Read Hadiyya Mazmuu'l Kitaaba 18 Bible Online

Mazmuu'l Kitaaba 18 - Hadiyya bible

Mazmuu'l Kitaaba 18

¹Waa'a! At iina malaayyi ikki bikkina an keese lobakata iittoommo.

²Waa'i eesenne jor afoobee'isa egeraancho; ixxi iina qoxxalli girbaa gatisaanchoo. I Waa'i eesenne jor afoobee'isa egeroohane; ee bikkina an ixxonne yabo aagoommo; ixxim iina agira; ixxi eese gatisaanchoo girbaa.

³Galat hasisoo Waa'a an weeshoommo; ixxim eese i diina'iinsi gatisookko.

⁴Leh us eese xagarukko; bichchi dirisim eese xuuxukko.

⁵Leh qaash eese kolli hundinnem amadukko; leh qaashim amadukko.

⁶Eesenne u'n afu ammane, Waa'a weeshummo; hara'mmoo'isinam ixxo uunxummo; ixxim keesammi ixxi minenne ihaa i sagara macceesukko; i laachchim ixxena macceesamukko.

⁷Waa'i quuqu bikkina uulli heekke'ukkoo huxe'ukkoo; duu'n lugummuwwim sheephsheephukkoo heeke'ukkoo.

⁸Ixxi saniinsem wiriir firukko; ixxi suumiinsem itoo gii'l labanii shokkiisoo gii'l kasharii firukko.

⁹Ixxim iimane diqaa aad dillukko; ixxi lokkiinsim woroon tuunsaakkoo duub hee'ukko.

¹⁰Kirubeelanne afuuraa bararukko; hafachchi ladonnem afuuraa iim firukko.

¹¹Ixxi gagoomim tuunso gunguu'llukko; xeenaam tuunsi duubim ixxo kibbaakko.

¹²Ixxi illagenne yoo belellaatiinsi ki'ukkok kini'nnoo baradii gii'l labanii tunsaakkoo duuphphi worinne firukko.

¹³Moollanni iimaninne banqisa gugukko; Hundam xanoo Waa'i sagarim macceesamukko[2].

¹⁴Ixxi xiyyuwwam tokkosukko; diina'uuma binnaa'ukko; banqi bellellaatinnem hollukko.

¹⁵Waa'a! Ki diina'a axeetti ammanee ki quunqi sagaram ixxuwwina macceesissi ammanee dambalaqik lugum moo'amukko; uullikim shooho'i la'amukko.

¹⁶Ixxim iimaniinsi ixxi anga aad asse'aa eese amadukko; lobakat xilli wo'i woriinsim eese fissukko.

¹⁷Iinniinsi lobakata malaayyaammuwwi hee'llo'i i diina'iinsii eese sabbam qoxalluwwiinsii Waa'i eese gatisukko.

¹⁸Eesenne hawwi affu ammane i diina'i eesenne ki'llo'o; ihukkaarem Waa'i iina hara'mmukko.

¹⁹Waa'i eesenne liiramu bikkina gatisukko; haraar beyyonnem fissukko.

²⁰Waa'i i muccuroo'mmisinne iina miqukko; i angi muccuroo'mmisinnem iina dabarukko.

²¹Waa'ika googo an awwonaammo; ixxonne afare dabaraa jor baxo baxummoyyo.

²²Waa'i seera hundam guullaa egeraammo; ixxi ijaajiinsim laso daba'llummoyyo.

²³Ixxi eesenne miiqoo luwwi ma'lluchchim bee'e; jora baximmiinsi i gaga ege'llaammo.

²⁴Waa'i i muccuroo'mmisinnee I angi muccuroo'mmisinnee iina miqukko.

²⁵Waa'a! Kiina amma'nnamu keenina atim amma'nnantaattoohane; xabbeen keenina atim xabbeena.

²⁶Muccur keenina atim muccura; ihukkaarem boqqi keenina atim boqqa.

²⁷Maashaalli keeno at gatissootto; ihukkaarem bolxitam keeno sholliissootto.

²⁸Waa'a! At iina caakka; i tuunsom caakkissootto.

²⁹I diina'a kaa'ona iina malaayye uwwitootto; ki malaayyinnem ki'n qasha xophphoommo.

³⁰Waa'ik goog hore'em muccura; ixxi sagarannem kurakkam luwbee'ane; ixxonne yabo aaggam keen hundinam agira.

³¹Waa'iinsi bagaan mulli Waa'i bee'e; ni Waa'iinsi bagaan neesenne jor afoobee'isa egerookkok bee'e.

³²Eese qoxxisookkok Waa'a; i googom xabbaa'ookkok ixxotte.

³³I lokkom saarokkichchi lokkisa qoxxisookko; duunnuwwannem baachchi bee'e uullisookko.

³⁴Ixxim i angina qaxxancha losisookko. I wodam naas xiyya chokkoroommisina qoxxisukko.

³⁵Waa'a! Eese gatisoo ki agira iina uwwitto; ki makki angim eese bakkiisookko; iina hara'mmiteena waattaa eese lonsitto.

³⁶An taakke'oommi beyyo haraassitto; luxuunxim eese ubbuusooyyo.

³⁷An i diina'a hollaa amadoommo; ixxuwwam guullaa bi'isoo'n laso daba'lloommoyyo.

³⁸Ixxuwwi la'mmaagge ki'llambee'isa issaa aphphisoommo; ixxuwwim i lokkiinsi woroon ubbamo.

³⁹Oramoommisinam iina malaayye uwwitootto; i diina'i kaa'antamisa issitootto.

⁴⁰I diina'i iinniinsi laso daba'llita'a gibbamisa issitaatto; eese sabbam keenom guullaa bi'isoommo.

⁴¹Ixxuwwi hara'mmatina laattamo; ihukkaarem ixxuwwa gatisookkok ayyim hee'ooyyo; odim Waa'i kollonne laattamo; ixxim macceesooyyo.

⁴²An ixxuwwa hafachchi fii'aa massoo di'llisa liitoommo; googonne hee'oo ha'llisam hance'amoommo.

⁴³Ka boqqi minaadabiinsi eese gatissitto; mulli minaadabannem adil issitto; an la'oombee'i minaadabim iina ijaajamaakko.

⁴⁴Allaggi minaadab eese shoobbookko; i sado macceesukkisam iina ijaajamookko.

⁴⁵Ixxuwwim baddimminne tiiro bi'llamo; maaxanto'i girbi woriinsim huxe'llu'uuyyi fittamo.

⁴⁶Waa'i hee'oohane; eese joriinsi egeru Waa'ina galat ihona; eese gatisu Waa'im iimiimihona;

⁴⁷Ixxim i diina'iinsi baado miqisookko; minaadabbuwwim iina ijaajantamisa issookko.

⁴⁸Ixxim i diina'iinsi eese gatisookko. Waa'a! I diina'a kaa'oommisa issitaa eese lonsitootto; hantaaraan kee'n angiinsem eese gatissootto.

⁴⁹Ee bikkina Waa'a! Minaadaphphi lambe'enne keese galaxxoommo; ki summam mazmuurinne lonsoommo.

⁵⁰Ixxi adil issukkaannina lob kaachcha uwwookko; ixxi doo'llukkaanninam ixxi eroomma moo'isookko; Daawiitinaa ixxi shumo'inaa heer heerina eekka issookko.