Read Hadiyya Mazmuu'l Kitaaba 132 Bible Online

Mazmuu'l Kitaaba 132 - Hadiyya bible

Mazmuu'l Kitaaba 132

¹Waa'a! Daawiita sawwihe; iyyaqqu hawwi hundam xadditte.

²Waa'ina ixxi hide'aa Yaaqoob malaayyaam Waa'inam

³«An i mine aagoommoyyo; i ara'annem iinse'oommoyyo.

⁴An hore'em diriiroommoyyo; illem cilimmaa'oommoyyo.

⁵Oohim Waa'ina beyyo Yaaqoob malaayyaam Waa'inam mine baxeembee'e» yaa aagu uga'aa sawwihe.

⁶Beeteliheemanne inkaa Hidi'l Saga'l Saaxi'n bikkina macceensummo; Ju'aarii'm biirannem siindummo.

⁷Neesem «Waallehe, Waa'i mine mallona; ixxi lokki lugumonnem otossinona» yinummo.

⁸Waa'a! Ki'e; ki malaayye moo'isoo Hidi'l Saaxininne maqirem ki mine aage.

⁹Ki qeessuwwi muccuroo'm baxo baxxona; ki keesammuwwim liiranchinne «Ilil» yitona.

¹⁰Ki awwaadaanchi Daawiit bikkina yitaa at doo'llittoka uttitte.

¹¹Waa'i Daawiitina «Ki oosiinsi mato ki adilla'n barcumanne afuussoommo.

¹²Ki oos iikka hidi'l sagaraa ixxuwwina losisummi ijaajoo egettolas ixxuwwi oos kiinniinsi lasonne heer heerinam ki adilla'n barcumanne afuuttamo» yaa gindamoobee'i hanqo'i hidi'l sagara aagukko.

¹³Waa'i Xiyoona doo'llu bikkina ixxenam heechchi beyyi ihona hasu bikkina

¹⁴«Kuk iina heer heerina usheexxaxxi beyyo; an doo'llummi bikkina eekke'enne hee'oommo.

¹⁵An Xiyoona maasse'oommo; ixxi amaxxam lonsoommo; buxim hurbaata goddoo'isa issoommo.

¹⁶Ixxi qeessuwwina gatimmi eddechcha eddeesoommo Keesammuwwim liiranchinne lobakata ililitamo.

¹⁷Ee beyyonne Daawiit shumo'iinsi malaayyaam adila ki'isoommo; an doo'llummaanninam caakka gudsoommo.

¹⁸Ixxi diina'a sholliisoommo; ihukkaarem ixxi adilla'n mare'i belecce'aa moo'amookko» yukko.