sawwoommo; ixxim eese qoxxisookko.

⁵³Jor keen ki seera ginditu'uuyyi moo'aa lobakata nadadummo.

⁵⁴Ka uullanne hee'oommi koyyina'n doolli hundannem ki seer iina mazmuura.

⁵⁵Waa'a hiim hundam ki summa tiiroommo; ki seeram egeroommo.

⁵⁶Hundi ammanem ki ijaaccisanne hee'oommo; ookkim iina liirancha.

⁵⁷Waa'a, at iina sharadame; anim ki seera egereena sagara aagaammo.

⁵⁸Iihaanninne wo'm wodaninne keese hasoommo; ki saga'llisinnem iina ki biijooma moo'ise.

⁵⁹An i taakko saarayyaa moo'aa i lokko ki ijaacci kollonne dabarummo.

⁶⁰An dasoo'n ki ijaajo egereena gaaggaaboommo.

⁶¹Jor keen iina qaasha qaashsho'o; ihukkaarem an ki seera xadoommoyyo.

⁶²Hanqo'i ki see'l bikkina keese galaxxeena luxxi baqitenne ki'oommo.

⁶³Keese badditam keenoo ki seera egettam keenoo hundam iittoommo.

⁶⁴Waa'a! Uulli ki eroomminne wo'mmaakkoohane; ki seeram iina losise.

⁶⁵Waa'a! Ki saga'llisannem iina ki awwaadaanchina danaamo issitaatto.

⁶⁶Ki ijaajonne amma'nnummi bikkina qoossimmaa lachchaa iina losise.

⁶⁷At eese guzumo'lleena illageen huushamam hee'ummo; ihukkaarem kaba ki sagarina ijaajamoommo.

⁶⁸Waa'a at danaamo; ki baxim danaamo; ki seeram iina losise.

⁶⁹Amaadaan qophphaninne i summa bi'isso'o; ihukkaarem an ki ijaajo guullaa egeroommo.

⁷⁰Ixxuwwik wodan duudaakkoohanee qoossimbee'i keenoo; ihukkaarem an ki seeranne liiramoommo.

⁷¹Ki seera losoommisina eese u'nnissittis iina danaakko.

⁷²Xigiinsi hanaan ihaakkoo biriinsii worqiinsii ki suumiinsi firoo seer iina e'llookko.

⁷³Ki angi eese baxukko; axisansukkome; ki ijaajo losoommisinam iina qoossimma uwwe.

⁷⁴Ki sagaranne neeyyata issoommi bikkina keese badditam keen eese moo'lla'a liirantamo.

⁷⁵Waa'a! Ki seer hanqo'an ihukkisa la'oommo; eese guzumo'llittokim amma'nnantaattoohan ikkitti bikkinatte.

⁷⁶Iina ki awwaadaanchina aaggitti saga'llisanne ki eroommi eese qoxxisona.

⁷⁷Ki seeranne liiramoommi bikkina foorinne hee'oommisina at iina qishixxe.

⁷⁸Amaadaan mashkabee'em eese hawwodd'o bikkina tuuttona; ihukkaarem an ki ijaajo dabaransaa sawwoommo.

⁷⁹Keese badditam keenii ki ijaajom laqqam keenii i beyyo waattona.

⁸⁰An tuuroombee'isina i wodan ki seeranne miiqakkam luwwi bee'an ihona.

⁸¹Waa'a! I foor ki gatisimma lobakata quluxukko; ki sagarannem an neeyyato issoommo.

⁸²«Hinki ammane eese qoxxissooda'e?» yummuuyyi ki neeyyaxxi sagara egerummuuyyii i illi jaamukko.

⁸³Wiriira goddu cana labummaarem ki seera an xadummoyyo.

⁸⁴Iikki ki awwaadaanchik umur hinkaa'nna? Eese hawwissam keenondu oogattoottok hinki balla?

⁸⁵Ki seera egettambee'i amaadaan eese ubbuusseena bare hinto'ookko.

⁸⁶Ki ijaaj hundim amma'nnamaakkoohane; mashkabee'em hawwissam bikkina iina hara'mme.

⁸⁷Ixxuwwi eese uulliinsi bi'isseena hofqaxim gataakko; ihukkaarem an ki ijaajo urummoyyo.

⁸⁸At eese ki eroomminne foorinne hee'oommisa isse; anim at woccitt ki seera egeroommo.

⁸⁹Waa'a! Ki sagar heer heerina hee'oohane; iimanennem qoxxaa hee'ookko.

⁹⁰Amma'nnantaattoohaannomim doolli hundinam hee'ookko; at uulla baxxitto; ixxim qoxxaa hee'ookko.

⁹¹Qooccanchi hundim kiina awwaadaan ihu bikkina ki ijaaccesanne kaballi afeebe'em qoxxaa yookko.

⁹²Ki seer iina liiranchi ihoo'n yoota'n eesenne afu hawwonne lehaa hee'ummo.

⁹³At eese foorinne hee'issoottok ki seerinnetti ihu bikkina an ki seera hore'em xadoommoyyo.

