Read Hadiyya Mazmuu'l Kitaaba 147 Bible Online

Mazmuu'l Kitaaba 147 - Hadiyya bible

Mazmuu'l Kitaaba 147

¹Waa'a galaxxehe; ni Waa'ina galaxxi mazmuura hincaa'immi danaamo; ixxo galaxximmi liiransoohanee hasisoohanee.

²Waa'i Yerusaaleema areesookko; Isra'eeliinsi qeefadamu keeno dabarookko.

³Ixxi wodan kichche'u keeno qoxxisookko; ixxuwwi omaram fayyiisookko.

⁴Boollaankika xigo la'ookko; ixxuwwam summinne summinnem weeshookko.

⁵Ni Moollanni hundiinsi lobane; lobakatam wodaamo; ixxi lachchinam gabal bee'ane.

⁶Waa'i maashaalli keeno iimmiimaa'ookko; ihukkaarem jor keeno buchchanne ubbuusaa sholliisookko.

⁷Waa'ina galaxxi mazmuura zammallehe; diitta'a lellitakku'uuyyim ni Moollannina zammallehe.

⁸Ixxi iimane duubinne ifiisookko; uullinam xeena uwwookko; duunnuwwannem hixe mutisookko.

⁹Fooraam diinatina itoo luwwa uwwookko; qooranti ciicoollinam laattamaare ittam luwwa uwwookko.

¹⁰Ixxi faraxxi malaayyenne liiramooyyo; qoxar kee'n geellichchannem liiramooyyo.

¹¹Ihukkaarem Waa'i ixxo badditam keenonnee ixxi eroommanne neeyyato issitam keenonnee liiramookko.

¹²Yerusaaleema, Waa'a galaxxe; Xiyoona, ki Moollanna galaxxe.

¹³Ixxi ki gooccuwwika laqqo'uwwa qoxxisaakko; woronne hee'oo ki minaadabam maasse'aakko.

¹⁴Ixxi ki gabala xumminne egerookko; danaam arasinnem goddisookko.

¹⁵Uullina ijaajo uwwookko; oo sagarim qaqqisaa wo'mmookko.

¹⁶Barada fuutto'isa dahookko; hadadda gii'l buchchisa binnaa'ookko.

¹⁷Barada ki'nnisa darabookko; wiisho'i qiidandu ayyi uulleena xanoo?

¹⁸Sagara asse'aa bukkamoo'isa issookko; hafachcha hafachchisookko; wo'im daadoo'isa issookko.

¹⁹Ixxi sagara Yaaqoob shumo'ina ixxi ijaajoo seeram Isra'eelina uwwookko.

²⁰Ka hundam mulli minaadabina issukkoyyo; mashka'oomim ixxuwwi ixxi seera laqqamoyyo. Waa'i galaxxamona.