Read Hadiyya Mazmuu'l Kitaaba 17 Bible Online

Mazmuu'l Kitaaba 17 - Hadiyya bible

Mazmuu'l Kitaaba 17

¹Waa'a! Hanqo'i oogatina uunxoommi uunxato maccese; i laachcham macceese; qophphan bee'i suumiinsi firoo i uunxato macceese.

²Hanqo'i oogato iina oogate; ki illim hanqa moo'ona.

³At i wodano saarayyitto; hiimonne waattaahim eese keentitto; keentittaarem eesenne maham siiddittoyyo; i suumim damiga wocoobee'isa ege'llaammo.

⁴Ki saga'llisinne mulli kee'n baxiinsii jor kee'n googiinsii i gaga ege'llaammo.

⁵An hundi ammanem ki googonne taakee'ummo; i lokkim ki googiinsi koratukkoyyo.

⁶Waa'a! I uunxato macceessoo bikkina an keese weeshoommo; ki maccem i kollonne dabattaa i uunxato macceese.

⁷Keesenne magannaato aagoo keeno ki makkinne ixxuwwi diina'iinsi gatissoo Waa'a, maalalsiisoo ki eroomma iina la'ise.

⁸Illi beetichcho egerakkamisa eesem egere; ki laxxi woronne eese maaxe.

⁹Eese bi'issena ki'llo'i jor manniinsii kibbito'i mogaalli diina'iinsii eese gatise.

¹⁰Ixxuwwi qishixxat bee'i mogaalluwwa; ixxuwwi suumim amaada wocoohane.

¹¹Eese hollita'a affa'a maddeena kibbito'ookko; amadda'a uullanne ubbuusseenam eesenne ille kaasso'ookko.

¹²Ixxuwwi sibaaru hobbichchisa; dugaa egeroo hobbichchi geexisam eese egetto'ookko.

¹³Waa'a ki'e! Ixxuwwa uullanne ubbuuse; jor keeniinsi ki bisa'inne i foore gatise.

¹⁴Ixxuwwik sharad xale'i ka uulli heechchanne ihu manni angiinsi eese gatise; ihukkaarem ixxuwwa ixxuwwina dissitti hawwinne guzumo'e; oo hawwim ixxuwwiinsii ixxuwwi oosiinsii higaa oos oosina afoohan ihona.

¹⁵Ihukkaarem muccuroominne an keese moo'oommo; baqoommi ammanem an keese labimma moo'aa liiramoommo.