⁹⁴An kiihan ihummi bikkina at eese gatise; anim ki ijaajo egereena mixaammo.

⁹⁵Jor keen eese bi'isseena duggamuulla; ihukkaarem an ki seera dabaransaa sawwoommo.

⁹⁶Hundem luwwinam gabal yoo'isa moo'ummo; ihukkaarem ki seerina gabal bee'ane.

⁹⁷Waa'a! Ki seera lobakata iittoommo; ixxi bikkinam balli hundoomam sawwoommo.

⁹⁸Ki ijaaj hundi ammanem iinninnetti ihu bikkina i diina'iinsi loboka eese qoor issukko.

⁹⁹An ki seera dabaransaa sawwoommi bikkina i losisaan hundiinsim loboka lachchaam ihummo.

¹⁰⁰Ki ijaajo egeroommi bikkina lommanniinsi loboka lachchaam ihummo.

¹⁰¹Ki sagara egereena hasoommi bikkina jor googiinsi i lokko ege'llummo.

¹⁰²Eese losissittok atette ikki bikkina ki seeriinsi qee'llummoyyo.

¹⁰³Ki sagar iina hinkido'i xee'aalla! Marabiinsim loboka xee'aalla.

¹⁰⁴Ki seeriinsi qoorooma siixxaammo; ee bikkina qophpha'n googo hundam sabummo.

¹⁰⁵Ki seer i lokkina sha'a; i googinam caakka.

¹⁰⁶Kiikka hanqo'i seera egereena hide'ummi sagara qoxxisoommo.

¹⁰⁷Waa'a! An lobakata hawwummi bikkina ki neeyyaxxi saga'llisanne eese foorinne hee'ise.

¹⁰⁸Waa'a! An iittaa hincaa'oommi i suumiinsi firoo galaxxi kitima aa'e; ki seeram iina losise.

¹⁰⁹I foor hundi ammanem u'nnannette; ihukkaarem an ki seera xadoommoyyo.

¹¹⁰Jor keen iina qaasha qaashsho'o; ihukkaarem an ki ijaajiinsi qee'llummoyyo.

¹¹¹Ki seer iina heer heerina hee'oo amaxxa; i wodanim liiramookkok ixxonnette.

¹¹²Ki seera heer heerina lasaanchi afeebe'em egereena murte'aammo.

¹¹³Lam tiir yoo keeno sabummo; ihukkaarem ki seera iittummo.

¹¹⁴At iina an maaxamoommi girbaa agiraa ki sagaranne neeyyata issoommo.

¹¹⁵An Waa'i ijaajo egereena hasoommi bikkina jora baxxakkam keen iinniinsi qee'llehe.

¹¹⁶Ki neeyyaxxi saga'llisinne eese qoxxise anim foorinne hee'oommo; i neeyyat kora'am gatoobee'isa isse.

¹¹⁷Qulitbee'e hee'oommisina iina hara'mme; hundi ammanem ki seera egeroommo.

¹¹⁸Ixxuwwik sawwit hantaarinne wo'mmaakkoohan ihu bikkina ki seera egettambee'i keeno hundam at sabbootto.

¹¹⁹Jora baxxam keeno hundam haccisa uunjitootto; ee bikkina an ki seera iittummo.

¹²⁰An keese baddimmiinsi ki'ukkok i orachchi huxe'ukko; ki oogatom lobakata baddoommo.

¹²¹Hanqo'i oogato'oo muccuroo'm baxoo baxaammo; ee bikkina eese wor amaddam diina'ina higissaa uwwititte.

¹²²Eese ki awwaadaancho xumminne egere; amaadaan eese hawwoddamisa issititte.

¹²³Kiikka gatisaanchoomaa hanqo'i sagaraa egerimminne i illi jaamukko.

¹²⁴Eese ki awwaadaancho ki eroomminne moo'e; ki seeram iina losise.

¹²⁵An kiina awwaadaancho; ki seera la'ona iina qoossimma uwwe.

¹²⁶Waa'a! Manni ki seera gindu bikkina ki oogato moo'issoo amman kabadette.

¹²⁷Ee bikkina ki ijaajo worqiinsi loboka hore'em muccur worqiinsim lonsaa iittoommo.

¹²⁸Ki ijaaj hundim hanqi ihukkisa amma'nnummi bikkina qophpha'n googo hundam sabummo.

¹²⁹Ki seer haabaamo; ee bikkina an wo'm wodaninne egeroommo.

¹³⁰Ki saga'llek tirat caakka uwwookko; qawwuwwinam lachcha uwwookko.

¹³¹Ki seera lobakata quluxummi bikkina xeebe'aa i suume fooqaa'ummo.

¹³²I kollonne daba'lle; keese iittitam keenina issitoo'isam iinam qishixxe.

¹³³Ki neeyyaxxi saga'llisanne i googo xabbaa'e; baaxiil eese kaa'ona cawwitaa uttitte.

¹³⁴Ki ijaajo egeroommisina eese wor amaddam kee'n angiinsi gatise.

¹³⁵Iina ki awwaadaanchina ki ille caakkise; ki seeram iina losise.

