Read Hadiyya Mazmuu'l Kitaaba 21 Bible Online

Mazmuu'l Kitaaba 21 - Hadiyya bible

Mazmuu'l Kitaaba 21

¹Waa'a! Adilina malaayye uwwitti bikkina liiramaakko; ixxena kaachcha uwwitti bikkinam lobakata liiramaakko.

²At ixxi mixa'nneka uwwitto; ixxi keese xa'mmu luwwam hoottittoyyo.

³At lobakat er maasso amaddaa ixxo taqeebaltitto; ixxi horoorennem muccur worqi adilla'n mare'e issitto.

⁴Ixxim heechcha uwwitoo'isina keese uunxukko; atim qeeraa'l umuraa heer heerina hee'oo heechchaa uwwitto.

⁵At ixxena kaachcha uwwitti bikkina ixxek lombi lophphaakkoohan ihukko; odim hibbaa nuuraa uwwitto.

⁶Eeyya, heer heerina ihoo maasso ixxena uwwitto; at ixxenne maqire ihimmi ixxo liiransookko.

⁷Adilim Waa'anne amma'nnu bikkina Hundam xanoo Waa'i eroommiinsi ki'ukkok hore'em heekke'amooyyo.

⁸Ki angi ki diina'a hundam amadookko; ki makki angim keese saboo keeno hundam qeefadookko.

⁹At moo'antoo ammane midachchi gii'riinsi firoo laba'nnisa shokkiissootto; Waa'im ixxi quunqinne bi'isookko; giirim ixxuwwa itookko.

¹⁰Ixxuwwi fikkaannam uulliinsi bi'issootto; ixxuwwi shumo'om minaadaphphi lambe'iinsi bi'issootto.

¹¹Ixxuwwi keesenne jora baxxeena sawwitamoo dollottamoo ihukkaarem ixxuwwi sawwixxek wo'mmooyyo.

¹²Ki xiyya ixxuwwanne tokkosseena xabbaa'llootto; ixxuwwim laso daba'llita'a gibbamisa issitootto.

¹³Waa'a! Ki wodinne iimiimihe; hundiinsi lob ki malaayyi bikkinam galaxxi mazmuura zammalloommo.