Read Hadiyya Mazmuu'l Kitaaba 145 Bible Online

Mazmuu'l Kitaaba 145 - Hadiyya bible

Mazmuu'l Kitaaba 145

¹I Moollannaa i Adilaa! an keese iimiimaa'oommo; heer heerinam ki summa lonsoommo.

²Balli hundam keese galaxxoommo; ki summam heer heerinam lonsoommo.

³Waa'i hundiinsi lobane; lobakat galatim hasisoohane; ixxek hundiinsi lobaannoomim manni la'eena xanoohaanniinsi hanaanette.

⁴Ki baxo mat qaranchi mulli qaranchina galaxxukkuuyyi higisookko; malaayyaam ki baxom alallaatookko.

⁵Hibbi yoo nuuraam ki lombi bikkina wocookko; maalalsiisoo ki bax bikkinam sawwookko.

⁶Maalalsiisoo ki bax bikkinam kurookko; anim kiikka lobaannooma alallaatoommo.

⁷Lophphaakkoo ki eroommi bikkina liiranchinne wocookko; ki muccuroo'm bikkinam ilillaatinne zammarookko.

⁸Waa'i qishixxoohanee haafoohanee; quunqinam gaaggaboobee'ane; ixxi eroommim lobakata.

⁹Waa'i manni hundinam danaamo; ixxi qooccanchi hundinam qishixxoohane.

¹⁰Waa'a! Ki; qooccanchi hundim keese galaxxookko; ki keesammuwwim keese lonsookko.

¹¹Ki adilla'n lombi bikkina wocookko; ki wod bikkinam kurookko.

¹²Ee'isenne manni hundim ki wodaam baxo ki adilla'nnekam hibbaam lomba la'ookko.

¹³Ki adillan heer heerina hee'oohane; ki gassim qaranchiinsi qaranchi afeebe'e hee'oohane. Waa'i ixxi sagarina amma'nnamaakkoohane; ixxi issoo luwwanne hundannem eroommi yoohane.

¹⁴Waa'i tartaroo keeno bakkiisookko; ubu keenom ki'isookko.

¹⁵Hundikim illi ki anga moo'ookko; atim hasisoo amman hundam ixxuwwina hurbaata uwwitootto.

¹⁶At ki anga biddiqaa'llootto; fooraam luwwi hundam hasisoo luwwinne goddissootto.

¹⁷Waa'ik goog hundim muccura; issoo luwwi hundam eroomminne issookko.

¹⁸Waa'i ixxo weeshoo keen hundinam hanqo'isinne ixxo weeshoo keen hundinam abbiso.

¹⁹Waa'i ixxo baddoo keenina hasisoo luwwa hundam uwwookko; ixxuwwi laachcham macceesookko; gatisookkome.

²⁰Waa'i ixxo iittoo keeno hundam egerookko; ihukkaarem jor keeno bi'isookko.

²¹An hundi ammanem Waa'a galaxxoommo; ixxi qooccu luwwi hundim keesamaakkoo ixxi summa heer heerinam galaxxona.