¹³⁶Manni ki seera egerubee'i bikkina i illiinsi indiiddi wo'isa daadukko.

¹³⁷Waa'a! At muccura ki oogato'im hanqo'ane.

¹³⁸Ki seera muccuroominne ijaajjitto; oohim hore'em amma'nnamaakkoohane.

¹³⁹I diina'i ki sagara sholliisso'i bikkina to'achchi eese gii'llisa shokkiisukko.

¹⁴⁰Ki sagar keenamaa hore'em muccuraakkoohane; an lobakata iittummo.

¹⁴¹An hoffanee gadamaammoohanee; ihukkaaerem ki seera xadummoyyo.

¹⁴²Ki muccuroom heer heerina qoxxaa hee'ookko; ki seerim hundi ammanem hanqa.

¹⁴³Lobakat hawwii u'nnii eesenne afaakko; ihukkaarem ki ijaajonne an lobakata liiramoommo.

¹⁴⁴Ki seer heer heerinam muccura; foorinne hee'oommisina iina qoossimma uwwe.

¹⁴⁵Waa'a! Wo'm wodaninne an ki kolloonne laaroommuulli ihu bikkina at macceese; anim ki seera egaroommo.

¹⁴⁶Ki kollonne laaroommuulla; at eese gatise; anim ki seera egeroommo.

¹⁴⁷Hara'mmitoo'isina soodaraaronne ki'aa ki kollonne laaroommo; ki sagarannem neeyyata issoommo.

¹⁴⁸An ki sagara dabaransaa sawweena; hiim hundoomam diriiroo'n garummo.

¹⁴⁹Waa'a! Ki eroommi bikkinaa yitaa i sagara macceese; ki muccur oogato'isannem eese foorinne hee'ise.

¹⁵⁰Eese hawwissam mogaalli manni eesenne hincito'ookko; ixxuwwi ki seeriinsi hore'em qee'llito'oo keeno.

¹⁵¹Waa'a! Ihukkaarem at iina hincitaattoohane; ki ijaaj hundim hanqo'ane.

¹⁵²At ki seera heer heerinam qoxxissittisa gaassiinsim hee'oo ki seeriinsi la'aammo.

¹⁵³An ki seera xadummoyyo; ee bikkina i hawwo moo'llaa eese gatise.

¹⁵⁴I bikkina at fitantaa eese gatise; ki neeyyaxxi saga'llisam foorinne hee'ise.

¹⁵⁵Ki seera hassambee'i bikkina jor keenina gatimmi neeyyat bee'e.

¹⁵⁶Waa'a! Kiikki qishixxat lobakata; ki muccur oogato'innem eese foorinne hee'ise.

¹⁵⁷Eese hawwissam i diina'i duta ihukkaarem an ki seeriinsi qe'llummoyyo.

¹⁵⁸Ki sagara egettambee'i bikkina amma'nnantambee'isa moo'aa shigigummo.

¹⁵⁹Waa'a! An ki seera iittoomisa moo'llaa ki eroomminne eese foorinne hee'ise.

¹⁶⁰Ki sagar hundim hanqa; muccur ihu ki seerim heer heerina hee'oohane.

¹⁶¹Gassaan mashka'i bee'em eese hawwissamuulla; ihukkaarem an ki sagarina baddimminne ijaajamoommo.

¹⁶²Lobakat qeefajjo'o siidaa liiramoo manchisa ki neeyyaxxi sagaranne lobakata liiramoommo.

¹⁶³An qophphano saboommoo shigigoommoo; ihukkaarem ki seera iittoommo.

¹⁶⁴Hanqo'i ki oogaxxi bikkina ballanne lamar kore an keese galaxxoommo.

¹⁶⁵Ki seera iittitam keenina lobakat xummi yookko. Ma'lluwwim ixxuwwa qoleena xanooyyo.

¹⁶⁶Waa'a! An kiikka gatisimma neeyyatinne egeroommo; ki seerinam ijaajamoommo.

¹⁶⁷An ki seera egeroommo; ixxom lobakata iittoommo.

¹⁶⁸I taakki hundam at laqqoo bikkina an ki ijaajoo seeraa lonsoommo.

¹⁶⁹Waa'a! I laachcha at macceese; ki saga'llisannem iina qoossimma uwwe.

¹⁷⁰I uunxat ki beyyo afona; ki neeyyaxxi saga'llisinnem eese gatise.

¹⁷¹Ki seera losissi bikkina hundi ammanem keese galaxxoommo.

¹⁷²Ki seer hundim muccur ihu bikkina ki saga'l bikkina an zammaroommo.

¹⁷³Ki ijaajo doo'llummi bikkina ki angi iina hara'mmeena amman hundam gudaakkoohan ihona.

¹⁷⁴Waa'a, kiikka gatisimma quluxaammo; ki seerannem an liiramoommo.

¹⁷⁵An keese galaxxoommisina eese foorinne hee'ise; ki seerim iina hara'mmaanchi ihona.

¹⁷⁶An bi'u gereechchisa timtimaammo; ihukkaarem an ki ijaajo xadumbee'i bikkina eese ki awwaadaancho at hase.