Read Hadiyya Mazmuu'l Kitaaba 22 Bible Online

Mazmuu'l Kitaaba 22 - Hadiyya bible

Mazmuu'l Kitaaba 22

¹I Waa'a! I Waa'a! Eese mahina uttitto? Eese gatisimmiinsii i laachchi sagara macceesimmiinsii mahina qee'llitto?

²I Waa'a! Ballanne an ki kollonne laaroommo; ihukkaarem at macceessittoyyo; hiimom ihukkaare usheexxummoyyo.

³Ihukkaarem at Isra'eelanne galaxxantaattoohane; keesantaahim hee'lloo adila.

⁴Gaassi niyyanno'i keesenne amma'nnanto'o; keesenne amma'nnanto'aare at ixxuwwa gatissitto.

⁵Ixxuwwi ki kollonne laatto'aare at ixxuwwa gatissitto; keesenne amma'nnanta'ahim tuutto'oyyo.

⁶Ihukkaarem an daquuchcho bagaan manchoyyo; eesenne manni naacoolla minaadabim eese gadoolla.

⁷Moo'ookkok hundim eesenne naacoolla; eese gadda'a ixxuwwi horoore heekkeessu'uuyyi

⁸«Ixxi Waa'anna'i amma'nnamaakko hino'i ixxo gatisona; ixxomdu iittoohan ihulas hino'o gatisona» yitamuulla.

⁹Ihukkaarem at iyyummi godabiinsi xummam qaramoommisa issitto; iyyummi anuuna iicoommi ammaniinsim ki'isaa an keesenne amma'nnamummo.

¹⁰An iyyummaansi qaramummaanniinsi ki'isaatim eese abooyyittok atette; iyyummi godabonne uumamummaanniinsim ki'isaa at iina Waa'a.

¹¹Hawwi eesenne afu bikkinaa iinam hara'mmookkok matim bee'i bikkinaa at iinniinsi qee'llititte.

¹²Eese dut diina'i qasoo moolluwwisa kibbito'ookko; Baasaa'n uulli malaayyaam moolluwwisam kolli hundinnem eese kibbito'ookko.

¹³Ixxuwwim itoo luwwa siidaa amadeena toxoo hobbichchisa ixxuwwi aqo eesenne fooqaa'llo'ookko.

¹⁴I malaayyi hoogaa wo'isa daadukko; i miqim edamu beyyi hundiinsim annanni ihaakko; i wodanim i woronnem buu'llisa bukkamaakko.

¹⁵I leella'i gala'isa gogukko; i allabim aqoronne amaxxamukko; eesem leeshisa buchchanne uunjitto.

¹⁶Wish eese kibbaakko; jor kee'n dummichchi eese kibbaakko; i angaa lokkoo qasaakko.

¹⁷I miq hundim xigamukko; i diina'im eese xuxxaa moo'ukko.

¹⁸I eddechcham ixxiwwi gagina baxxanto'o; i qambiisannem saamo issaqqanto'o.

¹⁹Waa'a! At iinniinsi qee'llititte; iina hara'mmiteena qaqqissaa afe.

²⁰Eese bisa'iinsi gatise; i foorem ka wishiinsi gatise.

²¹Eese ka hobbi suumiinsi gatise; qasoo boobi'l buudiinsim eese gatise.

²²Ki summa iyyabbaayyuwwina kuroommo; ixxuwwi wixxixxi lambe'ennem keese galaxxoommo.

²³Waa'a badditakkam keen ixxo galaxxehe; ki'nnuwwi Yaaqoob shumo'i hundim ixxo lonsehe; Isra'ee'l oos hundim ixxo baddehe.

²⁴Ixxi hawwaan keeno gadooyyo; ixxuwwi hawwonnem cawwaa urooyyo; ixxi illem ixxuwwiinsi daphphaa'ooyyo; ixxuwwi laachcham macceesookko.

²⁵At issitti er baxina dut minaadab wixxu beyyonne keese galaxxoommo; keese baddoo kee'n illagennem kiina uga'a uwwoommo.

²⁶Buxxi godditeebee'e ittamo; Waa'i kollonne waattam keen ixxo galaxxitamo; ixxuwwi wodan hee'llam doollenne hundannem liiramookko.

²⁷Uulli hundannem hee'llam minaadab Waa'a tiittamo; ixxi kollonem daba'llitamo; minaadaphphi sulli hundim ixxena otossitamo.

²⁸Adillan hundim Waa'ane; ixxim minaadab hundam gassookko.

²⁹Uullanne hee'llam goddaan hundim ixxena otossitamo; lehiinsi gatteena xantambee'i manni buchchannem daba'llita'a aaggam keen hundim ixxena otossitamo.

³⁰Ka lasaqqi qaranchim ixxena awwaadookko; manni hundim Waa'i bikkina lasaqqi qaranchina kurookko.

³¹Ixxuwwi ka lasage qaramoo minaadabina «Waa'i ixxi minaadaba gatisaakko» yitu'uuyi kuttamo.