Read Hadiyya Mazmuu'l Kitaaba 25 Bible Online

Mazmuu'l Kitaaba 25 - Hadiyya bible

Mazmuu'l Kitaaba 25

¹Waa'a! An i tii'lleka kiina kuroommo.

²I Waa'a! An keesenne amma'nnoommo; i diina'i eese kaa'llamisa issitaa tuussiissitte.

³Keesenne amma'nnantam keen hore'em tuuttamoyyo; ihukkaarem qawwiissu'uuyyi mashka'i bee'em hantaaro baxxam keen tuuttamo.

⁴Waa'a! Ki googo iina la'ise; ki googonnem an maroommisa losise.

⁵At eese gatisaanchi Waa'i ikki bikkina ki hanqanne hee'oommisina eese awwonsee losisee; an hundi ammanem bakke'oommok keesennette.

⁶Waa'a! Gaassiinsim ki'isaa hee'u ki qishixxatoo ki eroommaa tiire.

⁷Waa'a! I woraadda'n baaxiiloo hawwojjaa haafihe; heer heerina hee'oo ki eroomminnee ki qishixxatinnee eese tiire.

⁸Waa'i biijaallaa hanqqo'anee ihu bikkina baaxiilaanina marimmi hasisoo googo kurookko.

⁹Maashaalluwwa hanqi googonne awwonsookko; ixxuwwinam ixxi googo losisookko.

¹⁰Ixxeka hidi'l sagaraa ijaajoo egettam keenina Waa'i goog heer heerinam eroommaa hanqaa.

¹¹Waa'a! Ki summi bikkinaa yitaa; iikka lophphaakkoo baaxiilo haafihe.

¹²Waa'a baddoo manchi ayyette? Oo manci marimmi hasisoo googom Waa'i losisookko.

¹³Oo manchi hundi ammanem amaxxaam ihaa ihookko; ixxi shumo'i uulla lagaa'ookko.

¹⁴Waa'i ixxo baddoo keenina beshichcho; ixxi hidi'l sagaram ixxuwwina la'isookko.

¹⁵I lokko qaashiinsi fissookkok Waa'i ihu bikkina i illi hundi ammanem ixxi kollonnette.

¹⁶An matayyichchoo hawwaanchoo ihummi bikkina Waa'a! I koollonne daba'llitaa at iina qishixxe.

¹⁷Eesenne hawwi lophphaakko; i u'nniinsim eese fisse.

¹⁸Eesenne afu u'nnaa hawwoo moo'e; i baaxiil hundam haafihe.

¹⁹I maso'i hinkaa'nna dutda'e moo'e; eesem hinkaa'nna sabboda'e moo'e.

²⁰An keesenne yabo aagummi bikkina eese tuussiissitte; eesem egeree gatisee.

²¹An keesenne neeyyato issummi bikkina muccuroomii xabbeenoomii eese egerona.

²²Waa'a! Isra'ee'l minaadaba ixxuwwanne afoo hawwi hundiinsim gatise.