Read Hadiyya Mazmuu'l Kitaaba 144 Bible Online

Mazmuu'l Kitaaba 144 - Hadiyya bible

Mazmuu'l Kitaaba 144

¹I angina ora i maxxaarinam qaxxancha losisoo iina daphphixxi beyyi ihu Waa'i galaxxamona.

²Waa'i iina haafoohane, daphphixxi beyyoo eese gatisaanchoo; jor afoobee'isam egeroo agira; minaadab iina ijaajamoo'isa issookkokim ixxotte.

³Waa'a! Kaa'n hundam abooyyitoo'isina manchi maruchcho? Ka hundam ixxena sawwiteendu manchi beet maruchcho?

⁴Manchi beet mataa fooshshe'akko'i fooshshisa ixxi doollim qaqqisaa higoo hawwaankaannisa.

⁵Waa'a! Iimannuwwa diqqaa dille; duunnuwwam nakke; ixxuwwim wiriittona.

⁶Banqika belellaato asse'llaa ixxuwwa binnaa'e; ki xiyyuwwam tokkossaa holle.

⁷Ki anga aad dillissaa xillaalli wo'i woriinsim eese fisse; allaggi manni angiinsim eese gatise.

⁸Ixxuwwi suumim xale'i qophphaninne wo'mmaakkoohanee; ixxuwwi makki anga iimaa'lla'a hide'llamokim qophphanonnette.

⁹Moollanna! An kiina haareechchi mazmuura zammaroommo; tommi muuncan yoo diitta'a lellummuuyyim zammaroommo.

¹⁰At adilluwwina kaachcha uwwitoohane; ki agishshi Daawiitam jor bisa'iinsi gatissoohane.

¹¹Ixxuwwi suum xale'i qophphaninne wo'mmaakkoo keeniinsi ixxuwwi makki anga iimaa'lla'a qophphanonne hide'llam keeniinsi eese gatise.

¹²Ni goo'n oos ixxuwwi woraadda'n ammanenne harishanne mutaa li'u haqqisa ikkona; ni landi adilla'n mine wereeggisimmina axisakka'a baxakka'a lamejjanne uullisakko'i utubbuwwisa ikkona.

¹³Ni gootalluwwim annanni annanni hurbaattuwwinne wo'mmaakkoohan ihona; ni gereebbi lobakat kum wotalla qarona; allaachchi biirannem tommi kum afeebe'e fikkaannona.

¹⁴Ni diinat di'irona; kara qaroo'nnim fikkaannona; neesem qeefadammoone; ni wixxixxi beyyonnem laachchi macceesamoone.

¹⁵Eehido'i minaadab maasse'amaakkoohane; Waa'i ixxuwwina Moollanni ihu minaadab maasee'amaakkoohane.