Read Hadiyya Mazmuu'l Kitaaba 140 Bible Online

Mazmuu'l Kitaaba 140 - Hadiyya bible

Mazmuu'l Kitaaba 140

¹Waa'a! Jor keeniinsi eese gatise; hantaaraaniinsim eese egere.

²Ixxuwwi jora baxxeena sawwitamo; hundi ammanem ora qooccitamo.

³Ixxuwwik allab qubaam hamashshisa qasoohane; ixxuwwi suumim woraqaallichchisa qubaamo.

⁴Waa'a! Jor kee'n angiinsi eese egere; eese digaadda'a ubbuusseena a'llantam hantaaraaniinsim gatise.

⁵Amaadaan eese amaddeena maaxaqqanne qaasha qaashsho'ookko; usam eese digaadoo'isa issita'a dissito'ookko; eese qolonam shikka guddito'ookko.

⁶An Waa'ina «At iina Moollana» yoommo. Waa'a! I uunxaxxi sagara macceese.

⁷Malaayyaam eese gatisaanchi ikkitti i Moollaanni Waa'a! O'l ayyaamo iina agir ikkitto.

⁸Waa'a! Jor kee'n mixan wo'mmoone; amaadda'a birantambee'isa ixxuwwi sawwit wo'mmoone.

⁹Eese kibbito'i i diina'i a'llancha ixxuwwannem dabare.

¹⁰Gii'l hiramax ixxuwwanne dillona; giiranne ubbona; od ki'llambee'isa leepho'aam barenne darabantona.

¹¹Mulli keeno qophphaninne kasassam keen uullanne kaaxxixxita'a hee'lloone; hantaaraano jor luwwi laseesaa bi'isona.

¹²Waa'a! Buxina oogattoo'isa hawwaa'nnekam hanqa egettoo'isa la'oommo.

¹³Muccur keen hanqo'isam ki summa galaxxitamo; xabbeen keenim ki illagenne hee'llamo.