Read Hadiyya Mazmuu'l Kitaaba 16 Bible Online

Mazmuu'l Kitaaba 16 - Hadiyya bible

Mazmuu'l Kitaaba 16

¹Waa'a! Keesenne amma'nnummi bikkina at eese egere.

²Waa'ina «At iina Moollanna; kiinniinsi bagaan iina eroommi bee'e» yummo.

³Uullanne he'llam keesanto'oo keen hinkido'i lombaammuwwa! Anim ixxuwwanne liiramoommo.

⁴Mulli waa'uwwi kolli geettam keenonne hawwi lophphookko. Ihukkaare an kiti'm xiiga mulli waa'uwwina dunoommoyyo; ixxuwwi summam i suuminne weeshoommoyyo.

⁵Waa'a! At iina sharadaa bikkee; i saamim ki angannette.

⁶I saam er beyyonne ubaakko; hanqinam iina afu gulummi lobakata liiransoohane.

⁷Eese sogoo Waa'a an qalaxxoommo; hiimonnem ihukkaare i tiir eese sogookko.

⁸An hundi ammanem Waa'a illag issoommo; ixxi i makkannetti ihu bikkina heekke'oommoyyo.

⁹Ee bikkina i tiir liiramukko; i foorim liiranchinne wo'mmukko; i orachchim ishtiggaa usheexxukko.

¹⁰Eese waammi woronne uttooyyo; ki keesammam shamona cawwitaa uttooyyo.

¹¹At iina heechchi googo moo'issootto; ki beyyonne wo'm liiranchi yookko; ki makkannem heer heerina hee'oo heelli hee'ookko.