Read Hadiyya Mazmuu'l Kitaaba 135 Bible Online

Mazmuu'l Kitaaba 135 - Hadiyya bible

Mazmuu'l Kitaaba 135

¹Waa'a galaxxehe; ixxekam summa lonsehe; Waa'i awwaadaano, Waa'a galaxxehe.

²Moollanni minenne ni Waa'i mi'nnaannonne wixxixxi beyyonne uullitakkam keen hundim Waa'a galaxxehe.

³Waa'i danaam ihu bikkina ixxo galaxxehe; ixxi eran ihu bikkina ixxi summina zammallehe.

⁴Waa'i Yaaqooba ixxi gagina Isra'ee'l minaadabam ixxi gaqqi gulummi issaa doo'llukko.

⁵Waa'i loban ihukkisa la'oommo; ni Waa'i qophpha'n waa'uwwiinsi hundiinsim lobane.

⁶Iimanennee uullannee xilluwwannee dambalaqquwwannee ixxi iittu luwwa hundam issookko.

⁷Duuba uulli tochchiinsi eebookko; xeeninne maqirem banqa dilliisookko; hafachcham wixxaa'aa dissu beyyiinsi fissookko.

⁸Gibxanne won ihaa qaramukkoka manniinsi ki'isaa diinatenne afeebe'e shukko.

⁹Eekke'ennem Gibxi adilaa ixxi awwaadaanoo hundam guzumo'eena maalalsiisoo luwwaa agannaa baxukko.

¹⁰Lobakat mulli minaadaba guullukko; malaayyaam adilluwwam shukko.

¹¹Amoore'i adil Siihoona, Baasaa'n adil Oogaa Kana'aa'n adilluwwaa hundam shukko.

¹²Ixxuwwi uullam gulummi issaa ixxi minaadab Isra'eelina uwwukko.

¹³Waa'a! Ki summi heer heerinam hee'oohane; qaranchi hundim keese tiirookko.

¹⁴Waa'i ixxi minaadabina oogatookko; ixxi awwaadaaninam qishixxookko.

¹⁵Mulli minaadaphphi waa'uwwi birinnee worqinnee manni angi baxaakkoo keeno.

¹⁶Suum yoo keeno woccamoyyo; illi yoo keeno moo'llamoyyo.

¹⁷Macci yoo keeno macceessamoyyo; saninnem fooshshe'lleena xantamoyyo.

¹⁸Baxxo'i keenii ixxuwwannem amma'nnitam keenii hundim ee waa'uwwisam ikkona.

¹⁹Isra'ee'l minaadaba, Waa'a galaxxehe; Ki'nnuwwi Aaroon oosim Waa'a galaxxehe.

²⁰Leewi'i ooso, Waa'a galaxxehe; Waa'a badditakkam keen hundim Waa'a galaxxehe.

²¹Waa'a Xiyoonanne ixxi hee'oo Yerusaaleemannem galaxxehe. Waa'a galaxxehe.