Read Hadiyya Mazmuu'l Kitaaba 139 Bible Online

Mazmuu'l Kitaaba 139 - Hadiyya bible

Mazmuu'l Kitaaba 139

¹Waa'a! At eese saarayyitto; laqqittome.

²At an issoommi luwwi hundam laqqootto; i sawwite hundam qee'llonnem qoossitaa laqqootto.

³I taakkoo i iinsoo at qoositootto; i baxo hundam laqqootto.

⁴Waa'a, an woceena illageenim mayyeena sawwumda'e at laqqootto.

⁵I kululleeta hundam oottitto; ki anginnem eese egettitto.

⁶Kiikki lachchi lobakata maalalsiisoohane; an la'eena xanoommaanniinsim hanaanette.

⁷Ki Ayyaaniinsi hanno gibaa xoreena xanoommo? Ki illagiinsidu hanno giboommo?

⁸Iimanne firumta'n ee beyyonnem at yoonto; Sii'oolanne aagumta'nnim at ee beyyonnem hee'llootto.

⁹Eelliinchi firiinsi ekkeen bararaa marummita'n eelliinchi aaggi kollinnem qee'llaa hee'umta'n

¹⁰ee beyyonne eese ki anginne awwonsitoottoo; ki makki anginnem eese amaddootto.

¹¹Anim «Eese tuunsi maaxookko» te'im caakkim «Tuunsookko» yumta'n

¹²tuunsi ki beyyonne bee'e; hiimim balli qaxa caakkisookko; ee bikkina ki illagenne hiimonnee ballannee annannoom bee'e.

¹³Iikka mannoomato hundam qooccittok atette; iyyummi godabonnem axisansitaa eese baxxitto.

¹⁴Maalalsiisoo'isaa agannaamisaa ihaa qooccamummi bikkina an keese galaxxoommo; ki bax maalalsiisoohane; anim eekka qoossaa la'oommo.

¹⁵An maaxaqqi beyyonne qooccamummi ammane xilli uulli woronne qooroominne baxamummi ammane i miqqeewwi kiinniinsi maaxamukkoyyo.

¹⁶An qarameena illageenim at eese moo'llitto; iina qoodamu doolle hee'imma asheeroo'nnim ki doonanne kitaabbitto.

¹⁷Waa'a! At iina sawwitoo sawwit hinkido'i lombaamo; xigdu hinkaa'nna duta!

¹⁸Ki sawwit xigakkota'n dambalaq shashshariinsi lobane; an diriichchiinsi baqoommi ammanem kiinninnette.

¹⁹Waa'a! Jor keeno guullitta'n maha ihookko! Xiiga duntakkeena hassakkam keeno, iinniinsi qee'llehe!

²⁰Ki bikkina jor woshsha woccu'uuyyi ki diina'i keesenne kora'am ki'llo'ookko.

²¹Waa'a! Keese sabbam keeno an lobakata saboommo; keesenne ki'llam keenom shigigoommo.

²²Ixxuwwa lobakata sabaammo; i diina'am issaa xigoommo.

²³Waa'a! Eese saarayyitaa i sawwit hundam la'e; eese keentaahim i tii'lleka la'e.

²⁴An hawwodummi luwwi yoolas moo'e; heer heeraxxi googonnem eese awwonse.