Read Hadiyya Mazmuu'l Kitaaba 143 Bible Online

Mazmuu'l Kitaaba 143 - Hadiyya bible

Mazmuu'l Kitaaba 143

¹Waa'a! I uunxato macceese; muccuraa amma'nnantaattoohanee ikki bikkinam i uunxato macceessaa dabachcha uwwe.

²Ki illagenne muccur matim bee'i bikkina eese ki agishsho oogatina hincaa'llitte.

³I diinakkichchi eese hochchoolla; eesem kaa'aa buchchanne edaakko; lobakat doolliinsi illageen lehu mannisa eese tuunsonne aagisaakko.

⁴Ee bikkina i tiir u'nnamaakko; i wodanim hoogaakko.

⁵Gaassi doolle sawwoommo; ki baxo hundam dabaransaa sawwoommo; ki angi baxom tiiroommo.

⁶I anga ki kollonne biddiqaa'oommo; i foorim udma'i uulli wo'o xeebe'oohannisa keese quluxukko.

⁷Waa'a! I tiir u'nnamu bikkina qaqqissaa macceese; waammi barenne aagoo mannisa ihoombee'isa ki gaga iinniinsi maaxxitte.

⁸Keesenne amma'nnamummi bikkina dar hundam ki eroomma iina macceesise; i uunxato ki kollonne hincaa'oommi bikkina maroommi googo iina moo'ise.

⁹Waa'a! An keesenne yabo aagummi bikkina i diina'iinsi eese gatise.

¹⁰At iina Waa'i ikki bikkina ki doo'lla issona eese losise; ki keesammi Ayyaanim eese xabbeen googonne awwonsona.

¹¹Waa'a! Ki summi bikkina yitaa eese foorinne hee'ise; ki muccuroominnem eese hawwiinsi fisse.

¹²Iina yoo ki eroomminne i diina'a bi'ise; an kiina agishshi ihummi bikkina eese hawwissam keen hundam guullitaa bi'ise.